من يوميات مدحت وعلة في رحلتهم المكوكيه حول العالم .. استمتعوا بالمغامرة

مدحت : تعالي هنا يا علة وين إنت رايحة ؟! .. علة : رايحة أسعى في الصفا والمروة!! .. مدحت : انعنبوا دراك والدار اللي بجنب دارك لي إثناعش ساعة من يوم طلعنا من الرياض لين وصلنا مكة وأنا أعلم فيك وفي الأخير تقولين لي رايحة أسعى ؟! .. رايحة تسعين قبل ما تطوفين يا الدلخة ؟! .. ما قد طبيتي الحرم قبل كذا ؟! .. معاك حق .. إبوك يتاجر فيكم إنت وخواتك ويحط مهوركم في البنك قرش فوق قرش .. جعلها تصير نار تكوي جبهته هو وخشته .. ها البخيل اللي متعيجز يودي عياله الحرم وهو ما يبعد عنه إلا ألف كيلوا .. فيه ناس تقطع آلاف الكيلوا مترات علشان تيجي الحرم وناس تتعيجز تيجي الحرم وهو على بعد خطوات .. يا الله حسن الخاتمة !! .. تعالي وامسكي ايدي وخليك معي وين ما أروح علشان ما آخذ فيك مؤبد ولا إعدام!! ..

علة : وإن شاء الله نبي نطوف يا مدحت مع كل ها الناس لين ما يخلصون؟! .. مدحت : يالله عفوك ورضاك .. الطواف يا علة سبعة اشواط .. ولو بتطوفين مع الناس لين ما يخلصون راح تخلص روحك وإنت ما بعد خلصتي!! .. إنت مين وين جايبة الذكاء هذا؟! ..

علة : طيب وش نقول لما نطوف يا مدحت ؟! .. مدحت : يستحب أثناء الطواف ذكر الله وقراءة القرآن والأوردة والأذكار الصحيحة التي وردت عن الرسول عليه وعلى آله أفضل الصلاة وأتم التسليم ..الطواف يا علة تعظيم لحرمات الله وفضل العمرة كبير وخاصة إذا كانت في رمضان أسأل الله أن يبلغنا رمضان ويغفر لنا وللمسلمين ..

بعد ما طاف مدحت وعلة وصلوا ركعتين خلف مقام ابراهيم قاموا علشان يروحون المسعى يسعون .. بدأ مدحت في تلاوة الآية : ( إن الصفا والمروة من شعائر الله فمن حج البيت أو أعتمر فلا جناح عليه أن يطوف بهما ومن تطوع خيرا فإن الله شاكرا عليم) وارتقى الصفا وتوجه نحو القبلة ودعا بالأدعية المأثورة








وهم نازلين من الصفا ورايحين جهة المروة وصلوا عند الخط الأخضر اللي يستحب فيه الرمل وهو الاسراع في المشي .. وهو درجة ما بين المشي والهرولة .. علة تركت يد مدحت وحطت طرف عبايتها في اثمها وراحت تركض بلحالها .. قام مدحت وهو يركض وراها ويناديها علة .. يا علة .. اوقفي يا مال البلا فضحتينا .. وعلة تركض ولا ردت عليه .. ولما وصلت علة عند نهاية الخط الأخضر وقفت .. وصل مدحت عندها ومسكها من عبايتها وقال : فضحتينا الله لا يوفق ابليسك .. وين رايحة ؟.. وليش تركضين ولا تردين علي يوم إني أناديك!! .. علة : شفت الناس تراكض قمت أركض معهم!! ..

مدحت : حسبي الله ونعم الوكيل .. المشي السريع يسن للرجال يا علة!! .. لكن الحريم يمشون مشي عادي ولا يركضون مثل الرجال .. والله يا انك مهوية خلاص ما عاد فيه مخ في راسك .. اللي موجود هنا بيض مو مخ!! .. حاطه طرف عباتك في اثمك وتراكضين؟! .. ليش جايين نلعب حنا ؟! .. الطواف والسعي لابد أن يؤديها الانسان بخشوع وطمأنينة ويسبح ويهلل ويكبر ويذكر الله ..

بعد ما خلص مدحت وعلة من العمرة وتحللوا من الاحرام قالت علة : مدحت .. يا مدحت؟! .. وش فيه بالدور الثاني ؟! .. مدحت : فيه ناس يسعون أو يطوفون في الدور الثاني لما يكون الدور الأرضي زحمة .. وكمان يصلون أو يعتكفون فيه ..







علة : طيب ورا ما نسعى مرة ثانية في الدور الثاني ؟! .. مدحت : ما أدري وش أسوي فيك ؟! .. يعني تبغينا نسعي مرتين ؟! .. خلاص يا بنت الناس الدور الأرضي كان فاضي وسعينا فيه ما له داعي نسعى بعد في الدور الثاني!! .. وبعد ما خلص مدحت وعلة عمرتهم ركبوا السيارة علشان يروحون جدة يقضون لهم كم يوم هناك عند البحر لعل وعسى علة تنفك عقدتها وتنام مع زوجها على سرير واحد وتشيل الغطوة عن وجهها علشان زوجها يشوفها .. علة جالسة بالسيارة ومدحت قاعد يسوق وماسك الخط (مكة – جدة) ومشغل الراديو يسمع الأخبار..


علة : مدحت .. مدحت .. يا مدحت ؟! .. مدحت : نعم وش فيك يا علة ؟!.. علة : نسينا شيء مهم!!! .. مدحت : وش هو ؟!! .. علة : نسينا نذبح الأضاحي بعد العمرة!! .. مدحت يوقف سيارته بجانب الطريق بكل هدوء وينتهي المشهد وهو يحاول خنق علة بالعقال!!!!!!!!

