والله إني أحبك رغم كل الظروف...

24-09-2008, 12:54 صباحاُ

سلطان : بنحط غرشه ماي فاضيه ..
راشد : لا لا هب شي .... نبا شي اصغير..

حميد : انا عندي الكم شور .. شوه رايكم انحط كوب ماي مجلوب فوق ذاك العرقوب وندفنه اشويه في التراب .. وانحط
فوقه حصاه . والي ايصيب الحصاه بدون ما يطرح الكوب هوه الفايز ..
راشد : يالله بنجرب..
ابو ناصر : انا بحطلكم شاره الف ..
ناصر :.. يالله الف .. شويه ابويه ..
ابو ناصر : عاد عن البطره .. انزين 1500..
ابو سلطان : ومن عندي انا 1500 ..
ابو راشد : ومن عندي انا بعد 1500 .. بعد اشتبون ..

ابتسموا الشباب عيبهم الشور ..

وبدوا .. وتموا محتشرين وحالتهم لله .. ووحاولوا كلهم محاولتين .. ويوم ما ايصيبون الي ايكون دوره ..اشتلوا كلهم عليه (اووووووووووووووه ) في المحاوله الثانيه لراشد صابها .. قنيص ما شاء الله عليه ونادر ما يخطي .. حتنه دومه مخاوي الشيوخ ..

يعني فاز راشد بالشاره .. عقب ما خلصوا يلسوا يتقهويون ويسولفون ..

...انسير صوب الحريم

ام ناصر وام سلطان وأم حميد ..وخلود حرمة سعيد ..يلسن ايعابلن في الغدا ..والبنات .. مريم وموزه وميثه ووعلياء والريم ونوره ومهره يلسن ارواحهن ايسولفن عقب ما فازعن الحريم اشويه .. (بنات اليوم اشدراهن بالطبيخ )
ميثه : بتخبركن ... نحن يايين نيلس والا يايين انحوط .. ؟؟؟!!!
مريم : انزين نشي حوطي حد قبضج ..؟؟
نوره : والله صدقها ميثاني ..الجود وايد حلو .. يبالنا انسير نتمشى ..
الريم : يالله انا بخاويكن ..
مهرة : أنا بسير ألاعب عيال خلود .. فديتهم يا ربي محلاتهم
الريم : برايج ..يا أم اليهال ..
علياء : هاه مريوم وموزوه تبينا انسير اوياهن والا نيلس عند الحرمات ..
مريم وهيه تأشر على ميثه والريم ونوره ..: يهال يهال .. منوه ايسير اوياهن ..
ميثه : الحين يهال .. مساعه محتشرات تبنا انسولف عليكن ..
نوره : ما عليه .. سيرن سيرن عابلن عيل في الغدا يالعيايز ..
موزه : ما عندهن سالفه الا عن البنات وهالجامعه .. ويليتهن بعد فالحات فيها ..
نوره : اقول .......انتن اتخابرن شوه ايحطون من الرسوم الساعه 9 ..لا دوامات ولا شياته
مريم : عنلاتج يالدبه ؟؟؟
ميثه : مريوم ابركلج لا تعمين على نواري فديتها ..

24-09-2008, 12:54 صباحاُ

وجان تلوي عليها ومسكت الريم بيدها وشلن شنطة ميثه الي كانت يايبه فيها الهد فون وسارن يتمشن في عكس الاتجاه الي يالسين فيه الرياييل عسب ياخذ راحتهن ..

مريم : رووح الثلاثي الكوكباني ..

الكل تم يضحك . .......... يت خلود ويلست ويا البنات الباجيات وتمن ايسولفن ..

ابتعدن قوم ميثه اشويه ودورلهن مكان سنع ويلسن فيه وشغلن المسجل ..وما خلن فلانه ولا علانه في الجامعه ما طرنها .. ميثه ونوره هاي الهن ثاني سنه في الجامعه... والريم الكورس الي مركان اول كورس الها ..
ا
لمعروف في جامعه الامارات ويمكن بعد كل الجامعات .. انه كل بنت لازم اتكون عندها بنت مميزه وايد ..وغير عن الكل .. تمن كل وحده اتخبر الثانيه عن حبيبتها .. وشوه سون في الجامعه وشوه قالن .. ..

