من يوميات مدحت وعلة في رحلتهم المكوكيه حول العالم .. استمتعوا بالمغامرة

ملاحظة قبل قراءة هذه الرحلات :


سوف تسافرون معنا أيها الإخوان والأخوات في رحلة حول العالم بصحبة مدحت وعلة نزور فيها عدة بلدان .. والهدف من هذه الرحلات هي محاولة حل العقدة التي تشكي منها علة والتي سوف تتعرفون عليها بعد قليل .. الحلقات قد تطول .. ولكنها لن تكون مرتبطة ببعضها البعض .. فكل حلقة سوف تكون مفصولة عن الأخرى وإن كان هناك خيط يربطها جميعا ..

سوف نقرأ معا كيف تعرف مدحت على علة وما الذي إكتشفه مدحت بعد أن تزوج منها؟! .. وماهي المغامرات التي واجهاها معا؟! .. سوف نصطحبهم في رحلتهم حول العالم .. ونتابع خلافاتهم مع بعضهم البعض لنحدد من منهم على صواب ومن منهم على خطأ!! .. سوف تكون هذه الرحلة مكتوبة بالفصحى حينا وبالعامية حينا آخر .. ومن يدري ؟! .. قد تحبون مدحت وعلة وتستمتعون بالسفر معهم والتعرف على ما سوف يلاقونه في رحلتهم تلك ولكن قبل ذلك سوف تقرءون معنا كيف خطب مدحت علة وما الذي دار بينهما في أول ليلة زواج وما الذي حصل عندما ذهبا معا إلى مكة المكرمة لأداء العمرة وما هي ملابسات محاولة قتل علة التي قام بها مدحت في طريقهم إلى جدة وكيف تطورت الأمور إلى التفكير في رحلة حول العالم!! ..

تابعوا معنا هذه المغامرة في العرب المسافرون لكي نستمتع معا بالتفاصيل ونتعرف على بعض الأماكن في بلادنا المملكة العربية السعودية ودول الخليج والبلاد العربية وبقية دول العالم!! .. وبمعنى آخر سوف ينتقل مدحت وعلة إلى كل بوابة من بوابات العرب المسافرون!! .. ويزورون كل بلد في هذه البوابات!! ..

سوف تكون مغامراتهم طويلة .. شيقة .. مرحة .. متعبة .. وأيضا مفيدة!! .. فتابعوها معنا أيها الأعضاء ولا تتسرعوا في الحكم على مدحت وعلة ولا تنحازوا إلى طرف على حساب الطرف الآخر!! .. واتركوا الحكم لآخر حلقة من هذه المغامرات ..

والآن إلى أولى الحلقات مع مدحت وعلة في رحلتهم حول العالم ...

--------------------------------------------------------------------------------

بداية التعارف وعقد القرآن ..


كان مدحت أنسانا بسيطا تشع البراءة من أنفه وأذنيه وتنطفأ إذا وصلت إلى عينيه!! .. لكم حاول والداه أن يشجعاه على الزواج واتمام نصف دينه .. ولكنه كان في كل مرة يتعذر بأعذار واهية إلى أن أذعن للأمر الواقع ذات يوم غابت شمسه وأعلن موافقته على هذا الشر الذي لا بد منه!! ..

فرحت أمه فرحا شديدا حتى كاد أن يغمى عليها .. واتصلت بالخطابة التي رشحت له امرأة بارعة الحسن والجمال اسمها علة!! .. ولكنها أخبرت أم مدحت بأن عادات أهل علة أن لا يرى الخطيب وجه زوجته حتى بعد أن يعقد عليها وأن هذا هو شرطهم الوحيد بالإضافة إلى المهر البالغ مائة ألف والشبكة والهدايا لأهل العروس والشقة والأثاث ومصاريف الحفل في أفخم الفنادق وخمسين أسورة من الذهب الخالص عيار أربع وعشرين لأم العروسة وسيارة لأبو العروسة إضافة إلى تكاليف الزواج الأخرى البسيطة والتي يقدر عليها كل شاب محدود الدخل مقبل على الزواج!!!! .. وأمام فرح الأم وحرصها على سرعة إتمام مراسم الزواج قبل أن يغير مدحت رأيه أعطت موافقتها للخطابة على كل هذه الشروط .. كانت أم مدحت ترى بأن خير الجريش!! .. أقصد خير البر عاجله!! .. وافقت على كل شروط الخطابة بما فيها المهر هذا عدا عن التلبيسة والرشرش والهدايا .. وتكاليف العرس ستكون على أهل الزوج أيضا لأن علة كما يقال ملكة جمال والمهر الغالي للغالي!! ..

وقع مدحت في حب علة دون أن يراها من كثرة ما حدثته أمه عن جمالها وعقلها والغريب أن أم مدحت لم تر عروس ابنها لأن من عادات أهل العروس أن لا يرى العروس أي أحد حتى من أقاربها وإخوانها وأخواتها فضلا عن النساء الأجانب!! .. تم تحديد موعد عقد القران وذهب مدحت ووالده لإتمام مراسم الخطبة وعقد النكاح .. وبعد أن دفع المهر وعقد القرآن اتصل مدحت بعروسه في اليوم التالي ليحدثها بالهاتف المحادثة الأولى ..

مدحت : كيفك يا حبيبتي ؟! .. وش لونك يا علة فؤادي ؟!.. يا كبدي الذي يمشي على هذه الأرض!! ..

علة : والله إنت اللي بطيت كبدي يا مدحت!!.. جالس تستمع إلى برنامج سلامتك .. وأطفالنا أكبادنا تمشي على الأرض ؟! .. الحين هذه عبارات واحد يقولها لزوجته قبل الفرح ؟!.. كيفك .. وش لونك ؟! .. ليش إنت جالس تكلم الوالدة ؟! .. ما درستوا في المدارس شعر الغزل وقيس وليلى ..وجميل بثينة ؟! .. ألم تقرأ روايات روميو وجوليت؟! .. يا مال العمى!! .. صحيح إننا كتبنا الكتاب واصبحت زوجتك على سنة الله ورسوله لكن هذا لا يعني أن تخاطبني بهذا الاسلوب!! .. أين الكلمات الحلوة ؟! .. أين العبارات الرقيقة ؟!