إلى مدينة جدة


حاول مدحت أنه يخنق علة بالعقال لعل وعسى يتخلص من أسئلتها السخيفة لكنه لم يهن عليه أن يدخل السجن بسببها وهو لم يرى وجهها بعد!! .. إذ سوف تكون حسرة في قلبه إلى يوم يبعثون!! .. وهنا خطر له خاطر وهو لماذا لايرفع المسفع عن وجهها بعد أن يخنقها كما يفعل المصارعون في التلفزيون ؟! .. إذ يقوم المصارع الفائز بنزع القناع عن المصارع المقنع المهزوم وسط صيحات الجمهور وحماسهم!! .. لكن علة لم تكن ضعيفة ومن السهل تقييد حركتها .. فصرخت وهي تدفع مدحت بعيدا حتى اصطدم رأسه بنافذة السيارة قائلة :

علة : مدحت .. وش قاعد تسوي يا مدحت؟! .. خنقتني!!.. وخر العقال ترى ما يصير لك طيب!! .. ترى أبوي معلمني جودو وكراتيه ومعي الحزام الرصاصي .. وكلها كم شهر ويصير لونه أسود!! ..


مدحت : إيه مضبوط يصير لونه أسود من قلة الغسيل!! .. أضاحي بعد العمرة يا علة؟! .. أحد يضحي بعد العمرة!! .. إنت من أي كتاب جايبة هذه المعلومة .. وين كنت عايشة؟!..

علة : أنا وش قلت يا مدحت؟! .. كل الناس يضحون!! .. حتى حنا نضحي في العيد وحنا لا حجينا ولا أخذنا عمرة!! .. مدحت : إيه يا مال العافية الأضاحي في العيد مو بعد العمرة!! .. جعلهم يضحون فيك قولي آمين!! ..أقول يا علة ممكن اسئلك سؤال ؟! .. سمعي لي الأشهر القمرية؟! ..

علة : ليش يا مدحت هو فيه أشهر قمرية وأشهر شمسية مثل اللام القمرية واللام الشمسية اللي درسناها في المدرسة؟! .. مدحت : يارب عفوك ورضاك!! .. أقول لك سمعي لي الأشهر القمرية .. يعني الأشهر العربية!! .. وش دخل اللام الشمسية في الموضوع يا علة يا بنت أبو علة؟! ..

علة : إيه يا مدحت عرفت خلاص .. شهر محرم .. وشهر واحد مدري صفر!! .. والشهر ذاك اللي قاعد مدري واقف!! .. والشهر اللي اسمه ربيع ما أدري خريف!! .. نسيت اسمه .. وفيه شهر اللي اسمه مثل الايسكريم!! .. وشهر حارس عمارتنا رجب!! .. وولد عمه اللي في العمارة الثانية شعبان!! .. وفيه الشهر اللي الناس يحجون فيه .. وفيه الشهر اللي الناس يصومون فيه!! .. وفيه الشهر اللي الناس يعيدون فيه!! ..

مدحت : أنا اللي بأجيب العيد فيك يا علة!! .. شهر اسمه مثل الايسكريم؟! أي آيسكريم يا علة ؟! .. عسى ما تقصدين شهر جمادي الأولى وجمادي الثانية؟! .. عقلك إنت اللي مثل الايسكريم!! .. يعني علشان اسمه جماد صار ايسكريم؟! .. إن شاء الله يجمدوك في ثلاجة يا علة يا بنت أبو علة!! .. ومن هو الشهر اللي قاعد؟! .. لا يكون تقصدين شهر ذو القعدة؟! .. خلاص أنا غسلت أيدي منك!! .. عليه العوض ومنه العوض فيك يا علة!! .. حسبي الله ونعم الوكيل بغيت أضيع مستقبلي بسببك .. أنا لازم أمسك أعصابي علشان ما أروح فيك إعدام!! .. الله ياخذك ويخلصني منك!! ..


أدار مدحت محرك سيارته وواصل طريقه إلى جدة متجها إلى الكورنيش للاستمتاع ببعض النسائم البحرية لا سيما وأن الجو كان لطيفا في ذلك الوقت!! .. كانت المناظر والمجسمات الجمالية على طول طريق الكورنيش قمة في الجمال ..

علة : يا سلام يا مدحت .. ريحة البحر ترد الروح!! .. جدة وش زينها في مثل ها الجو اللطيف وقف يا مدحت شوي خلينا ننزل من السيارة نقعد ونستانس على البحر شوي ..


مدحت : على أمرك يا علة يا أحلى زوجة بالدنيا!! .. علة : أشوف هواء جدة أثر فيك وخلاك تتغزل فيني يا مدحت!! .. صحيح إن جدة غير!! شم ها الهواء شم!! .. عسى الله يهديك وتبطل تناقرني وتدعي علي كل شوي!!

مدحت : أنا جالس أشم علشان أريح أعصابي لا ينطق فيني عرق من أسئلتك .. علة يا قرة عيني!! .. يا حبيبتي!! .. دعيني أرى وجهك فليس بقربنا أحد!! .. إكشفى هذا الغطاء ليراك زوجك الذي دفع مهرا باهظا وكان يوما اسودا يوم أنه تزوجك!! .. الله يرحم والديك يا علة خليني أشوف وجهك!! .. ولو لمرة وحدة بس!! .. علة بكل إصرار : لأ!! .. يعني لأ!! .. إنت وش بلاك علي؟! .. قلنا لك هذه عاداتنا .. إرض بالأمر الواقع يا مدحت وخلي الحياة تمشي وتاخذ مجراها .. دع القافلة تسير والكلاب تنبح!! ..

مدحت : وش تقولين يا علة ؟! .. أنا كلب ينبح؟! .. إلا إنت اللي قافلة بعارين تسير!! .. علشان كذا نسيم نجد مصور لكم كم صورة في موضوع رحلة برية وإنت تمشين مع القافلة يالقافلة!! ..









علة : خلاص يا مدحت خلنا ناخذ هدنة!! .. كفاية لين كذا!! .. نزل ترمس الشاي خلنا نشرب بيالة شاي بالنعناع ترد لنا الروح وتعدل مزاجي ومزاجك شوي!! ..