الكل يشهد انه الريم هيه ملكة جمال العايله .. لامه جمالهم كلهم ..عليها جمال ميزها به ربها عن الكل ...وعليها منطوق ايذوب الي يالس يسمعها.. على غرور بسيط وكبرياء زايدنها حلاه على حلاتها .. عاد هاي امخبله ببنات الجامعه من جمالها .. والمعروف بعد انه كل مزيونه ايكونن عندها وايد معجبات .. ( قاصر الا ايعطنها ورقه وقلم وياخذن توقيعها )خخخخخ

الريم : تحيدن موزه المزروعي الي خبرتكن عنها من زمان .. الي كانت تبا اتعرف عليه .. وكانت بتموت واتعرف انا منوه احب ..
ميثه : هيه هيه عرفتها ..
نوره : منوه هاي ما اتذكرها ..
ميثه : موزه المزروعي الي ربيعتها شما المنصوري
نوره : هيه هيه توني تذكرتها ..
ميثه انزين شوه فيها ..
الريم : الكورس الياي ما بتداوم سحبت اوراقها .. والاسبوع الياي عرسها ..
نوره : حليلها تستاهل ..
ميثه : ما خبرتيها عاد انتي منوه اتحبين .. والا بعدها في خاطرها ..
الريم : ما اظنيه الحين ايهمها هالموضوع ..
ميثه : معلوم ....... الوحده من ايبولها طاري العرس وانها بتعرس تنسى هلها وربعها وطوايفها .. واتقبض فيه قبضه
نوره وهيه ميته من الضحك على ميثه : الله يقطع سوالفج ميثاني ..

الريم : تدرن ... في خاطريه اكتب الها في ورقه اسم الي احبها .. وساعة ما تكون على الكوشه اعطي حد الورقه ايوديها الها ..
نوره : ييه ها ذاك الساع وايد عليها لو شافت الي يايبلها الورقه لين تقراها ..

جان اتمر اغنيه ..ميحد : يالكوس يالمطلي .. قم شلي وانته لي المندوب ..

24-09-2008, 12:55 صباحاُ

................)

ميثه : آآآآآآآآآآآآآآآآآآآآآآآآآآآآآه يا ويل حالي يا ميحد تضرب على العوق امره ..
الريم : متعذبه ثرج ..
ميثه:ايييييييييه لا تخبرين
الريم : هاه ميثاني هالمرة من بنات العين والا من بنات السكن ..؟؟
جان تبتسم ميثه وشلت المسجل فاييدها ونشت ..وهيه اتغني ويا ميحد ..
نوره : ميثاني وين تبين .. ؟؟

ميثه عادت الاغنيه من اول والتفتت صوب البنات .. : الا هنيه هب سايره مكان ..

تمت ميثه تتمشى وهيه مندمجه في الاغنيه ..ميثه كانت اتحب سلطان ..من يوم كبرت وشافت سلطان جدامها ..كانت اتحبه بصمت بدون لا حد يدري ..بس مريم كانت دومها اتغايضها بسلطان وحميد . لانه الريم ونوره كانن ايخبرن ميثه بمشاعر اخوانهن تجاهها ..وكانت هيه اتخبر مريم اختها .. بدون ما تعرف كل من الريم ونوره عن الي ايكنه اخو الثانيه لميثه .. .. يعني ميثه كانت اتعرف بمشاعر سلطان وحميد ..

بس هيه حبها لسلطان كان وايد كبير من يوم ما كانوا اصغار .. كان دايما ايحايز عنها جان حد غلط عليها ..وكان عوف في الكل الا في ميثه لا ... كان دومه ايعاملها معامله غير ..

سلطان هب بس ايحب ميثه .. سلطان يعشقها ويهواها .. ويتفدا حتى ثرها يوم تمشي ..ويهوى الهواء الي تتنفسه ..حبه الها كان امبين في اعيونه .. بس نحن عندنا الواحد ممنوع انه ايبين مشاعره ..ويكشف سره عن الي ايحبها خاصه لو كانت الي ايحبها بنت عمه ...او وحده من العايله ..الا جانه قال لهله انه يبا يعرس ابها .......