مدحت : رويدك .. رويدك يا حبيبتي يا علة .. لا تستعجلين علي .. تونا أمس مملكين .. وأمس بس اللي قدرت أشوف عبايتك!! .. أبوك يالله بالقوة رضي إني أطل عليك طلة ووالله إني ما ثنيتها.. أصلا أنا ماشفت قدامي إلا وحدة لابسة العباية .. وقال لي أبوك هذا أنت شفتها !! .. ورجعت المجلس ودفعت المهر.. هذا وأنا جايب معي المهر .. أجل لو جاي ويديني فاضية وش كان بيسوي ؟! .. حتى ما مداني أعرف إن كنت لابسة فستان أحمر ولا أخضر ؟! ..

علة : أخضر ولا أحمر ؟! .. ليش شايفني إشارة مرور ومكتوب عليها ممنوع العبور ؟! .. هل تريدني ان أقدم لك الشربات وأنا لم أعلم بأني مخطوبة وانكم كتبتم العقد عند الشيخ إلا عندما طلب مني أبي أن ألبس عبايتي وأوقع على الدفتر .. ومن زود الدلاخة ( كلمة عامية بمعنى الجهل) وقعت على بياض وأنا مدري وش السالفة ؟! .. ما دريت إلا وأهلي يزغردون ويقولون مبروك عليك يا علة عريس الهنا!!

مدحت : الحين يا علة أبوك لاهف مني مية ألف عدا ونقدا وإنتي ما تدرين وش السالفة ؟! .. ومن زود الكرم صب لي فنجان مويه حارة ويوم خلصت هز الفنجال بدالي وحطه على الصينية!! .. قبحه الله حتى المويه الحارة يبخل بها على الضيوف ؟! .. بدل ما تصب لنا قهوة أو شربات تصب مويه حارة لأنها أرخص!! .. وأبوي يوم شاف اللي صار قالي خلنا نمشي إذا كان هذا أوله ينعاف تاليه .. لكني أصريت وقلت لا يا يبه ما أقدر .. أنا خلاص حبيتها .. مئدرش أعيش من غيرها!! ..

علة بكل دلال : صحيح يا مدحت ما تقدر تعيش من غيري ؟! .. إيه الحين بديت تفهم يا الأثول!! .. هذه بداية طيبة .. واصل يا بعد عمري .. كمل .. كمل خليني أسمع الكلام الحلو ..

مدحت وقد تهللت أساريره : إيوه يا علة ما أقدر أعيش من غيرك .. إنت بابا وإنت ماما وإنت كل شيء في حياتي!! ... نجوم الظهر أقربلك .. روح يا واد اندهه للعمدة وشيخ الخفر .. الجوازة دي مش لازم تتم .. إتفضل يا رأفت إدخل وقل لي أخبار العقود إيه .. الراجل إدالك الفلوس ؟! .. سلم نفسك يا عتريس البيت كله محاصر!! .. يا جملات إفتحي للمكوجي أصل ليه ساعة ملطوع بره .. بابا أنا عاوزه أروح النادي .. إنت بترشيني يا سمير ؟! .. بعد العمر ده كله آخذ رشوة ؟! .. أنا الزناتي خليفة آخذ رشوة أنا ؟! ... إلحقوني يا ناس البنت عاوزه ترمي نفسها من الشباك!! .. بس يا فيفي الشقة ما خلصتش لحد دولقتي والمعلم لاهط مني ألف جنيه خلو رجل من امبارح!! ..

علة : مدحت إنت فاتح التلفزيون ؟! .. وش السالفة؟! ..

مدحت وقد انتبه : ها .. ماذا ؟! ..

علة : وش اللي صاير بالع راديو ؟! .. إنت جالس تسمعني كلام حلو ولا جالس تسمع لي إنشودة!! .. يا أخي بطل الغش .. فكر وإنت تغش مو تعيد لي مقاطع حافظها من المسلسلات!! .. لو أدري إني بأتزوج واحد لا يعرف كيف يخاطب زوجته كان ما أخذتك!! .. الحين قلت زوجي مدحت بيسمعني كلام حلو في التلفون تروح تسمع لي مسلسلات؟! ..

مدحت وهو يحاول يلملم الموضوع : آسف يا علة .. أنا كنت أحسب إن المقاطع هذه عبارت رقيقة يتبادلها المتزوجون حديثا!! .. وجلست كم شهر علشان أحفظها ما دريت إنها مالها علاقة بموضوعنا .. ولا يهمك يا حبيبتي من الحين ورايح بأبدأ أقرأ كل أشعار الغزل علشان أسمعك كلام حلو وترضين علي يا علتي في ها الدنيا!!

علة : على العموم أنا الحين بأقفل السماعة .. سديت نفسي عن الكلام ..الله ياخذك ويريحني منك!! ..

مدحت : يا سلام على الرقة والنعومة!! .. هذا وحنا ما بعد سكنا في بيت واحد يا علة .. علة يا حبيبتي عودي إلي .. علللللللللللللة!! .. وأغلقت علة السماعة وذهبت لتتابع برامج الأطفال!!

مدحت وعلة ودخول القفص الحديدي .. أقصد الذهبي!!


دخل مدحت غرفة الفندق وهو لابس البشت وكاشخ وماسك يد علة بعد ما خلص الفرح علشان يبدون أول ليلة في الحياة الزوجية!! .. المسكين دفع اللي وراه واللي قدامه علشان يتزوج علة .. وحجز جناح فاخر في الفندق لقضاء أول ليلة مع علة التي أحبها بجنون!! .. جلست علة على الأريكة وهي متغطية ومتلفلفة بعبايتها بدون ما تنطق ولا بكلمة (مسكينة مستحية!!) .. إقترب مدحت منها وقال :

مدحت : أخيرا يا علة جمعنا مكان واحد .. بعد قصة حب عنيفة إمتدت لأسبوع وثلاث ساعات!! .. من أول ما خطبتك إلى أن تزوجتك!! .. كأني عايش في حلم جميل .. أشوف الغرفة لونها وردي .. أشوف الحياة لونها بمبي!! .. الحياة دي بئه لونها بمبي وآنا جنبك وإنت جنمبي !! ..( مدحت ماخذاه الرومانسية!!)..