مدحت : ترمس الشاي عند أبو سلطان!! .. علة : ومين هو ذا أبو سلطان؟! .. مدحت : أبو سلطان واحد يكتب بمنتدى العرب المسافرون غاث الناس بمواضيعه!! .. اقل موضوع يكتبه ياخذ له أقل شيء عشر أو عشرين صفحة!! .. وكل شوي طالع بمذكرات وذكريات عن سفراته كأن ما أحد سافر إلا هو؟! .. علة : طيب ليش ما تصلت فيه وطلبت منه يرجعلك ترمس الشاي.! .. مدحت : اتصلت فيه وقال لي أنه نسي ترمس الشاي مع واحد اسمه اللندني!! ..

علة : لا يكون اللندني هذا هو اللي أخذ زوجته باريس ونزلها المتحف اللي فيه مقابر وجماجم؟! .. أنا شفت الموضوع اللي كاتبه في المنتدى بعنوان: باريس بعيون اللندني .. مسكينة زوجته والله رحمتها .. أحد يمشي زوجته في المقابر؟! .. العالم هذه ما تخاف ربها؟! .. بدل ما ياخذها السوق يوديها المقبرة!! ..

مدحت : والله أنا اللي ودي آخذك المقبرة!! .. يمكن أرتاح منك!! .. وش عليك من الناس؟! .. يوديها المقابر .. يوديها السوق .. يوديها الملاهي . إنت وش دخلك بالناس؟! ..


علة : خلاص ما أبغى شاهي يا مدحت .. نفسي انسدت!! .. قل لأبو سلطان يخلي ترمس الشاي مع اللندني ما عاد نبغاه!! .. قوم خلنا ندور لنا شقة ولا فندق قبل ما يجي علينا الليل!! .. بس تراني أبغى شقة بمسبح!! والمسبح لازم يكون في الغرفة علشان ما يشوفني أحد لما أسبح بالغطوة!! ولا أقول لك يا مدحت خذ لي جناح في فندق بس لازم يكون فيه سويت!!

مدحت : وإنت وش عرفك بالسويت يا علة؟! .. إنت يالله تعرفي تفرقين بين السويت والبسكويت!! .. وأي مسبح اللي إنت طالباه ؟! .. نسيت إن إنت في بيت أبوك كنتي تتسبحي في سطل!! .. أي مسبح يا بنت الناس؟! .. جالسة تقولين أي كلام؟! .. يازينك وإنت تسبحين بالغطوة كنك سمكة قرش!! ..

أنا ماني فاهم إنت ليش ما نتي راضية تقتنعين إن الإسلام أمر المرأة بأن تلبس الحجاب في وجود الرجال الأجانب فقط وليس أمام المحارم!! .. أنا زوجك يالخبلة على سنة الله ورسوله ليش تغطي علي ليش؟! .. علة : رجعنا لها السالفة من جديد!! .. قلت لك سكر على الموضوع وشف لنا مكان ننام فيه أنا خلاص تعبت .. ما ارتحنا من يوم طلعنا من الطايف ..لا وبغيت تخنقني في السيارة بعد!! .. مدحت : أمري لله .. يالله قومي ندور لنا على فندق ..


نتابع في الحلقة القادمة بإذن الله ..

مدحت وعلة والفندق ذو الخمس نجوم!! ..


ركبت علة بجوار مدحت وتحركت السيارة بهم للبحث عن مكان يقضون فيه ليلتهم قبل أن يواصلوا جولتهم في جدة صباح اليوم التالي للتعرف على معالمها ..

علة : الله يا مدحت توني أعرف إن مدينة جدة حلوة!! .. كنها عروس في ليلة عرسها .. صحيح يا مدحت إن جدة ثاني مدينة من حيث الأهمية بعد مدينة الرياض ؟! ..








مدحت : إيه يا علة .. جدة مدينة عريقة تعود نشأتها إلى ما يقارب 3000 سنة على أيدي مجموعة من الصيادين كانت تستقر فيها بعد الانتهاء من رحلات الصيد، ثم جاءت قبيلة قضاعة إلى جدة قبل اكثر من 2500 سنة فأقامت فيها وعرفت بها حيث يقال أنها سميت بأحد أبناء هذه القبيلة وهو (جدة) بن جرم بن ريان بن حلوان بن عمران بن إسحاق بن قضاعة ويعود نسبهم إلى الجد التاسع لرسول الله (صلى الله عليه وسلم)... ويقال أيضاً إن أصل التسمية لهذه المدينة هو جُدة ( بضم الجيم) ومعناها بالعربي شاطىء البحر لكن المدرسة الفكرية تفضل تسميتها جَدة ( بفتح الجيم وهي والدة الأم) وهذا ربما يؤكد أن أمنا حواء دفنت فيها ..!!

علة : يارب يا مدحت يدفنوك فيها .. علشان يصير اسمها (مدة) على وزن مدحت!! .. مدحت : حسبي الله على ابليسك يا علة .. لسانك متبري منك!! .. فال الله ولا فالك .. لو أنا من لسانك كان هربت من زمان .. لكن مالي إلا الصبر .. لو طلقتك لازم أدفع نص مليون مؤخر!! ..

علة : خلك من سالفة الطلاق لأني أنا عارفة إن إنت منت رايح تطلقني لين ما تشوف وجهي وهذه هي الورقة الرابحة اللي أنا جالسة ألعب فيها!! .. كمل كلامك عن جدة يا مدحت وقل لي هي جدة ما أحد غزاها أو تعرض لها بسوء في قديم الزمان!! ..

مدحت : جدة يا علة تأثرت بحضارتين متجاورتين هما حضارة الفرس الساسانية التي تمثلت في مخطط جدة القديمة وذلك في القرن السادس الميلادي، وحضارة المماليك السلاجقة الذين تم في عهدهم بناء سور حول المدينة وقد تهدم السور فيما بعد .. وجاء السلطان العثماني قنصوه الغوري عام 917هـ ليعيد بناء السور من جديد وذلك لحماية المدينة من غارات البرتغاليين الذين كانوا يجوبون البحر الأحمر .. إلى أن تمت إزالة السور تماماً عام 1947م بعد اتساع الرقعة العمرانية للمدينة، ولم يتبق منه الآن سوى برج واحد جنوب مستشفى باب شريف.. واشتهرت مدينة جدة القديمة يا علة بحاراتها الأربع وهي الشام والمظلوم واليمن والبحر .. وتقع هذه الحارات عند ملتقى طرق القوافل الرئيسة الآتية والذاهبة من الشمال والجنوب، حيث كانت للمدينة أربع بوابات رئيسة هي باب مكة شرقاًِ، وباب المدينة شمالاً، وباب النبط غرباً، وباب شريف جنوباً..









