ثلاث اشهور واوجاعي تسامرني توالي الليـل
ثلاث اشهور واحلامي أبد ما تشبـه أحلامـي
ذبل في ناظري زولك وزارتني طيـوف الويـل
وجافتني طواريقي بعـد مـا خانـت أقلامـي
توسّدني سهر مدري قهـر ولا دمـوع اتسيـل
بس اللي أعرفه جسمي شكا من نفظة اعظامي
ألم يحظن ضلوعي حيل ولا به للألـم تبديـل
وجع يرقص على انغامي والا يا متعس أنغامي
حسبت الوقت بغيابك إلين إن ظاق فيني الحيل
وانا اللي خابر ٍ نفسي على الظيقـات عزّامـي
صبور ٍ والصبر فيني أبد مـا يرتكـي للميـل
حزامي يشتكي جنبي .. وجنبي ما شكا احزامي
ثقيل ٍ في مواقيفي أحسْب المتـر ميّـة ميـل
واحكامـي أصدّرهـا بعـد ماراجـع أحكامـي
أعرف إني أنا النايف وانا الشامخ ونجم اسهيل
بس اللي ما عرفته حالتي لا صرت لك ضامي
ضميتك وانقلب وضعي والا يا مصعب التحويل
والا يا مصعب الرغبه ليا جا حكمها اعدامـي
ذرفتك دمعة ٍ عجزى وعشتك سجّـه وتعليـل
ندهتك بالقلم يا هيه كتبتـك صـوت فالهامـي
طويت اليوم بعد اليوم أبلـل صفحتـي تبليـل
واضمّنها أحبك حيل يا أجمـل واروع آلامـي
ثلاث اشهور يالغالـي يكبلنـي الولـه تكبيـل
ثلاث اشهـور يالغالـي وطيفـك دوم قدّامـي
محمد بن حزام
« آخـــر الـــمـــشـــاركــــات »
ثلاث أشهور
العرض العادي