امتدت يد مدحت علشان يرفع المسفع من على وجه علة .. لأنه لم ير وجهها حتى هذه اللحظة !!.. وحتى عندما دفع المهر وسمح له أبوها أن يلقي عليها نظرة سريعة كانت متدثرة بعبائتها ولم ير منها سوى إظفر رجلها الصغير لأن الشراب الذي كانت تلبسه في رجلها كان مشقوقا من جهة الإظفر الصغير للقدم اليسرى!! .. وعندما امسك مدحت بالمسفع ليرفعه عن وجه علة .. لم ينتبه إلا وصفعة قوية تنطبع على خده الأيمن تركت علامة حمراء قانية!! .. أتبعتها علة بجملة : يا قليل الحياء والمروءة .. أيها الخائن الخاسر .. ثكلتك أمك!! ..

مدحت وقد ألجمته المفاجأة : ماذا حدث ؟! ما الذي فعلته ؟! .. عسى ما شر ؟! بسم الله الرحمن الرحيم .. وش أنا مسوي ؟!

علة بكل غضب الدنيا : أبي وأمي لم يتجرءوا على النظر إلى وجهي .. تأتي أنت الآن وتريد أن ترفع مسفعي من على وجهي يا عديم الحياء ؟! .. لو أملك مسدسا لقتلتك الآن شر قتلة!! .. أشوف الموت ولا أخليك تشوف وجهي!! .. مدحت : وكيف لا أرى وجهك يا علة؟! .. أنا زوجك!! .. ألم تذهبي إلى الكوافيرة وتصبغي وجهك بالمكياج ؟! .. فلمن كان هذا التزين ؟! .. ألم يكن من أجل زوجك ؟! .. علة : ومين قال لك إن أنا متزينة علشانك ؟! .. أنا متزينة علشان نفسي!! .. أصل إنت ما شفتني بالفرح وش لون متغطية حتى الحريم بالفرح ما شافوا وجهي!! ..

مدحت : طيب والحرمة اللي سوت لك المكياج ما شافت وجهك ؟! .. علة : لا .. أنا خليتها تسوي المكياج من تحت الغطوة .. هي الوحدة لازم ينشاف وجهها علشان تحط مكياج ؟! .. مدحت : الذي أعرفه يا علة أن الرجل الغريب لا يحق له النظر إلى وجهك ( حسب أصح قولي العلماء) .. ولكن وش دخل الحريم إنهم ما يشوفون وجهك؟! .. علة : عاد هاذي عاداتنا .. وإن ما عجبك الباب يفوت جمل!! ..

مدحت : لكن هذه ياعلة عادات مخالفة للإسلام .. الإسلام لم يأمر المرأة بأن تغطي وجهها عن زوجها ومحارمها وباقي النساء !!.. لكن معليش الباب لا يفوت جمل ولا بقر .. خلاص!! .. لكن قولي لي أبوك لم ير وجه أمك حتى الآن ؟! .. علة : لا.. ولا يحلم إنه يشوف وجه أمي طول ماهي عايشة!! .. أصل أمي ما ترفع الغطا عن وجهها حتى وهي نائمة !! ..

مدحت : انعنبوا داركم (كلمة عامية تقال للتقريع!!) .. عندك خمس اخوان وثلاث أخوات وأبوك لم ير أمك حتى الآن ؟! .. وش لون جيتوا ؟! .. من تحت الغطوة ؟! .. علة : أنا ما أسمح لك يا مدحت .. إقضب لسانك وخلك من أبوي وأمي ..قلت لك هذه عاداتنا وإنتوا وافقتوا من البداية!! .. واللي أوله شرط آخره نور!

مدحت : أبوي لما وافق إنه يجي معي نخطبك كان يعتقد أن هذا الأمر فقط قبل حفل الزواج ولم تكن يظن أن من عاداتكم أن المرآة تغطي وجهها عن زوجها وحتى أخواتها!! .. من وين جتكم هذه العادة ؟! ..الله يهديك يا علة .. وش ها السوالف ؟! .. وش لون أعيش معاك وأنا ما بعد شفت وجهك إنت ووجهك .. دافع مية ألف مهر عشان أتزوج وحدة ما أعرف شكلها ؟! ..

علة : ما علي منك .. رح اشتك لأبوي .. ما ني مخليتك تشوف وجهي لو تاصل السما .. إن شاء الله مدير منتدى العرب المسافرون بنفسه يتوسط لك!! .. ما راح تشوف وجهي يعني ما راح تشوف وجهي!!

مدحت : ما يصير يا بنت الناس وش لون ما أشوف وجهك ؟! .. وش لون بنجيب عيال؟! .. وش لون نعيش مع بعض على الحلوة والمرة ؟! .. علة : هذا شيء ما يخصني .. رح جيب عيال لحالك .. مدحت : وأنا ماخذك ليش يا علة الله يعلك!! .. علة : وأنا وش دخلني بالموضوع ؟ّ! .. العيال منك إنت مو مني!!

مدحت : والله من الدلاخة .. يا بنت الناس إفهمي!! .. أي إمرأة ورجل عندما يتزوجوا لا بد أن يأتيهم عيال إذا شاءت إرادة الله .. ما يجي عيال للرجال وهو بلحاله ما معه مرة!! .. لا حول ولا قوة إلا بالله .. إنت دارسة علوم بأي مدرسة ؟! .. والله لو شفت مدرسة العلوم اللي درستك المادة لأتوطى في بطنها!! .. كيف أفهمك بس يا علة ؟! ..

يا بنت الناس قومي غيري ملابسك خلينا نقعد مع بعض قعدة حلوة في أول ليلة لنا .. نسوي لنا بيالة شاي بالنعناع!! .. نطلب عشاء من (الروم سيرفس) .. نطلب عصير تفاح .. نتكلم وين نسافر؟ ..ناخذ ونعطي مع بعض علشان تزول الحواجز .. الحياة أمامنا .. والسعادة أمامنا إن شاء الله .. والعرب المسافرون مليان بالرحلات حول العالم .. خلينا نكلم المشرفين يساعدونا في تنظيم برنامج لليلة العمر .. نمر على رحلة فتى الشرقية لاستراليا وتجربة المنطاد .. نكلم أخونا أومس ولا أبو ريان ينصحنا وين نروح في سويسرا وفينا..
.. ناخذ رأي أخونا الشاب في اسبانيا والثماني وأربعين مدينة .. نكلم أبو عمر يرتب لنا برنامج عن سيريلنكا.. ناخذ رأي آخر الفرسان عن قبرص .. نقرأ عن رحلة أخونا نسيم نجد إلى ألمانيا .. نتجول مع أخونا اللندني في باريس يمكن أنزلك المقبرة وأتخلص منك !! .. نتصل على الباب العالي نستفسر عن تركيا نزور بوابة إندونيسيا الإخوان هناك عندهم برامج عائلية مميزة .. ويمكن يضيفونا فواكه إندونيسية ويعزمونا على آندومي!! .. نتجول في البوابات ونستفيد من تجارب الأعضاء ورحلاتهم !! .. نصلي لنا ركعتين علشان نتوفق في حياتنا الزوجية ..