علة : جدة هذه مدينة تاريخية وحضارية وسياحية يا مدحت علشان كذا الدولة مهتمة فيها .. وقف يا مدحت .. وقف!! .. فيه فندق هنا على الكورنيش خلنا نسكن فيه؟! .. شكل ها الفندق حلو!! ..








مدحت : وتبغي تسكني في الشيراتون بعد؟! .. لا والله متفائلة بالحيل!! .. إنطمي واسكتي .. إنت اللي مثلك ما يصلح تسكن إلا بالكرنتينة ولا كيلوا عشرة ولا الكندرة ( أحياء شعبية) وكثير عليك بعد!! .. يا مال الطاعون !! .. عشنا وشفنا .. علة بنت أبو علة تبي تسكن بالشيراتون واللي على البحر بعد؟! .. علة : مدحت!!! .. أقولك وقف!! .. ولا ترى ....!!!!!..

مدحت بكل خوف : طيب .. حاضر هدي أعصابك!! .. بدون استخدام العنف أرجوك!! .. يوقف مدحت السيارة الوانيت أمام باب الفندق وينزل لكي يستفسر من موظف الاستعلامات عن أسعار الغرف .. فتحت علة باب السيارة ونزلت منها لترافق مدحت إلى الداخل ..

مدحت : وين رايحة يا علة؟! .. علة : أبي أتفرج على الغرف!! .. مدحت : خلاص قررتي ونفذتي؟!..انطقي بالسيارة لا أحش رجولك حش!! .. علة : يعني تبغاني أنتظرك بالسيارة وإنت تدخل تتفرج على كيفك.؟! .. لا يا حبيبي رجلي فوق رقبتك!! .. بأنزل يعني بأنزل غصبا عليك!! ..تفتح علة باب السيارة وتنزل منها ثم تغلق الباب بعنف!! .. ومدحت لا يستطيع أن يفعل شيئا أمام هذا التمرد والعصيان!! ..

يسلم مدحت أمره لله ويدخل مع علة إلى بهو الفندق وأثناء الدخول تقول له علة : مدحت يا مدحت!! .. مدحت بنفاذ صبر : الله ياخذ مدحت ويريحه من ها العذاب .. نعم يا علة؟! .. علة : هذا مو الفندق اللي سكن فيه دب بس سريع قبل ما يروح سوريا؟! .. مدحت: ومن هو دب بس سريع هذا؟! .. علة : هذا عضو في منتدى العرب المسافرون كتب عن رحلته لسوريا وسكن في الفندق هذا قبل ما يروح!! .. مدحت : إيه تذكرته بس هو ما سكن في الشيراتون .. سكن في الهيلتون!! .. وبعدين تعالي هنا!! .. وإذا دب بس سريع سكن فيه خلاص يعني صار الفندق مشهور!! .. لا تقولين لي بعدين إن استيف استون سكن فيه !! ..

علة : ومن هو استيف اوستن يا مدحت؟! .. مدحت : استيف اوستن هذا كان طيار حربي وطاحت فيه الطيارة وتكسرت عظامه وصار سلطة!! .. بس هم أعادوا بنائه من جديد وركبوا له عظام صناعية وصار يركض أسرع من نسيم نجد!! .. وعيونه شالوها وحطوا عيون اصطناعية صار يشوف لين حجم الخط رقم واحد في لوحة التحكم بالمنتدى!! .. ويقدر يطب من فوق العمارة من غير ما يصير له شيء .. مثل عدنان يوم إنه شال لينا ونط من القلعة هو وإياها علشان الكبتن نامق ما يمسكه .. ووصل الأرض وهو صاغ سليم!! ..

علة : مدحت!! .. يا مدحت !! .. باقول لك شيء بس لا تزعل ؟! .. مدحت : قولي وخلصينا!! .. علة : نسيت تعطي بواب الفندق المفاتيح علشان يوقف السيارة الوانيت في المواقف لين ما نرجع مثل ما يسوا في الأفلام!! ..

مدحت : وإش عليه يا علة!! .. حضرتك بنت المهراجا إنت ووجهك!! .. أصل إنتوا ما عمركم طبيتوا فنادق قبل كذا!! .. الحين تبين تفردين عضلاتك على البواب ؟! .. زين من إدارة الفندق إن هم سمحوا لنا نوقف ونيتنا قدام البوابة وما طردونا حنا والونيت اللي راكبينه!! ..

يصل مدحت وعلة إلى موظف الاستقبال ويبدأ مدحت بالسلام ويقول : لو سمحت كم أسعار الغرف عندكم ؟! .. موظف الاستقبال : أكيد عاوز سويت أو دبل روم إنت والمدام!! ..مدحت : لا سويت ولا دبل رووم!! .. أنا أسأل عن قيمة الغرفة المفردة كم تعطينا إياها لو أخذنا غرفتين؟! ..

موظف الاستقبال في تعجب : هو حضرتك عاوز غرفتين سنقل؟! .. مدحت : إيه غرفتين سنقل .. يا مدهول!! .. إنت وش اللي دخلك؟! .. أنا والمدام كل واحد بينام في غرفة بلحاله!! .. أنا ما أشوف فيها أي نوع من الغرابة .. حنا متعودين على كذا من ثلاثة أشهر!! .. يالله خلصنا وبلاش بربرة على الفاضي!! ..

موظف الاستقبال : حاضر يا افندم زي ما إنت عاوز!! .. الغرفة السنقل قيمتها 680 ريال في الليلة وعلشان خاطرك بنسويلك خصم خاص للعرسان الجدد ونديهالك ب450 ريال بس!! .. غرفتين سنقل رووم بتسعمية ريال .. ما فاضلش إلا غرفتين أحجز هم لك ؟! ..