الريم : لا ميثاني صايدتلها غزاله شكلها ..
نوره : شكلها والله...ههههههههههههه
الريم : خلصتن تسجيل الكورس الياي ..
نورة : سجلنا اانا وميثاني نفس المساقات ..
الريم : يا حظكن والله يا ليتني كنت امخلصه شي من مساقات الاساسي جان سجلت شي وياكن ..
نورة : ههههههههه ..يا ويله الاستاذ الي بناخذ عنده ..
الريم : وده يوم بناخذ نحن عنده.. آخر الكورس بتلقونه يترجانا نسجل عنده للكورس الي بعده ..
نوره : هههههههههه .. ما اظن ..

شويه والا ..

ميثه : ااااااااااااااااااااااااااااااااااااااااي ..

والتفتن صوب ميثه الي قدها ابتعدت اشويه عنهن ..ونشن وربعن صوبها .. وكانت ميثه يالسه وماسكه ريلها ...

يتبع .....

24-09-2008, 07:34 مساءً

نوره : فديتج ميثاني شوه فيج ..
ميثه : اتخرطفت في هاي الحصاه العوده .. الله يا خذها ما شفتها .. وجان تفتر ريلي..
نوره : لا حووووووووووووووووووول ..

الريم وهيه مبتسمه : هب منج من الي ماخذ عقلج ..

ميثه تقول في خاطرها :فديته الي ما خذ عقلي : اااااااااااي مالت عليج يالريم انا اتويع وانتي تعلقين ..
نوره وهيه اتطالع ريل ميثه شوه ياها :ميثاني قومي فديتج خلينا انرد ..
ميثه : قبضي ايدي فازعيني بنش ..قبضتها نوره بإيدها ..وفي اييد ميثه الثانيه المسجل ..
الريم : فريه وين تبيبه بعد ..
ميثه وهيه تتألم : لا هب فارتنه ولا من قال..

حاولت تمشي وهيه متسانده على نوره بس ما رامت تمشي ..

ميثه : اااي ..نواري والله ما أروم امشي .. وبعدين نحن ابتعدنا اشويه عنهم وانا ما اروم امشي لين اهناك ..
نوره : خلاص انا بتصل في اخويه سلطان وبخليه أي صوبنا والا ايطرش النا حد ..
ميثه من سمعت اسم سلطان فز قلبها .. ونست الويع وجان اتدوس على ريلها الي اتعورها ..
ميثه : ااااااااااااااخ ..
نوره وهيه متروعه على ميثه : ميثاني اشياج ..
ميثه : لا ما شي بالغلط دست على ريلي الي اتعورنيه..
الريم : احسن حل بنتصل في خالي خليفه وبنخليه ايي .. والا ايشوفلنا حد ..
ميثه : يالله نواري عطيها موبايلج خليها تتصل في خالي خليفه ..

..........ميثه ما كان عندها موبايل .. لانه منقود عندهم البنت ايكون عندها موبايل .. والريم بعد نفس الشي .. واوقات يوم ايكونن محتاياتنه في الجامعه ايشلن مال امهاتهن ..(وهذا ما يعتبر عدم ثقه .. لا بس لانهم هم ايشوفون انه البنت لو ما كانت معرسه ما اتكون محتايه موبايل )

نواري الوحيده الي كان عندها موبايل ..لانه البنت الوحيده في البيت وابوها امدلعنها وايد .. وطلعلها رقم وموبايل رغم انه اخوانها كانوا امعارضين .. بس يوم يرمس ابو سلطان محد ايروم ايقول لا ..

عطت نوره الريم موبايلها ..

الريم وهيه اتطاله الموبايل : نواري امره موبايلج ما فيه ارسال .. ( وترفعه فوق ) وايد عليه فيه نقطه وحده ..
ميثه : لا حوووووووووووول
نوره : صبري فديتج الحين بنلقى الحل .. (وترمس الريم ) : ريماني سيري فوق ذاك العرقوب ربج ايطيع يرسل ..

24-09-2008, 07:34 مساءً

الريم : لا .. شوه رايكم انا اسير امشي لين عندهم واخبرهم واخلي حد ايي ..
ميثه : لا لا سيري اول شوفي التيلفون ربج ايطيع يرسل .. وان ما طاع بندور حل ثاني ..

سارت الريم صوب العرقوب .. وهيه ترفع التيلفون اتحاول تلقط الارسال ..

