والله إني أحبك رغم كل الظروف...

24-09-2008, 10:44 مساءً

نش وتوايه وياهم .. : مرحبا الساع بالشباب ..
سلطان وهوه يرمس حميد : يا سلام .. ما قلت الكم اروح ريحت قروص على الضو ..
بخش :امره .. عشر دقايق وبيزهب الريوق ..
حميد : زين عيل ..سخنته اللبن والا بعدك ؟؟
بخش : كله بيزهب الحين ان شاء الله ..
سلطان : يا زين الرقده هنيه .. اسميها الا دافيه هالسبله ..
حميد : بنسير نزقر أحمدووه ايي يتدفا هنيه ..
سلطان : ههههههههههه .. والله كسر خاطريه هاليابس ..
بخش : من بتاكلون هالقرص واللبن بتدفون ..
حميد : عيل بنظهر نحن الحين .. فت القروص وهات اللبن والسمن جانه شي ..
بخش :السمن موجود .. ما تبون بعد عسل ..
سلطان: زين والله ..

ظهروا الشباب عن بخش وساوا صوب الشباب .. لقوا هناك ناصر ..

سلطان : الله حيه بو محمد ...

اتوايهوا وياه وردوا عليه التحيه ..

حميد : اسميها فاتتك الرمسه الامسيه ..
ناصر : بغيته ايينيه ارقاد ..ما رمت ارقد واحيدكم كلكم متيمعين هنيه .. قلت ما شي الا انشر صوبكم ..
حميد : يا حيك والله ..

ناصر قالهم جيه بس الحقيقه شي ثاني .. ناصر بات طول الليل يتخيل شكل الملاك الي شافها في يوم العزيمه ..كان يتخيل شكل علياء بنت خاله خليفه.. علياء الي جمالها يشل عقل الانسان ما شاء الله عليها نسخه من أمها الله يرحمها ..شوه جمال شوه جسم .. كل شي فيها أحلى من الثاني ..ناصر شافها في العزبه بدون غشوه كانت مجفيه و يالسه اتغسل ايديها عقب الغدا صوب الكروزر .. وهو كان يايي صوب سيارته يبا ايظهر الصابونه عسب ايغسل ايديه زين ..ناصر ما عرفها اتحراها مريم اخته لانها كانت مجفيه ..
ناصر : ناولينيه بالله عليج الصابونه الي في السده ..

التفتت علياء حست انه الكلام الها ولا اتغشت ما عرفت منوه.. توقعته واحد من خوالها ..وحست انه الي ايرمسها ايعرفها ..يوم شافها ناصر قال في خاطره سبحان الله جنها عمتيه حمده اموطايه ..اكيد هاي بنت خالي خليفه ..

علياء عقب ما شافت ناصر ..لفت ويها وردت غشوتها بطرف اصبوعها على وييها لانه ايدها بعدنهن فيهن ماي ناصر : السموحه منج اتحريتج مريوم ..

علياء : لا افا عليك بالحل ..بغيت شي الشيخ ؟؟
ناصر وبعده هب قادر ايركز عقب ما شاف هالجمال كله :ما عليج اماره ..الشيخه اباج تظهريليه

24-09-2008, 10:45 مساءً

الصابونه من السياره .
علياء : فالك طيب ..

نفضت ايديها عن الماي وسارت وفجت الباب ..وخذت كنينكس ومشت ايديها .. وناصر بعده امبهت فيها ..ناصر : في سدت الباب بتلقينها ..

ظهرت علياء الصابونه وعطتها ناصر .. ناصر : مشكوره الشيخه ..
علياء : العفو .. عنبوه ما سوينا شي ..

وسار عنها ..هيه بعد كانت متعيبه من الموقف .. وانبهرت في ناصر .. بس هيه ما عندها هالسوالف .. ابتسمت وعقت غشوتها وردت صوب الحريم ..

(هذي هيه سالفه ناصر وعلياء )

انرد للشباب ...
حميد : الي عسى عاد ما تريقت ..
ناصر : لا شوه اتريق .. قلت في خاطريه اكيد بخش بريقكم قرص ولبن ..
مطر : يا خي لو اتريقت انته هناك قبل لا تي..
راشد : ليش عاد ..
مطر : نصور بطنه هالكبر شوه بيمزره ونحن يوعانيين ..
ناصر وهو ايمط البرنوص عن مطر : عنلاتك من كثر أكلك ياليابس ..
حمد : كلهم عندكم يابسيين ..
ناصر: هههههههه جيه منوه قالها غيريه ..
حمد : سلطان قبل لا تي كان يغايض أحمد ..
سلطان :الي ايشوف مطور وأحمدووه ما يقول الا يا يبينهم من مقديشو ..
مطر : عاد اتدلها انته مقديشو وين .
سلطان : وسايرلها بعد ..