علة تهز مدحت بعنف : مدحت .. يامدحت؟! .. مدحت : وش فيك يا مال البلا كسرتي لي عظامي من كثر ما تنغزين فيني!! .. وش تبين؟! .. علة : إسأله يا مدحت الغرفة فيها حمام جاكوزي؟! .. مدحت بكل غضب : وهذا وقت جاكوزي ؟! .. إنت ما تيوزي عن سوالفك هذه؟! .. وش جاكوزي يا الهبلة ؟!.. من وين تعرفين الجاكوزي وإنت ببيتكم كنت تتسبحين في سطل!! ..


مدحت مخاطبا موظف الاستقبال : ممكن نشوف الغرف بالأول ؟! ..موظف الاستقبال : آه أوي .. أوي!! .. تفضلوا معايا .. علة بكل حماس : يالله يا مدحت عجل أبي أشوف الغرفة!! .. بسرعة ما ني قادرة أصبر!! .. قول له نبيها تطل على البحر!! .. وفيها ثلاجة وتلفزيون ملون وروب حمام ونعول حمام مثل اللي جابها المنقلب من رحلته للمغرب!! .. وما نبي الغرفة بمكيف صحراوي قول له يا مدحت نبي مكيف سبيلت!! .. أو تكييف مركزي!! .. وقول لهم كمان يجيبون لنا على الفطور انتركونتننتل .. يقولون إن كل الفنادق عندهم فطور انتركونتننتل!!

مدحت: حسبي الله على شيطانك!! .. إنت وين كنتي عايشة؟! .. التلفزيون الأبيض والأسود في بيت أبوك بس !! .. لكن الناس الحين كلها عندها تلفزيون ملون!! .. جعلهم يربطونك بروب الحمام ويرموك من أعلى دور يمكن أفتك منك يا علة!! .. ما أدري مين وين جايبتها ها الانتركونتننتال؟! ..

يصل مدحت وعلة إلى الغرفة وتدخل علة وتقفز على السرير كالأطفال!! .. مدحت : إنزلي يا علة فضحتينا !! .. ما عمرك شفتي سرير؟! ..سرير غرفتنا اللي في الرياض وين راح؟! .. أنا نفسي ما نمت عليه وتركته لك!! ..علة : سرير الفندق غير يا مدحت!! .. وش زين الغرفة!! .. وفيها تلفزيون ملون!! .. شف شف يا مدحت!! .. فيه راديو بجنب السرير!! .. وزر يولع اللمبات!! ..

تذهب علة باتجاه النافذة وتفتحها على مصراعيها وتأخذ شهيقا عميقا وتزفره مرة واحدة .. ثن تنظر إلى الأسفل وتشاهد مسبح الفندق وتقول : مسبحهم كبير يا مدحت!! .. ليش ما أخذت لنا غرفة بوسط المسبح؟!







ِ

مدحت يهز راسه ولا يقول شيئا وهو يضرب كفا بكف!! .. تدخل علة إلى الحمام وتتجول فيه وتلعب بالاستشوار وتتأمل نفسها في المرآة!! .. وتفتح الدش .. ثم تغلقه .. ثم تفتحه .. ثم تغلقه!! .. ثم تفتح الثلاجة وتتأمل العصائر الموجودة .. وبعد ذلك تقول: مدحت .. مدحت!! .. خلاص رح جب الشناط ما ني نازلة!! .. الغرفة عاجبتني!! .. مدحت : هو بكيفك يا علة!! .. قومي خلنا ندور على شقق مفروشة أحسن!! .. وش هو له ندفع تسعمئة ريال على غرفتين ؟! ..

علة : ما راح اتحرك من مكاني يا مدحت! .. قلت لك رح جيب الشناط انا تعبت خلاص وودي أرتاح!! .. مدحت : بس ياعلة!! .. ترى المو.....!! .. علة : مدحــــــــــت!! .. مدحت : خلاص طيب على أمرك!! .. أمري لله .. رايح أجيب الشناط وبكرة نكمل جولتنا في جدة ونتعرف على أهم معالمها ..

مدحت وعلة وإفطار الكونتننتال ورحلة في بعض متاحف مدينة جدة!! ..



استيقظ مدحت باكرا وطرق الباب الفاصل بين غرفته في الفندق وبين غرفة علة طرقا خفيفا فجاءه صوت علة من الداخل ...

علة : مين ؟! .. مدحت : يعني بيكون مين يا علة ؟! .. خدمة الغرف؟! .. أكيد أنا زوجك المبتلى بك!! .. غرفتي وغرفتك يفصل بينهم باب يعني ماراح أحد يدق عليك الباب إلا أنا .. قومي صلى .. الفجر أذن!! ..

علة : طيب يا مدحت .. بس ثاني مرة دق الباب بشويش!! .. مدحت : وأنا وش مسوي؟! .. داق الباب بشاكوش؟! .. يا بنت الناس حرام هذا التعذيب اللي إنتي جالسة تسويه فيني!! .. بالله عليك هذا شكل عرسان توهم متزوجين؟! .. أنا بغرفة وإنت بغرفة وبيننا باب ؟! .. أنا اعتبر نفسي متزوج مع وقف التنفيذ!! .. الله لا يبتلى مسلم ببلوتي!! .. كفاية بربرة فاضية وقومي صلى علشان نفطر ونطلع نتمشى في جدة شوي .. الجو حلو والتمشية في الصباح وش زينها ..

علة : زين .. زين .. لا تصارخ!! .. رح إنت صلى لين ما أنا اتوضأ وألبس مسفعي وعبياتي ونفطر سوا!! .. مدحت : صبر جميل والله المستعان!! ..


تفتح علة الباب الذي يفصل بين غرفتها وغرفة مدحت وتقول له : إتفضل يا مدحت يا أحلى وأرق زوج بالدنيا .. مدحت : وش ها التغيير اللي جاك يا علة ؟!.. أول مرة أسمع منك كلمة حلوة من يوم ما تزوجنا!! .. علة : وش رأيك فيني يا مدحت؟! .. ما تحس إن فيني شيء متغير؟! .. مدحت : والله يا علة ما أشوف فيه أي شيء!! .. علة : ركز يا مدحت .. شوف زين .. ما لاحظت أي تغييرات على لبسي؟! .. مدحت : أي لبس يا بنت الناس أنا شايف وحدة لابسة عبايتها وحاطة غطوتها على وجهها!! .. أي تغيير؟!