سبحان الله في نفس الوقت كانوا حميد وسلطان ايجربون سيارة سعيد الي كان يديد امظهرنها من الوكاله ..ومشغلين على المسجل ومطولين عليه .. وكانوا حاطين اغنية محمد عبده (انا حبيبي بسمته تخجل الضي ) ..

حميد وسلطان . هالاثنينه دومهم رباعه .. وكلهم في كليه الشرطه .. وايداومون ويردون عند ناصر ولد خالتهم الي بعد هوه يشتغل هناك .. بس هو ما كان ايخاويهم دوم في طلعاتهم لانه روحه عنده ربع ..و ايتمون كلهم في شقته الي في ابوظبي لين الويك اند..وخلاف ايردون صوب العين ..

سلطان : يالله يا هاي الاغنيه كيف اموت عليها .. فديت الي في بالي انا ..
حميد : دووووووم حاطنها .. هاي الاغنيه بالذات اتذكرني بناس غاليين عليه ..
سلطان : سلامي عليك يا بو نوره .. غنيت والله يوم غنيت هاي الاغنيه

وتم سلطان ايغني ويا محمد عبده ..(راعي العيون الناعسه رمشها فيّ .. لا سلهمـ .............)

حميد كان متوقع انه الي يقصدها سلطان هيه ميثه .. بس خلا عمره ما يدري عن شي .. لانه اصلا حب سلطان لميثه امبين في اعيونه .. ومن يوم هم اصغار وهم امحيريين لبعض ..والاغلبيه يدرون بهالشي ..

حميد كان يحترم مشاعر سلطان وايد ..لكن شوه ايسوي بقلبه الي كل ما قاله ابعد عانده في هالشي .. لانه حبه الها .. كبر وياه .. كان ايشوفها اوقات بالصدفه يوم تيي بيتهم عند خواته .. صدق كان مغرم ابها ..بس عمره ما بين لحد هالشي الا للريم اخته الي مره وحده حطته جدام الامر الواقع واجبرته يعترف ..ميثه كانت اتلاحظ الريم اتلمح الها اوقات لهذا الشي .. بس حبها لسلطان ولد عمها خلاها تعتبر حميد شرات ناصر اخوها .... . يالله يالدنيا .. اعيال خاله ..و ربع.. وأكثر من اخوان وايحبون نفس البنت ...

حميد انتبه انه في حد كان واقف فوق العرقوب .. جان ايقصر على المسجل الي سلطان كان مندمج وياه ..

سلطان : هاه شياك عليه .. ؟؟
حميد : ما تشوف حد واقف اهناك ..
سلطان : هيه هيه .. هزرك منوه هاي ..
حميد : اكيد الا حد من الاهل .. بس ليش اتأشر علينا ..

الريم كانت اتحاول تلقط ارسال .. بس للاسف كان وايد اضعيف .. ويوم شافت سيارة مجبله صوبهن .. عرفت انه حد من الي يايين وياهم .. تمت اتاشر عليهم .. : وأخيرا .. ..

24-09-2008, 07:35 مساءً

حميد : بنسير انشوف شوه السالفه ..
سلطان : يالله ..

يوم شافت الريم السيارة اتقربت منها اتغشت وزقرت على البنات وقالتلهن انه حد ياي ..عسب هن بعد يتغشن ..

وقف حميد السياره عدال الريم وعرفها انها اخته .. ورمسها من الدريشه .. :شعندج تأشرين علينا .. رب ما شر ..

الريم : الشر ما ايك ..الا ميثاني بنت خالوه شيخه اتخرطفت وجنها الا انفجت ريلها ..

انقبض قلب سلطان من سمع الريم شوه قالت ..قبل لا ينقبض قلب حميد .. وكان اسرع عن حميد في الرد عليها .. :انزين .. وشحالها هيه الحين ..

حميد ما اتعيب من ردت فعل سلطان .. لانه كان متوقع هالشي ..

الريم : لا الا شويه .. عاد انته اتعرف البنات بزيات .. لو تضربهن شوجه احتشرن ..
حميد : انزين وشعنه ما رديتن ..؟؟
الريم : حاولت تمشي الا ما رامت ..
سلطان : لا حووووووووووووول لا يكون شي اقوى من الفجج .. انزين وينها هيه الحين ..

