قصيدة الهوى والنور (( مخاوي الليل ))

جميله الصدفه الي جابتك حي الهوى والنور.............عليك اجمل مسى مسيت عطني منه قنطاره

احيي فيك ذكرك قبل شوفك والنبا مغمور...............واحيي فيك عطرك واسمك الي مالي داره

انا من مات حي لا طعن حربه ولا منحور.................صويب العين ما يبرى غدى قلبي لك الشاره

بغيت امشي واحس انه غدى مني القدم مبتور......بغيت اقف واشوف عظام كل الجسم منهاره

انا من خانته عبره ولا ضحك مسرور........................يضيق به النفس وده يقول من الحكي خياره

اشيل اغناي لك عرضه وابدلبه على المجرور................وامول من طواريقي على عشاق سماره

ابكتب من قصيد الوزن وغيره من شعر منثور..................انا لك شاعر يكتب وشعره نقوة افكاره

الا يا غايب عني معي حاضر كما الدستور...................خيالك ما يفارقني بفكري دق مسماره

الا من ضقت اسولف لك على نفسي وانا مقهور............واقول الوقت ما يعطي على ما اريد واختاره

عليك اقبل ومنك اقفي ولا بينت لك محظور......................اخاف عيون بعض الخلق ترقبنا وسباره

وجدك الله يا حسنا كما التحفه وانا جمهور................انا المبهور في حسنك وانا من خطفت ابصاره

ومنك العين تامرني وانا لك طايع مأمور....................على وصلك غدى حظي هوين وقصرة اشباره

اشوف ان الحسن عقبك ولو يذكر غدى مكبور..................يقال انه حسن ولا انت كل الزين وابهاره

الا يا بو عيون الحق وبعض الوصف خرصاً حور................عليك الصوت ما هو صوت كما ترنيم قيثاره

بقى قصرك على فالك عساه بطلتك معمور..................تمشي بردهته حافي وتحيا عقبك ازهاره

بريح المسك والعنبر يخالطهم زراق بحور........................اذا اقبلت جا قبلك واذا اقفيته غدى ستاره

على هالبوح والتلميح راس المال صدق شعور.................وصدقني ترى فكري عقب طيفك محد زاره

انا بسألك تعذرني عساي بطلبتي معذور.................اشوف الوقت ما يعطي ولا في الناس عذاره

ذكرت اليوم والساعه ورحلة عمر يا مستور..............ذكرت الله في خلقك خلق هالزين واسراره

اعرف اني ماانا اول ولا اخر واحد مأثور...............واجمل ما ملكته منه طيف دام تذكـــــــــاره

الا يا ليت لي قلب يطيع الراي واهل الشور...............ضحية موقف عابر ورحلة سفر طيـــــــــاره

وكان الوقت عصرية تعدينا حدود السور ..................... ويم القاهرة طرنا بجو حافل اخطاره

مقاعدنا بأخر صف ومقعد سيدي مشغور................على يسراي كان هناك اشوف اطباع جباره

اشوف كل هالفتنه ثقل عقل وسلوك طهور.............حصين محصن شامخ يبين كبر مقــــــــداره

واشوفه ديمةٍ تحيي نبات الأرض بالممطور...............بغيث يوم اشاهدها جرفني فيه تيــــــــــاره

ذهلني مبرم العاتق وشلال الشعر موفور...............وذاك المبسم الوردي بلون الزهر قطــــــاره

وقد اطرق هايف رشيق وخاصر مغمور ...................... قـــــــوام اعتدل طوله يثير اقلوب جباره

اغني واغتني بذكره ولا اطمع كود بالميسور...........وعودي كم شكى مني بعزفي تبكي اوتاره

احبك والهوى جاير وبحت السرلك بسطور..................... وقلبي ماسلاعنك ولو يتعبه مشواره

ابرسلك مع النسمه سلام الخافق المكسور................عسى يجبر عزاه وانك تجيه وتنطفي ناره

اعرف النفس تواقه واعرف اني ماني بمسحور..............ولكن سحر زينه صار ياخلق الله اشعاره

انا والليل والهاجس قطعنا بالخيال بحور...................ابي من هو يوصلني له ومن يعطيني اخباره

يعطيك الف عافيه
صح لسانك واعتلى شائنك
تحياتي
الفياض

انا والليل والهاجس قطعنا بالخيال بحور...................ابي من هو يوصلني له ومن يعطيني اخباره

مشكوره يا الغاليه .... ننتظر الجديد من ابداعاتك .


تحياتي .*.* نصـــــــــــــــــــــــوري *.*.