علة : يوه يا مدحت!! .. صدق إنك اعمى وما تشوف!! .. طالعني زين!! ما تلاحظ إن عبايتي مغسولة!!!! .. مدحت : حسبي الله ونعم الوكيل!! .. يعنى هذا اللي طلع منك؟! .. غسلتي عبايتك؟! .. جعلهم يغسلونك ويكفنونك بصوف وافتك منك!! .. لك ساعة تلمحين وتلفين وتدورين مثل عارضات الأزياء وفي الأخير غاسلة عبايتك؟! .. هذا الله فلحت فيه؟! .. الزوجة تلبس وتتزين لزوجها وإنت غاسلة عبايتك؟! .. أنا اللي غاسل يدي منك!! .. روحي منك لله يا ظالمة!! ..

علة : أصبحنا واصبح الملك لله!! .. يالله صباح خير .. هذه طريقة الواحد يبدأ فيها يومه؟! .. يا أخي جاملني شوي!! . أنا زوجتك مني بنت الجيران!! .. يالله يا حبيبي يا مدحت إطلب لنا فطور إنتركونتننتال خلنا نفطر قبل ما نطلع!! .. مدحت : إنت للحين معلقة على الانتركونتننتال؟! .. يا بنت الناس قلنا لك اسمه كونتننتال .. وليس إنتركونتننتال .. وش جاب الإنتر .. للشيراتون ؟! .. وبعدين لا يغرك الإسم!! .. ترى فطور الكوننتنتال زبدة ومربة وعصير وشاي!! .. وش تحسبين فطور الكونتننتال؟! .. مفطح؟! .. علة : ما علي منك أبي أجربه .. إنت وش اللي دخلك إطلب فطور انتركوننتنتال وما عليك مني!! ..أعوذ بالله .. إنت اللي تبي تاكله ولا أنا؟! .. عجيب والله!! ..

يتصل مدحت بخدمة الغرف ويطلب إفطار كونتننتال لعلة .. فيما يكتفى هو بكوب من الشاي بالنعناع ويطلب من إدارة الفندق أن يكون الشاي في جلاس جبن!! .. يأتي الفطور وتبدأ علة بالأكل بصوت مرتفع وهي تضع اللقمة في فمها من تحت الغطاء!! .. ومدحت يراقبها ويتحسر على عمره اللي راح يضيع مع هذه الزوجة التي لا تريد أن تقتنع بأن كشف الوجه مباح للزوج والمحارم!! .. يرفع مدحت كوب الشاي بالنعناع ويرشف منه رشفات وهو يرنو ببصره إلى بعيد مستذكرا أحداث الأيام الخوالي عندما كان يعتقد أن الزواج راحة وأسرة واستقرار!! .. أخذ مدحت يراقب علة من طرف خفي وهي تأكل فالتفتت إليه وقالت : خير إن شاء الله يا مدحت ؟! .. وش فيك تطالعني؟! .. مدحت : لا أبدا ما فيه شيء .. أنا جالس أندب حظي!! .. يالله قومي خلنا نطلع نتمشى شوي حاس إني راح أختنق!! ..

ركب مدحت وعلة السيارة الوانيت وتوجها نحو وسط المدينة ..

علة وهي تراقب الأبنية من خلال نافذة السيارة وتقول : مباني جدة القديمة جميلة يا مدحت .. وما زالت محافظة على روعتها رغم كل هذه السنين!! .. مدحت : صحيح يا علة .. يتميز الطراز المعماري للأبنية القديمة في جدة بجمال خاص .. لا حظي طريقة تصميم النوافذ ..

علة : مدحت .. سمعت إن فيه متحف كبير اسمه متحف عبد الرؤوف خليل وش هو هذا المتحف يا مدحت ومن هو عبد الرؤوف خليل؟! .. مدحت : عبد الرؤوف خليل يا علة هو مقتني شهير للعاديات والآثار جمع كل التحف اللي يملكها في عدة مباني مبنية على الطراز القديم لكن المتحف احترق منذ فترة وقد فقد معظم محتوياته الفنية والآثرية وقدرت خسائره آنذاك بمليار ريال سعودي.. لكنه رجع واعاد ترميمه من جديد فجدد الواجهات الخارجية للجناح الغربي والذي نجا من الحريق وهو الجناح الذي يضم بعضاً من الآثار والتراثيات المحلية والعربية، بينما أزيلت معالم الأجنحة الأخرى التي التهمتها النيران، ونصبت بدلاً منها مظلات من الخرسانة المسلحة..

ومع الأسف يا علة أن مئات من القطع الأثرية والمنحوتات الخشبية النادرة قد التهمتها النيران، ومن الصعب جداً العثور على مثيل لها في أي مكان في العالم، وكانت قيمتها الحقيقية هي في ندرة وجودها وتاريخها العريق .. علة : والله خسارة يا مدحت إن متحف مثل هذا تلتهمه النيران كان من المفترض أنهم يحطون وسائل للسلامة من الحريق لكن الحمد لله على كل حال..