الريم وتأشر عليهن: اكن وين ..
حميد : منوه بعد ياي وياكن ..
الريم : نورة بنت خالوه فاطمه ..
سلطان : اها ..انزين ليش انتن يايات لين اهنيه وايد ابتعدتن ..؟؟
الريم : ربك عاد .......... اونا نتمشى وانسولف ..واتعورت ميثاني ..
حميد :انزين اركبي بنسير صوبهن ..

يوم اوصلو صوبهن انزلوا كلهم .. ميثه انقبض قلبها يوم شافت سلطان حادر صوبها
حميد : السلام عليكم
ميثه ونورة :وعليكم السلام
سلطان ما همه السلام على طول : سلامات ميثه ما اتشوفين شر ..
ميثه بصوت فيه الم :الشر يخطاك
حميد : قومن ركبن بنرد عند الجماعه ..بياكلنا ابوج الحين لو درى بج .. عاد كله ولا ميثه عنده ..

ضحكت ميثه ونزلت راسها ..

سلطان ايقول في خاطره :يا قلبي انتي .. ليت الضربه كانت فيه ولا فيج ..
نوره: ميثاني لا تيلسين تتدلعين وايد عند ابوج ..

24-09-2008, 07:39 مساءً

ام ناصر : ما شاء الله عليج يا أم اريام من همزتي البنت صحت امره ..
خلود : كلها طايفتنا اتعرف اتهمز عن الفجج ..
ام ناصر : ما شاء الله عليكم...
أم حميد : هاه تراهم الرياييل كل عادهم صلو ..قمن بنصلي نحن بعد الحين بيقولون غرفن .. بنات صلن وتعالن قطعن السلطه ..
الريم : امايه انا وميثاني ونواري .. ما انروم انقطع .. تونا يايات..
ام ناصر : والله محد لزم عليكن اتسيرن ابعيد ..
مريم وهيه تبا اتغايضهن :ايوه عليهن ..
الريم : ما عليه مريوم مردوده ان شاء الله ..
ام حميد: شوه بعد هاي مردوده .. اليوم ولا حد بيقطع السلطه غيركن .. نشن صلن وتعالن ..

تمن البنات يتطالعن حسن انهن لازم يستسلمن للامر الواقع .. ميثه :ان شاء الله خالته

ام ناصر : مريوم قومي خوزي هذيجه الحطبه من تحت الجدر .. ايسده اليمر الي اتحته ..
مريم : ان شاء الله ..

وعقب ما صلن الحريم وزهبن غداهن وقطعن السلطه الي اتفنن فيها ميثه ونوره والريم ..
زقر بو سلطان على الحريم : زهب غداكن والا بعده ..

ام سلطان : الحين بنغرفه ..

نشن الحريم وغرفن الغدا في صحنين كبار واحد للرياييل والثاني للحريم ..ام ناصر هيه الي يلست اتغرف والحرمات عدالها ..(ميثه من النوع الي ايموت على جبد الذبيحه ) كانت اتأشر على نواري الي كانت قريبه من الصحن تباها تيبلها اشويه من الجبد ..وجان اتمد نورة ايدها تبا تيب لميثه شويه من الجبد وجان تضربها امها على ايدها ..
نوره :اي
ام سلطان :وابويه .. شعندج اتمقرين اللحم ..

جان يتناقعن البنات عليها يضحكن ..

نوره : كنت ابا اقص جبد لميثاني ..فديتها اليوم هيه متعوره ولازم اندلعها . .
جان ترتسم ابتسامه حلوه على ويه ميثه عيبتها رمسة نواري ..

صكتت ام سلطان لانها هيه اتعز ميثه وايد ..

ام ناصر : ميثوه عن العياره عاد ..
ميثه : عذ ّرت حشا ما تخلصني هالجبد انضربت نواري على ايدها عسبها ..

جان اتنش ام سلطان وتقطع جبد لميثه ..

24-09-2008, 07:39 مساءً

ميثه : فديت خالتيه انا .. محد ايحبني كثرها ..
أم حميد : ما تنغلبين اسميج تعرفين تتعيرين زين ..
ميثه : خخخخخخخخ

عقب ما غرفن الغدا يا ناصر وراشد وشلوا الغدا ..