علة : الفجر ما بعد أذن!! .. مدحت : وش لون أفهم فيها ذي بس؟! .. يا بنت الناس هذه ماهي ركعتين الفجر .. هذه ركعتين نافلة الواحد يصليها أول ما يتزوج علشان يشكر ربه على النعمة ويسأله التوفيق .. لكن الظاهر إني بأدعي ربي يجبر مصيبتي فيك يا علة يا بنت أبو علة!! ..

علة : يا الله يا مدحت قم روح غرفتك .. أنا تعبت وأبغى أنام!! .. مدحت : إنت وش قاعده تهذرفين ؟! .. أروح غرفتي ؟! .. لا يكون كل واحد فينا بينام في مكان ؟! .. علة : أجل بتنام معي في الغرفة يا قليل الحيا أنا ما أدري إنت متربي فين ؟! .. أهلك ما علموك الأخلاق ؟! .. عجيب والله .. ما بقى إلا أزواجنا ينامون معنا في نفس غرفنا !!!!! ..

مدحت : الظاهر إني بأنجن وأقطع ملابسي وأركض بالشارع مثل المجنون !! .. وش البلشة اللي أنا ماخذها ذي ؟! .. يا الله معليش أول يوم وأكيد إنت مستحية مني وما بعد تعودنا على بعض .. أمري لله .. خلاص يا بنت الناس روحي إنت الغرفة وأنا بأنام في الصالة والله يعيني على مصيبتي فيك يا علة ..

مدحت وعلة بعد ثلاثة أشهر من الزواج :


مدحت جالس بالصالة يتفرج على (سبيس تون) ومندمج مع دعاية فلة وبعدين حول على برامج الأطفال في قناة المجد .. دخلت علة وجلست على الكرسي المقابل وهي برضه مغطية وجهها (راجع حلقة مدحت وعلة في أول يوم زواج) .. جلست علة ساكتة وكأن على رأسها الطير!!.. دون أن تنبس ببنت شفة!! ( أنا عارف إنه فيه بعض الكلمات والجمل العربية غير المفهومة حتى بالنسبة للمؤلف!! .. في حالة الرغبة في معرفة معني جملة : تنبس ببنت شفة راجع الشرح في الهامش بعد ما تخلص الرحلة لكن لا تنسى تخبرني أنا أيضا بمعناها!!) .. مدحت وقد انتبه إلى الأمر : خير يا علة وش فيك متضايقة وجالسة تاكلين في روحك؟! .. هل ضايقك أحد ؟! .. علة : يعني ما تعرف وش اللي مزعلني ومضايقني يا مدحت ؟!

مدحت : لأ .. ما أعرف ؟! ... علة : حنا الحين صار لنا ثلاثة أشهر متزوجين وما بعد جانا عيال .. وأنا ما بعد حملت .. وأخاف إن فيك شي !! .. مدحت وقد وصلت معاه : عليك غباء يا علة لم أره من أحد من العالمين !! .. وش لون تبين تحملين وإنت تنامين في غرفة وأنا أنام في غرفة ولنا ثلاثة أشهر على هذه الحال .. لا يكون تحسبين إن الحمل بالمراسلة ؟! .. أنا يا علة لم أرى وجهك حتى الآن!! .. وغرفة النوم التي اشتريتها بالشي الفلاني لم أنم عليها بعد .. ومن يوم ما تزوجنا وأنا أنام بالصالة!! .. يا ليتني بقيت عازبا!! .. على الأقل أنام بغرفتي وما أحد يطردني منها!! .. تذكرين أول ليلة لنا في الفندق يوم صفعتيني تلك الصفعة القاسية لأنني أردت أن أرفع الغطاء عن وجهك كما يفعل كل عريس ؟! .. وش لون تبي تحملين يا مال البلا وحنا كنا أخوان كل واحد نايم بمكان ؟!

علة : ما علي منك .. أنا أبغى أجيب عيال .. أبغى طفل يملئ علي البيت!! .. مدحت : إنتظر يا (...) لين يجيك الربيع!! .. أنا ودي أعرف وش لون نجحت من الثانوي؟! .. ما مر عليك في مواد الدين أي إشارةمن أي نوع ؟! .. ما درسوكم حقوق الزوج والزوجة ؟! .. ما درستوا تدبير منزلي ..؟! .. ما درستوا تربية الأطفال ؟! .. ألم تقرأي في القرآن ( وجعلنا بينكم مودة ورحمة)؟! .. إنت الظاهر يا علة حالتك مستعصية .. ويبغالي أعلم فيك من جديد .. وأشرح لك الموضوع من الأول .. الله يجبر مصيبتي فيك يا علة!!

علة وهي جالسة ومتلحفة بعبايتها : إعمل ما بدا لك يا مدحت .. ولكني لن أدعك ترى وجهي مهما فعلت!! ولن أدعك تنام معي في نفس الغرفة لو يطيح السقف!! ..

مدحت : أنا أول مرة أشوف وحدة تغطي على زوجها .. إنتوا من وين جبتوا ها العادة اللي ما لها علاقة بالدين .. غطي وجهك برة في الشارع عن الرجال الأغراب لكن زوجك لا تغطين عنه .. أعمامك .. خوالك .. خواتك .. غطي عن الرجال الأجانب .. لكن عن زوجك لا تغطين فاهمة!! ..