بعد جولة سريعة بالسيارة في وسط المدينة اقترح مدحت على علة أن يزورا متحف قصر خزام ..علة : وش هو متحف قصر خزام هذا يا محت؟! .. مدحت : متحف قصر خزام يا علة يعتبر من المعالم التاريخية المهمة في مدينة جدة لكونه مسكنا لمؤسس المملكة وموحدها الملك عبدالعزيز بن عبدالرحمن آل سعود -رحمه الله- وكان شاهدا على أحداث كبيرة لها أثرها في البلاد .. ويقع المتحف في قصر خزام بحي النزلة اليمنية جنوب الكلية التقنية بمحافظة جدة وقد وضع هذا المتحف في القصر الذي بدأ بناؤه عام 1347هـ واكتمل في عام 1351هـ وقد أمضى الملك عبدالعزيز طيب الله ثراه جانباً من حياته العملية في هذا القصر واستخدمه ديواناً يستقبل فيه ضيوف الدولة وكبار المسؤولين وعامة الشعب, ويعد القصر طرازاً معمارياً لمباني جدة في فترة مبكرة من التطوير المعماري والفني المرتبط بالقواعد السياسية والتنظيمية للدولة .. وقد شهد هذا القصر توقيع اتفاقية الامتياز للتنقيب عن البترول بين حكومة المملكة وشركة ستاندرد أويل أوف كاليفورنيا في 4 صفر 1352هـ الموافق 29 مايو 1933م..

























علة : الله يا مدحت .. ياترى مسموح إن حنا نتفرج على القصر اللي يقع خلف المتحف ؟! .. مدحت : أنا أذكر أنني جيت هذا المتحف قبل كذا يا علة وكان مسموح التجول فيه لكن ممنوع التصوير .. بصراحة يا علة تستغربي وش لون إن القصر بارد رغم أن ما فيه مكيفات .. كمان أسقف القصر مرتفعة جدا مما يعطي شعور بوجود تيارات هوائية على الدوام!! .. يمكن مع الهواء يرتفع المسفع عن وجهك وأشوفك ونخلص!! .. علة : لا تخاف يا مدحت .. أنا حاطة المسفع ثلاث طبقات!! .. مدحت : يا الله تصبرني يا رب العالمين!! ..


إلى اللقاء في الحلقة القادمة .. ونراكم على خير

متحف مدينة الطيبات وأسئلة علة التي لا تنتهي!! ..


بعد أن تجول مدحت وعلة في متحف قصر خزام خرجوا باتجاه أحد المطاعم ليتناولوا طعام الغداء .. وهنا سألت علة مدحت السؤال التالي :

علة : مدحت .. يا مدحت!! .. مدحت . محدت!! .. يا مدحت!! ..
مدحت : وجع يوجعك يا علة!! .. وش شايفاني أصقه ما أسمع؟! .. ما يحتاج تكررين اسمي كل شوي!! .. كرهت اسمي من كثر ما اسمعه منك على الفاضي والمليان! .. وش تبين؟! ..

علة : جدة فيها كم متحف يا مدحت؟! .. مدحت : اللي أعرفه إن جدة فيها متحف اسمه متحف أمانة جدة .. ومتحف مبرة الطيبات أو مدينة الطيبات للعلوم والمعرفة .. ومتحف الفنان طارق عبد الحكيم .. ومتحف كلية عالم البحار .. ومتحف بيت نصيف .. ومركز جدة للعلوم والتكنولوجيا .. ومتحف الفنان الدكتور عبد الحليم رضوي .. بالإضافة إلى متحف قصر خزام ومتحف عبد الرؤوف خليل ..

علة : طيب يا مدحت أنا سمعت إن فيه متحف اسمه جنغل لاند في قرية مرسال!! .. مدحت : عقلك يا علة هو متحف بلحاله!! .. وش دخل قرية مرسال في المتاحف؟! .. قرية مرسال عبارة عن مدينة ملاهي!! .. لكن الله يخلف على ثقافتك العالية!! ..

علة : يا الله منك يا مدحت!! .. ما تبطل تهزئني وتعايرني بقلة ثقافتي كل شوي!! .. شوف تلفريك وش يقول!! .. مدحت : تلفريك ؟! .. ومن هو تلفريك هذا ووين ساكن ؟! .. علة : ما عمرك سمعت بتلفريك يا مدحت اللي يكتب في منتدى العرب المسافرون؟! .. هو ماله مكان محدد لكن مكتوب تحت اسمه تلفريك معلق في الهواء!! .. مدحت : الله ينزله بالسلامة!! .. ترى التلفريك إذا علق بالهواء مشكلة!! .. أنا أعرف واحد علق فيه التلفريك جلس نص ساعة لين ما نزلوه!! .. ما علينا .. ما قلت لي يا علة وش دخل تلفريك بالموضوع اللي جالسين نتكلم فيه الحين؟! ..

علة : تلفريك يا مدحت يقول : لماذا لا نعّود أنفسنا وأبنائنا على زيارة المتاحف والآثار القديمة ، والجامعات ، والمراكز العلمية ، والمصانع ؟ هل أبقينا أثراً طيباً أثناء وبعد سفرنا ؟ .. ألم يحن الوقت للاستفادة من إجازاتنا ؟! .. هل خططنا لرحلتنا وإجازتنا القادمة لنتفادى السلبيات التي وقعنا فيها ؟
هل نحن سياح أم مجرد مسافرون ؟؟؟؟

مدحت : ما شاء الله تبارك الله!! .. من متى ها الثقافة وسعة الاطلاع ؟! .. ومن متى جالسة تتابعي منتدى العرب المسافرون؟! .. والله وطلعت منتي هينة أبد يا علة!! ..

علة : إنت يا مدحت اللي محتقرني علشانك ما بعد شفت وجهي للحين لكن العلم والثقافة في الدماغ مو في الوجه!! .. وعلى ذكر المتاحف ما قلت لي يا مدحت وش هو متحف مدينة الطيبات للعلوم والمعرفة هذا ؟! .. اسمه كنى سامعته قبل كذا!! .. مر علي ها الاسم بس ما أدري وين؟! .. أنا متأكدة إنه مار علي!! .. إي تذكرت .. مطعم الطيبات اللي بجنب بيتنا بالرياض .. يا هو عنده كنافة بالجبن تهبل!! .. والشاورما اللي يسويها طيبة بالحيل!! ..

مدحت : أنا قايل لك من زمان اللي في راسك هذا ساندويتش مخ بالبيض مو مخ!! .. توك من شوي قايلة كلام كبير عن الثقافة وسعة الاطلاع وتلفريك قال .. وتلفريك فعل .. والحين تقولين لي إن متحف الطيبات هو مطعم بجنب بيتكم؟! .. يا حسافة على عمري اللي باقضيه معاك!! .. أنا وش اللي خلاني أتزوج؟! .. كان جلست عزابي مثل كابيان أسافر متى ما بغيت وأنام متى ما بغيت وأروح على كيفي وآجي على كيفي .. لكن ما نقول إلا وعسى أن تكرهوا شيئا وهو خير لكم وحسبي الله ونعم الوكيل ...