الجبسه صدق كانت ما عليها ..وخاصه حمست اللحم الي عدلتها خلود والبنات .. وحطنها فوق العيش ..
اتغدوا الرياييل وتغدن الحريم .. الرياييل اغسلوا ايديهم ويلسوا يشربون جاهي ..الشباب فرشوا الهم حصير رواحهم تحت سمره هناك عدال شوابهم الي خذولهم غفوه عقب الغدا عسب ما يزعجونهم ..وسار حمد صووب الكروزر ونزل الهم البيبسي ..وزع على الشباب والباقي وداه صوب الحريم.. الحريم عقب ما اتغدن لمن وعيانهن ورتبن المكان ويلسن ايسولفن ..

سلطان كان مستهم وايد على ميثه .. ما يدريبها نشت شرات الحصان ما فيها شي ..كان منسدح على ريل حميد ويالس يقرا الملحق الرياضي ..والشباب الي بعد يالس يقرا الجريده والي ايسولف ..يوم اتذكر سلطان ميثه نزل الجريده وظهر تيلفونه يبا ايطرش لنوره مسج يتخبرها عن ميثه ..جان ايشوف فيه نقطتين ارسال ..قال في خاطره بحاول ارسل وبشوفه جان بيطيع يرسل جان يكتب مسج بسرعه لنورة ..(خبرينيه شوه الحال على ميثه )..

نوره والبنات يالسات على الحصير ويشربن بيبسي ..شويه الا اترن نغمة المسج ..
ميثه : عيل وراه مساعه ما طاع يرسل يوم كنا نباه ..
نورة : يعلني بلاه ..

جان اتنش وتظهره وتقرا المسج ..ابتسمت وهزت راسها ..وردت عليه بمسج ثاني (تشقح ما عليها شر )
عقب ما قرا سلطان المسج ارتاح باله ...

حميد :أحمدوووه ..شل النا شله من زمان ما سمعتنا شي من شلاتك ..
ناصر : هيه والله
أحمد : فالكم طيب ..

يوم الخلايق ذهل ارقود .. ساهر ونومي لي حراما
كل السبب بو خصر مجلود .. يلي حكمني بالعداما
زين الوصايف لين العود .. سوى بقلبي كم وياما
لجله انا عديت لـــــنشود .. وأيير ونات عداما
دايم غلاه ايزيد بالزود .. يذبحنيه زود الغراما
اشتاق له لو يكثر اصدود .. واحب صوته والكلاما
واحب شخصه لو يبا اعهود .. واحلف وابصم بالبهاما
يوم الخلايق ذهل ارقود .. ساهر ونومي لي حراما

24-09-2008, 07:40 مساءً

كل السبب بو خصر .. مجلود يلي حكمني بالعداما

وسلامتكم .. وتراها اهداء لراعية سويحان .

ناصر: صح السانك ..
مطر وهو منسدح وحاط سفرته على ويهه : امين ضويتها بعد هاي .. الا بتخبرك احمدووه .. هاي كم رقمها بين لوثك ..
احمد : لو اتشوفها يا بوغيث غرشوب والله انها ..وهاي غير عن الكل ..

مطر عقب ما خوز السفره من على ويهه ..وهوه مبتسم : ما يحتاي اشوفها عندي شيخة المزايين
سلطان : امحق شيخه ..
مطر وهو يرمس سلطان : شدراك انته .. وطنشه ورد ايرمس أحمد : انزين يا بو شهاب ذاك الشهر من الهير والي قبله من المناصيير .. المرة اليايه اميين ناونها ..

تموا كلهم يضحكون على مطر .. الي كان ايبالغ في رمسته ..
أحمد : ذوب فؤادي وملكه .. في وسط غزله شربكه

أحمد امغازلجي رقم واحد ..رغم انه عمره 19 الا انه ما مخلي بنت ما امغرمبها ..شامسي ما ينلام وامشابه يده الله يرحمه .. الشيبه كان ما خذ ثلاث حريم وحده من الوثبه والثانيه من الوقن والثالثه من زاخر ... كلهن متوفيات الا الي في زاخر ..وما تربطها علاقه قويه باعيال ريلها وبعيالهم ..