أنا مرة قريت في الجريدة عن وحدة راحت بيت أهلها وطلبت الطلاق من المحكمة لأن زوجها حاول يشوف وجهها وهي نايمة ومتغطية بالمسفع!! .. وعيت ترجع البيت رغم إنهم متزوجين لهم أربعين أو ثلاثين سنة .. والعيال حاولوا يتوسطون بين أمهم وأبوهم علشان أمهم ترجع البيت وعفى الله عما سلف .. وتعهد الأب إنه ما يحاول يشوف وجه زوجته أم العيال أبد أبد لين تموت ويغسلها ويكفنها .. ذيك الساعة يقدر يشوف وجهها!! ..

لكن الشرهه مو على الأم .. الشرهة على الأب اللي له أربعين سنة متزوج وصابر على ها الوضع .. وما طلقها من أول يوم!! .. أنا مدري وش اللي مصبرني عليك ثلاثة أشهر .. يعني كني عايش بروحي!! .. الله لا يرد كتب علم النفس اللي قريناها!! .. واللي تقول إن الزوج لازم يحترم شعور زوجته في أول يوم من الزواج وإنه لازم يحاول التقرب منها بهدوء .. ومحاولة فهم شخصيتها وماذا تحب وماذا تكره .. إلخ إلخ إلخ إلخ .. إنت يا علة ما تنطبق عليك كتب علم النفس .. إنت تنطبق عليك كتب علم الحيوان ومشروعات التسمين وتصنيع الأعلاف!! ..

جاية الحين زعلانة علشان ما جانا عيال ؟! .. إنتظريني شوي خليني أروح السوبرماركت أجيب لنا كم ولد .. بس ما قلتي لي تبينه أبيض ولا أسمر ؟! .. عيونه زرق ولا سود ؟! .. شعره ناعم ولا خشن ؟! بسكر ولا بدون؟!! .. علة : إنت جالس تتمسخر يا مدحت ؟! .. نسيت يوم تكلمني أول يوم ملكنا فيه بالتلفون ومسمعني مقاطع من مسلسلات مصرية على إنها غزل؟! .. وش دخل خلو رجل الشئة .. والبنت اللي بغت ترمي نفسها من الشباك بالغزل ؟! ( راجع الحلقة الأولى من يوميات مدحت وعلة) ..

مدحت : لولا إنك تصلين وتصومين كان رجعتك عند أهلك ثاني يوم!! .. واللي مخليني متمسك فيك أكثر .. إني ما بعد شفت وجهك للحين وما ودي أطلقك وأنا ما بعد شفت وجهك يا علة خسارة دافع مية ألف واطلقك وأنا ما شفتك!! .. علة : إنت ناسي إن أبوي مشترط مؤخر نص مليون ريال إذا طلقتني ؟!

مدحت : حسبي الله ونعم الوكيل .. أبوك مكتفني من ايديني ورجليني والدنيا مقفلة بوجهي من جميع الجهات!! .. أنا نسيت حكاية المؤخر .. لكن إنتوا وش اللي عرفكم بالمؤخر؟! .. ما أقول إلا الله يصبرني على هذه المصيبة !!.. وجد مدحت بعد ذلك حل وهو أن يقوم هو وعلة برحلة إلى مكة المكرمة لعل عقدة علة تنحل ويستطيع أن يرى وجهها .. فما الذي حدث بينهما ؟! ..

مدحت وعلة والرحلة إلى مكة المكرمة:


توصل مدحت بعد عدة محاولات للتفكير في حل المشكلة التي تعاني منها علة وهداه تفكيره بأن يقوموا برحلة إلى مكة المكرمة لأداء العمرة وزيارة بيت الله الحرام خاصة وأن علة لم يسبق لها أن زارت مكة المكرمة من قبل .. لعل علة تشفى من هذه العادة الغريبة!! ..

مدحت : يا الله يا علة تأخرنا .. علة : شوي شوي علي يا مدحت ليش إنت مستعجل ؟! .. اللي يسمعك يقول بتفوتنا الطيارة .. ما درى إنك بتوديني بالسيارة وعلى ونيت بعد!! .. أنا علة بنت أبو علة أركب ونيت بغمارة وأنا لسه توني عروس ؟! .. وين السيارات الفخمة ؟! .. وين المرسيدس؟! .. وين الجاكوار ؟! .. وين اللكزس؟! .. وين البي أبو دبليو؟!! ..

مدحت : إسكتي الله يرحم والديك لا تخليني أقول كلام ما يسرك!! .. قال بي أبو دبليو!! .. اسمها بي أم دبليو مو أم دبليو!! .. إنت وش عرفك بالمرسيدس أو الجاكوار والبي أم ؟! .. الحين اللي يسمعك يقول إنك ما تركبي إلا رولز رويس وإنت لما كنت في بيت أهلك تروحي المدرسة راكبة حنطور!!.. وأحيانا تروحين المدرسة مشي !! .. إحمدي ربك إني مركبك وانيت مو هايلكس!! .. لو ما تسكتين وتنطمين بأخليك تركبي في الغمارة وأريح راسي !!..

علة : طيب لا تكثر كلام يا مدحت !! .. خلاص أنا خلصت واتجهزت للرحلة هل وضعت الحقائب في السيارة ؟!
مدحت : نعم وضعت الحقائب في السيارة ( سوف ننتقل إلى الحديث بالفصحى) .. علة : وهل أخذت معك إحراما ؟! .. مدحت : الإحرام سوف أشتريه من ميقات السيل الكبير عندما نصل إلى مدينة الطائف سعره هناك أرخص من الرياض .. وأريد أن أشتري حزاما ومقص .. علة : دقيقة يا مدحت قبل أن تدير المحرك سوف أعود إلى البيت لأحضار حقيبة المكياج !! ..







مدحت : حقيبة المكياج ؟! .. يا ما ل العمى .. أي مكياج يا بنت الناس ؟! .. رايحة الحرم وتحطين مكياج ؟! .. يا الدلخة أنا زوجك ما بعد شفت وجهك لين الحين بتحطين مكياج لمين ؟! .. نعنبو دارتس إنت ما تبطلين ها الحركات؟! .. إنطقي في السيارة وخلنا نمشي قبل ما تغيب الشمس!! ..