متحف مدينة الطيبات يا علة يا بنت أبو علة ليس متحفا بالمعنى المعروف للكلمة لكنه عبارة عن مدينة تراثية بنيت على أرقى طراز لكي تكون مرآة للماضي وتجسيدا للفنون المعمارية العربية والاسلامية .. ويقع هذا المتحف ياعلة في شارع الستين بجدة ويحتوي على تراث هائل من الفنون والثقافات والمقتنيات والآثار .. علة : ومين اللي بنى هذه المدينة يا مدحت ؟! ..








مدحت : من العجيب أن صاحب فكرة هذه المدينة هو نفسه الشيخ عبد الرؤوف خليل اللي انحرق متحفه قبل ثلاث سنوات .. بدأت عملية إنشاء هذه المدينة يا علة عام 1987م، وانتهت جميع الأعمال وتم الافتتاح عام 1996م، وتقع على مساحة عشرة آلاف متر مربع، وتتكون من 12 مبنى، وتختلف ابنية المدينة التي يبلغ عددها 12 مبنى متفاوتة الأحجام من حيث الارتفاع فهناك أبنية ذات طابق واحد، وأخرى بطابقين، ثم بثلاثة طوابق فأربعة والمبنى الرئيسي هو أضخم أبنية المدينة ..









علة : طيب معقول يا مدحت إن عبد الرؤف جميل بعد اللي صار في متحفه له خلق يبني متاحف ثانية؟! .. مدحت : الرجل هذا يا علة جعل هدفه الحفاظ على التراث وتقديمه للناس!! .. طبعا أنا أتحدث عن الناس اللي يفهمون في المتاحف والتراث مو مثلك يا علة!! .. علة : وش ها التحطيم يا مدحت .. ليش أنا ما أفهم في التراث؟! .. لأ يا محت أنا أفهم في التراث وفي الكراث بعد!! .. وش سوى عبدالرؤوف في الكراث!! .. أقصد وش سوى بعد كذا؟! ..

مدحت : كان مؤسس المتحف الشيخ عبدالرؤوف خليل قد تعرض العام الماضي إلى مأساة احتراق متحفه الخاص في جدة الذي مضى على إنشائه عشرون عاما والذي بناه بكل الجهد والعطاء ليكون واحدا من أهم المتاحف الخاصة والعامة في المملكة وخارج المملكة وكان المتحف المنكوب يحتوي على آلاف القطع الأثرية والتاريخية والتراثية التي تمثل مختلف العصور الإنسانية وبعضها يرجع إلى بداية نشوء الحضارات على الأرض وتقدر محتويات المتحف المحترق بملايين الريالات مثل ما سبق وحدثتك وإن كان مثل هذا العمل لا يقدر بثمن لأنه تراث إنساني وعالمي ..









علة : غريب إن هذا ما أثر فيه وخلاه يواصل بناء مدينة الطيبات!! .. مدحت : صحيح يا علة فلقد واجه الشيخ عبدالرؤوف خليل المأساة بشجاعة وخرجت الصحف السعودية حينها بمانشيتات عريضة منها (احتراق تاريخ وتراث إنساني لا يقدر بثمن).. لكنه واصل العمل وخاصة إن ابنه خالد عبد الرؤوف واصل تحقيق رغبة والده وكان السند بعد الله ..

والشيء العجيب يا علة إنه دونت على جدران المدينة معلومات علمية بطول كيلو متر واحد وتتناول تاريخ الجزيرة العربية منذ مليون وثلاثمئة ألف سنة حتى اليوم!! .. مع إضافة كل جديد في العلوم العصرية بما في ذلك علوم القرآن والعلوم غير المعتادة وغير المطروحة من قبل أو في أماكن أخرى وبعض هذه المعلومات مدون باللغة الإنجليزية ليطلع عليها غير الناطقين بالعربية .. كان من المفترض يا علة أن ينتهي بناء المدينة في سنتين لكنه استغرق قرابة سبع سنوات في البناء والتجهيز ..









علة : على كذا يا مدحت رسم الدخول بيكون عالي بالمرة!! .. مدحت : تصدقي يا علة إنه بالرغم من أن مؤسس المدينة جعل رسم الدخول مناسبا وهو ثلاثين ريالا للفرد تخصص لدعم الفقراء والمحتاجين إلا أن المدينة تعاني من قلة الزائرين!! ..

علة : تدري يا مدحت لو يقيمون حفل غنائي بها المدينة لشعبان عبد الرحيم كان يدخل صاحب المدينة دخل مو بسهل!! .. مدحت : حفل غنائي في متحف؟! .. ولشعبان عبد الرحيم؟! .. حنا ناقصين يا علة عاهات!! .. كفاية علينا علة!! ..

علة : وش تقول يا مدحت؟! .. مدحت : ما أقول شيء .. يالله إنزلي خلينا نتغدي .. ترانا وصلنا المطعم!!
علة : أبغى غذاء كوننتننتال يا مدحت!! .. مدحت : يا حسافا على اللي متزوج وحدة مثلك!! .. ما أظن إن فيه أحد بالعالم مبتلى بالمصيبة اللي أنا أعيش فصولها حتى هذه اللحظة!! .. خلاص يوم عرفتي فطور الكونتننتال .. صار الغداء والعشاء عندك كونتننتال؟! .. امشي انجري قدامي لا أرتكب فيك جريمة !! ..

نواصل معكم اليوميات فيما بعد ... وتصبحون على خير!! ..

ملاحظة : بعض المعلومات المتعلقة بمتحف الطيبات تم اقتباسها من صحيفة الوطن بتصرف لذا جرى التنويه .. كما ان الصور الواردة أعلاه مأخوذة من شبكة الانترنت!! .. هذا للمعلومية ودمتم ...