تذكر راشد القطا الي صايدينهن الصبح الي بعدهن في السياره ..: حميد الله يغربل بليسك نسينا القطا في السياره ..
حميد : ما عليهن براد الحين ما بيضيعن ..

راشد وهو يرمس احمد : دوك السويج سر هاتن من السياره ..وعطهن وحده من الحرمات خلهن اينتفنهن وييعدلنهن ويغسلنهن زين ..نبا نتعشاهن اليوم ..
سار احمد وعطاها الحريم ايعدلنها ..

الشواب عقب ما غفوا لهم ساعه تحت السمرة وذاك الجو السنع ..نش ابو سلطان وأذن لصلاة العصر ..وصلى بالرياييل جماعه ..وعقب ما صلو كلهم ..كل واحد منهم ركب سيارته وشل اهله وضوو صوب ابيوتهم ..إلا الشباب (حميد وراشد واحمد وحمد ومطر ) ساروا صوب عزبة يدهم ..

سلطان قالهم ..أنه بيوصل اهله البيت وبيرد صوبهم .. وناصر قالهم انه مواعد ربعه يظهرون رباعه ..وعسب جيه ما بييهم ..

وصلوا الشباب العزبه وساروا صوب الحلال وتمو يتفقدون حلالهم .. الي يمرن اشهور وهم ما يدرون عنهن..وخلاف ساروا صوب الطرف الثاني الي زارعين فيه ..

راشد : ييه ها من متى ما يينا هنيه ..
مطر : هيه والله حتى ما اعدي متى ياي هنيه ..

يتبع ....

24-09-2008, 10:43 مساءً

حمد : شباب شوه رايكم .. نتصل بسلطان وأنخليه اييب النا (السليب باق) وانبات هنيه دامه باجر اليمعه ..
أحمد : هيه والله والساعه 10 انرد ..
حميد : والله فكره حلوه ..
راشد : يالله غايته ..
مطر : عيل اليوم السهرة صباحي ..
حميد : بنخليه ايب النا ورقه .. بنبات نلعب سبيت ..

وأتصلوا في سلطان وخبروه .. سلطان عيبته السالفه وقالهم انه بييبلهم الي يبونه وبيهم ..
عطوا بخش القطا وقالوا له ايسويلهم صالونه عليهن .. وايقرص الهم على الضو ..
عقب ما صلوا المغرب وصل عندهم سلطان .. وروا الضو ويابلهم بخش اللبن .. وسخنوه ويلسون يشربون ويسولفون .. عقبها اتعشوا ويلسوا يرمسون على الضو ويلعبون ورقه لين قرب الفير .. عقب ما شبعوا من الرمسه ..ارقدوا ..

وعقب ما طلعت الشمس..الي كانت اترد الروح للواحد ويا الجو الرهيب الي كان مغطي على المكان .. وعى راشد وصلى وورى الضو للشباب وسخن الهم ماي عسب اينشون يتوضون .. ويصلون ....

نشوا ينتفضون حليلهم من البرد ..الي ينش ويصلي ينطوي في لحافه و ينخش على طول عقبها تحت الضو من زود البرد ..

سلطان : اروح ريحت قروص..
راشد : عنبوه بايت تحلم ابهن ..
حميد : هيه والله صدقه سلطان .. حتى انا اروحهن ..
حمد : هذا اكيد بخش يالس يقرص الكم ..
راشد يرمس احمد : أحمدووه ..

أحمد وايد أضعيف وكان ايحس البرد يمشي في عضامه (ورمس قبل لا يكمل راشد رمسته ) : ر ر رش وود .. الـ شـ يمـ ـه ..ما اتقولي سر طالع بخش.. شوه ايسوي ..

كلهم ضحكوا على احمد .. حليله فهمها بسرعه ..

سلطان : ههههههه .. حليلك ياليابس ..
حميد : بو مييد قم بنشوف بخش شوه سوالنا ريوق بنيبه للشباب ايدفيهم اشويه ..
سلطان ويمد ايده لحميد الي كل عاده وقف : اقبضنيه ..

ساروا حميد وسلطان صوب بخش الي كان يالس ايعابل الهم ريوق .. ( خطار عاد عنده لازم يستهم منهم ) ..
دخلوا عليه في السبله ..

سلطان : هود هود ..
بخش : هدا ..