علة : وما دخلك أنت ؟! .. أريد أن أضع مكياج لنفسي وهل المرأة عندما تتزين لا بد أن يراها الناس ؟! .. مدحت : أقول اسكتي وإبلعي لسانك وخلينا نتوكل على الله ونمسك الخط .. الطريق طويل .. ولازم نمر على مدينة الطائف علشان نحرم من الميقات ونوصل مكة قبل زحمة الناس ..علة وقد أخذت على خاطرها : خلاص يا مدحت أنا مخاصماك!! .. أحبك آه .. اسيبك لأ!! ..

مدحت : الله وأكبر يا شعبان عبد الرحيم ؟! .. يا ليتك تسيبيني وأرتاح منك .. يارب ينفجر إطار السيارة وتنقلب واعيش أنا وتموتي إنت!! .. علة : الحين هذا كلام يقوله واحد رايح يجيب عمرة ؟! .. هذا الكلام ما يقوله إلا واحد بايع عمره مو رايح يجيب عمرة!! .. شوف ترى إذا أنا مت إنت بتتحمل ديتي .. ولا تنسى النص مليون مؤخر المهر !!..

مدحت : أستغفر الله العظيم رب العرش العظيم .. من يوم ما تزوجتك ونحن لا نكف عن الصياح واللجاج وكأننا ضراير!! .. لكن أنا معذور .. فيه واحد بالدنيا له ثلاثة أشهر متزوج وينام وحده بالصالة وما شاف وجه زوجته؟ .. والله أخاف تطلعين رجال وأبوك غاشني ومزوجني واحد من عياله!!! ..

علة : وش قاعد تقول إنت ؟! .. أبوي غاشك ؟! .. مو كفاية إنك قاعد تسمع صوتي!! .. ها الصوت اللي سامعه صوت مرة ولا رجال ؟! .. جاوب على السؤال؟! .. مدحت : بها الوقت ما يندرى .. ولا عاد الواحد قادر يميز بين صوت المرة وصوت الرجال .. عندنا رجال كنهم حريم .. وعندنا حريم كنهم رجال .. يا دافع البلا .. خلاص زمان أول تحول .. أصبح من السهل أن يتحول الرجل إلى امرأة والمرأة إلى رجل بعملية جراحية .. هذا زمان العجايب .. هذا زمان شعبان عبد الرحيم .. وروبي .. وميشو شو .. وستار أكاديمي .. هذا زمن انقلبت فيه الموازين واصبح الجميل قبيحا والقبيح جميلا!! ..


علة : أشوفك قاعد تتفلفس؟! .. مدحت : اسمها فلسفة! .. والفعل المضارع يتفلسف مو يتفلفس!! .. يا سلام على الثقافة اللي عندك!! .. أنا ما أدري المدارس وش قاعدة تدرسكم؟! .. اثنا عشرة سنة وأنتم تدرسون وفي الأخير الواحد يطلع ما يعرف يكتب اسمه!! .. ويقولون إصلاح المناهج .. أي مناهج هذه اللي بيصلحونها وعندهم طلبة وطالبات (..) !! .. اثنعشر سنة دراسة وفي الأخير الحصيلة صفر ؟! ..

علة : أقول يا مدحت .. إقضب لسانك وشغل السيارة خلنا نمشي وما عليك من المناهج والخرابيط الفاضية.. لاتدخلنا في متاهات .. هذا منتدى سياحي واسمه العرب المسافرون!! ..

مدحت : بسم الله الحمد لله .. سبحان الذي سخر لنا هذا وما كنا له مقرنين وإنا إلى ربنا لمنقلبون ... (مدحت يواصل قراءة دعاء السفر) ..اللهم إنا نسألك في سفرنا هذا البر والتقوى ومن العمل ما ترضى .. علة : مدحت لا تنسى تربط حزام الأمان!!.. مدحت : ما شاء الله تبارك الله .. يظهر إن برامج التوعية المرورية مأثرة عليك .. أشوفك كل يوم تتابعين برامج المرور تحسبينها دعايات!! .. راكبين وانيت ورابطين حزام الأمان ؟! .. يا زين اشكالنا!! .. إنت يبغالي أربطك بحبل الأمان وليس حزام الأمان!! .. الشكوى لله وهذا الحزام ربطناه علشان ننفك من لسانك!! ..

علة : أقول يا مدحت فحصت زيت المحرك وضغط الهواء في الكفرات؟! .. مدحت : أقول تعالى سوقي بدالي يا علة!! .. زيت المحرك ؟! .. لا وتعرفين زيت المحرك بعد !! .. أشوف بديتي تتدهرين مع المرور .. الحمد لله إنكم ما تسوقون ولا كان شفنا الهوايل .. تصوري الوحدة تنزل من سيارتها وتفتح الكبوت وتفحص الزيت .. ثم تضرب الكفر برجلها علشان تشوف هو منسم ولا لأ .. أو تسوق السيارة الصالون( الجمس) اللي لونه أحمر وحاطه عيالها وراها وعبايتها ترفرف مع الهواء!! ..

علة : الحين طلعت أنا الغلطانة؟! .. الغلط غلطي أنا اللي حبيت أذكرك لكن إنتوا يا الرجال ماتنعطون وجه!!
مدحت : من ناحية ما ننعطى وجه .. فما يحتاج إنك تركزي على النقطة هذه إنت مطبقة الكلام بحذافيره لي شهور ما شفت وجهك!! .. آخ يا القهر .. بأموت قهر .. الله يصبرني ولا يبتليكم كما ابتلاني ..

علة : ما قلت لي يا مدحت إذا وصلنا الميقات وش نسوي؟!.. مدحت : هاذي الأسئلة الزينة .. بديتي تتعلمين تسألين .. شوفي يا علة أول ما نوصل نتوضأ ونصلي ركعتين تحية المسجد لو كان الوقت مو وقت صلاة .. طبعا حنا إغتسلنا في بيوتنا قبل ما نطلع .. لكن إن بغى الواحد يغتسل لما يوصل الميقات فمحدن قايل له لأ .. لكن أهم شئ إن الواحد ما ينوي العمرة إلا وهو طاهر وعلى وضوء.. ثم يتلفظ يتلفظ بنية العمرة ويقول : لبيك اللهم عمرة .. وبعدين يبدأ في التلبية لين ما يوصل الحرم ... والمرأة تلبي في سرها!! .. ولما نوصل البيت الحرام نقدم الرجل اليمنى وندعو بدعاء دخول المسجد ثم نبدأ الطواف حول الكعبة سبعة أشواط وبعد ذلك نصلي ركعتين خلف مقام ابراهيم إذا تيسر ذلك أو نصليها في أي مكان بالحرم .. وبعدها نسعى سبعة أشواط ونتحلل من الاحرام .. الرجل يحلق شعره أو يقصره والحلق أفضل .. والمرأة تأخذ بضع خصلات من شعرها ونكون كذا انتهينا من العمرة فهمتي يا علة ؟!

علة : إيه فهمت يا مدحت .. لكن متى الواحد يضحي؟! .. بعد العمرة ولا قبلها؟! .. مدحت : حسبي الله ونعم الوكيل .. أي أضاحي يا بنت الناس؟! .. حنا رايحين نعتمر مو رايحين نحج!! .. وبعدين ما في حج في شهر ربيع الثاني .. ما في فايدة فيك .. مخك مقرطس بقصدير!! .. حمدت ربي على السؤال الأول وقلت بديتي تفهمين خربتيها بسؤالك الثاني!! .. إنت متأكدة إنك كنت تقومين الصبح تروحين المدرسة وتدرسي ؟! .. أخاف إنك تكونين ناسية وبدل ما تروحين المدرسة كنت تروحين لحوش الغنم حق أبوك!! .. يا رب ترجعني الرياض سالم وما ينطق فيني عرق وأموت بسبب ها العلة!!

واصل مدحت وعلة طريقهما نحو الطائف متوجهين نحو السيل الكبير للإحرام من هناك .. وفضل مدحت أن يقوم بجولة سريعة هو وعلة في الطائف لاسيما وأنهما قد أخذا قسطا من الراحة في الطريق في أحد الاستراحات ووصلا إلى الطائف بعد الظهر اليوم التالي ..

مدحت وعلة والطريق نحو الطائف!!


وصل مدحت وعلة إلى الطائف واخترقوا منطقة الحوية متجهين إلى وسط المدينة.. واقترح مدحت على علة أن يقضوا يوم أو يومين في الطائف قبل أن يتوجهوا إلى مكة لأداء العمرة .. اخترقت السيارة شوارع مدينة الطائف ومدحت يحاول البحث عن شقة نظيفة ليرتاح هو وعلة فيها .. وعلة تستمتع أثناء ذلك بهواء الطائف المنعش الجميل وهي تحاول أن تتعرف على كل منطقة من مناطق الطائف التي لم تزرها من قبل ..
وعلة تخاطب مدحت وهما في السيارة : تصدق يا مدحت إن الطائف حلوة!!..








قل لي يا مدحت صحيح إن البرشومي ما يطلع إلا في الطايف ؟! .. مدحت : لأ يا علة البرشومي أو التين الشوكي يطلع كمان في أبها والباحة..علة : طيب وش هو البرشومي يا مدحت ؟! .. مدحت : الحين تسالين عن البرشومي وإنت ما تعرفي وش هو ؟! .. البرشومي يا علة ثمرة ذات قشرة خارجية مليئة بالشوك يتم أكلها بعد نزع قشرتها الخارجية وبعد أن توضع في وعاء مملوء بالماء حتى لا يتطاير الشوك منها اثناء التقشير .. ولكن إذا تناول الإنسان كمية كبيرة منها دون أن يشرب كمية كافية من الماء فمن المكن أن تتسبب في حدوث الإمساك .. ويسمى ايضا التين الشوكي!! ..


علة : طيب والي يا كلها بقشرها يا مدحت ؟! .. يقولون إن أكل الفواكه مفيد إذا الواحد أكلها بقشرها!! .. مدحت : يا ليتك يا علة تاكلينها بقشرها علشان أرتاح من بربرتك وكثرة كلامك وأسألتك التي ترفع الضغط والسكر!! .. جربي يا علة تاكلين البرشومي بقشره!! .. وتراني غير مسؤول عن اللي بيجيك!! .. التفاح والكمثرى مفيد إذا الواحد أكله بقشره لكن البرشومي يفتح الله فاهمة يالهبلة!! ..


علة : طيب وين التلفريك اللي يقولون عليه يا مدحت .. يقولون إن تلفريك الطايف أحسن من تلفريك مرتفعات جنتنغ في ماليزيا!! .. مدحت : والله يا علة الأمر نسبي!! .. سعر تلفريك الطايف أغلى شوي لكنه يستاهل التجربة وهو يمر فوق مرتفعات الهدا والإطلالة منه رائعة بس اللي قلوبهم ما هي جامدة ما يصلح يركبون فيه .. بس تدرين يا علة إني ودي أركبك فيه علشان أفتك منك ومن غثاك يمكن تطيحين وتموتين وتريحيني منك!! ..









علة : مدحت حدثني أكثر عن الطايف .. عن موقعها وشهرتها وبماذا تشتهر ؟! .. مدحت : تقع مدينة الطائف يا علة على المنحدرات الشرقية لجبال السروات على ارتفاع 1700م فوق سطح البحر , ويزداد الارتفاع كلما اتجهنا إلى الغرب و الجنوب ليصل إلى 2500م ويربطها بمكة المكرمة التي تبعد عنها بـ 88 كم طريقان الأول عبر جبال كرا , وطوله 88كم والآخر عن طريق السيل الكبير ويبلغ طوله 90كم تقريباً .. يتميز موقع الطائف يا علة بأنه ملتقى للطرق الرئيسية القادمة من الجنوب و الشمال و الشرق و الغرب .. وقد اكسبها ذلك سمعة سياحية و تجارية وزراعية وعسكرية منذ القدم .. إضافة إلى أنها أصبحت العاصمة الصيفية الرسمية للدولة و تستضيف الوفود والمؤتمرات من المملكة وخارجها ..



علة : معلوماتك يا مدحت غزيرة إهبي عليك!! .. وجع على على ها الثقافة العامة!! .. مدحت : إذكري الله يا علة الله يكفينا شرك!!.. علة : وجع .. إهبي عليك!! .. ما شاء الله!! .. مدحت : الله أكبر عليك يا علة!! .. ما تعرفي تتكلمي كلام زين ؟! ما تعرفي تقول كلمتين حلوين على بعض؟! .. تبغي تحسديني علشان نطيح من فوق الهدا ولا يصير لي حادث وأموت؟! .. علة : إلا بالمناسبة يا مدحت وش الهدا ؟! ..








مدحت : الهدا يا علة هي منطقة جبال مرتفعة يشقها طريق يصل ما بين الطائف وجدة ومكة وكان كثير من المسافرين إلى وقت قريب يستخدمون هذا الطريق الضيق الخطير للوصول إلى الطائف والعودة منها .. أما الآن فيوجد خط آمن وواسع اسمه السيل الكبير يستخدمه المسافرون!! .. لكن المناظر الموجودة في الهدا يا علة مناظر قمة في الروعة .. وهي منطقة جيدة للمتنزهات والرحلات الخلوية ..



وصل مدحت إلى أحدى الشقق المفروشة واستأجر شقة من غرفتين وصالة ..استغرب الرجل موظف الاستقبال هذا الأمر بالنسبة إلى شخصين فقط كيف يسكونون في شقة فيها غرفتين.؟! .. موظف الاستقبال : ممكن أشوف كرت العائلة ؟! .. مدحت : تفضل!! .. موظف الاستقبال : هذي اللي المكتوب اسمها في كرت العائلة زوجتك؟! .. مدحت : تحقيق هو ؟! .. وإنت وش شايف مكتوب قدام اسمها في الكرت؟! ..علة بنت أبو علة الصمرقع!! .. ومكتوب قدام الاسم زوجة!! .. أظن الأمور واضحة وما يحتاج تسأل أسئلة سخيفة!! .. موظف الاستقبال : أنا آسف ما قصدت شيئ .. بس استغربت إنك مستأجر غرفتين وصالة وما معك إلا المدام!! .. غرفة وصالة تكفيكم وكمان أرخص في الايجار!! .. مدحت وهو يكلم نفسه : تراك ما تعرف القصة!! .. وما تدري عن الورطة اللي أنا متورط فيها!! .. لازم كل واحد منا ينام في غرفة ..ها العلة اللي معي ماهي راضية تغير قناعاتها عن الزواج ومصرة إن أنا ما أشوف وجهها ولا أنام أنا وياها في غرفة وحدة أبدا!! .. الله يصبرنا على المصائب!! ..


موظف الاستقبال : عفوا يا أخ .. فيه شيئ .. ليش سرحان ؟! .. مدحت وقد استيقظ من حالة الشرود : ها .. إيش ؟! .. لا أبد ما في شيئ يا الله خلصنا وعطيني المفتاح علشان أجيب الشناط والأهل!! .. مدحت وهو يفتح باب السيارة لعلة : يا الله يا علة .. الشقة نظيفة وحلوة وفيها كمان غرفتين!! .. علة تنزل من السيارة ويتوجهون جميعا إلى الشقة بعد عناء الطريق .. ومدحت يفتح الباب ويضيء الأنوار وهنا تتقدم علة وتأخذ جولة في الشقة وتقول : ليش يا مدحت الشقة ما فيها إلا حمام واحد ؟! .. كيف أستخدم الحمام وإنت جالس بوجهي وأنا داخلة وأنا طالعة؟! .. قوم يا الله انزل تحت عند الاستقبال علشان أعرف آخذ راحتي .. وأتنظف وأكوي عبايتي ومسفعي اللي تعفط من الطريق علشان أقدر أقعد معاك قعدة حلوة في الصالة ونشرب شاي بالنعناع وأنا نظيفة ومتغطية ومسفعي مكوي!! ..

مدحت : حسبي الله ونعم الوكيل .. اللهم إني أسألك أن تلطف بي وتعيذني من أن أخرج إلى الطرقات كالمجانين!! .. يا علة يا بنت ابو علة .. الظاهر أنك تعديت مرحلة الجنون ووصلتي إلى مرحلة ما بين الهلاوس وذهاب العقل بالكلية!! .. إنعنبو دارك كيف أنا زوجك أترك الشقة وأنزل للاستقبال أنتظر زوجتي لما تخلص من كوي عبايتها وغطوتها ؟! .. اللي جاية معي زوجتي ولا بنت الجيران؟!! .. يا عالم يا ناس يا هوه .. أحد ينقذني مما أنا فيه!! .. لقد بلغ السيل مبلغه وشارف عقلي على الطيران والتحليق عاليا بعيدا عن راسي!! ..

علة : بلاش كثرة كلام يا مدحت!! .. أنا عارفة إنك ترغي وتزبد وفي الأخير تنفذ الشيئ اللي بأقولك عليه .. خلصنا من ها السطوانة من زمان !! .. وجهي ما راح تشوفه إلا عندما أموت!! .. مع إني أفكر أوصي إنك ما تغسلني لو مت!! .. إنت ما تعرف عاداتنا ؟! .. يا حبيبي العادات هذه متأصلة ما تروح إلا لما روحك إنت تروح!! .. يا الله خلصنا وروح إنزل تحت!! .. مدحت : امري لله .. والشكوى لمن إليه المشتكى!!..

بعد عدة ايام قضاها مدحت وعلة في الطائف .. جهزوا حقائبهم وأخلوا الشقة التي استأجروها استعدادا للذهاب إلى مكة المكرمة شرفها الله ورزقنا وأياكم زيارتها مرات عديدة .. أدار مدحت محرك السيارة ودعا بدعاء الركوب وتوكل على الله متجها إلى مسجد السيل الكبير لكي يحرم هو وعلة من هناك!! ..









تابعوا معنا في الحلقة القادمة مالذي حدث معهما .. وكيف ارتفعت حرارة مدحت إلى مستويات قياسية بسبب أفعال علة وأسئلتها الساذجة التي ترفع ضغط الدم!! .. ألقاكم قريبا وفي أمان الله..

عند مسجد السيل الكبير والإحرام للعمرة


وصل مدحت وعلة إلى السيل الكبير علشان يحرمون من هناك .. والسيل الكبير هو ميقات أهل نجد وهو نفسه قرن المنازل ويسمى حديثا بميقات السيل الكبير، يبعد هذا الميقات عن مدينة الطائف بحوالي خمسين كيلا بينما يبعد عن المسجد الحرام حوالي خمسة وسبعين كيلا!! .. أما ميقات وادي محرم( الذي ذكره أخونا ناظم) فيقع في الهدى غرب ال