كلهم اتعيبوا الا حميد الي كان فطسان عليهم من الضحك ..مقصه حليلهم
الجميع : متى ..؟؟؟
سلطان : يوم سايرين نيبك من اهناك .. هههههههههههههههههه
كلهم ما توا من الضحك على رمسة سلطان ..
مطر : تدري انك خام عنلاتنك .. عيل تباني شراتك ..( سلطان ما كان متين بالعكس كان جسمه وايد حلو..)

شويه والا بخش يايبلهم الريوق .. يلسوا يتريقون ويسولفون ..

سلطان وهو يبا ايغيض بأحمد وبمطر : هالاثنينه يبا حد ايخليهم اسبوع هنيه .. حرام ياأنهم ايردون هالمتن ..
مطر وهو يرمس احمد الي كان مندمج ويا الاكل : خل عمرك ما تسمعه ..

25-09-2008, 10:09 مساءً

حميد : خلهم عنك .. هب هيينين تراهم .

عقب ما خلصوا من الريوق .. يلس احمد كل شويه ويشل الهم شله والكل مرتبشين وياه .. وعقبها تموا ايحوطون اشويه في العزبه وركبوا سيايرهم وخذولهم لفه في ذاك المرقاع .. تقريبا ساعه ..وخلاف ردوا بيوتهم .. صدق انه هاي الطلعه كانت طلعه .. من احلى الطلعات الي طلعوهن مع بعض..الكل كان مستانس ومرتاح الحمدلله

بعد كم من يوم

في بيت ابو ناصر
ام ناصر : ميثوه قومي عاد بسج من الرقاد ..
ميثه : اممممممممممم .. امايه شوه تبين ..
ام ناصر : عنبوه نشي هب ارقاد هذا ..من ييج الاجازه وانتي الا راقده ..
ميثه : امايه شوه تبيني انش اسوي ..
ام ناصر : نباج تيلسين ويانا ..والا ارقاد والا مطالع تيلفزيون ..
ميثه : انزين الحين كم الساعه ..؟؟
ام ناصر: الحين الساعه 12
ميثه : ما عليه الحين ناشه ..

ويوم سمعت ميثه اذان الظهر أذن نشت وتسبحت وصلت وسارت عند امها في الصاله ..

.........على الغدا ...
ميثه :امايه .. تراه الكورس الياي ماشي باقي عليه .. بيبدا جريب ..وانا لين الحين ما خذت شي..
مريم : عاد هذا الي يبلي عمره بجامعات ..
ام ناصر : سكتني مريوم عن البنيه وخليها تدرس دام الله هادنها ..
ابو ناصر وهو يرمس ناصر :ود اختك السوق خلها تاخذ الي تباه ..

في البدايه قال في خاطره .. لا حوووووووووول ما فيه عليها .. بعدين فكر قال لا .. هاي فرصه عسب اتخبر ميثاني عن علياء .. : ان شاء الله ابويه .. ولتفت ايرمس ميثه : ميثاني اليوم العصر بوديج ..

استغربت ميثه من رد ناصر .. لانها اتحيده ما يداني ايودي البنات وياه السوق ..وهب من سهايله ايوافق وبهاي السرعه ..

مريم : سبحان الله ..
ناصر : من شوه ؟؟؟
مريم : لا ماشي بس كنت اسبح ..

ضحكت ميثه لانها فهمت ليش مريم قالت جيه .. وكانت هيه بعد بتقول .. بس خافت انه ايغير رايه ..
العصر سارت ميثه ويا ناصر السوق .. وكان امشغل المسجل .. وجان يقصر عليه ..

25-09-2008, 10:10 مساءً

ناصر : ميثاني ..
ميثه : عونك ..
ناصر : عانج الله ..
ناصر : منوه من البنات كانت لابسه يوم العزيمه كندوره حمراء وفيها اشويه الوان بعد ..
ميثه فهمت من يقصد ناصر ..بس حبت اتغلس عليه .. : هيه هذيج موزوه بنت خالتيه وديمه ..
ناصر : اها ..(ورد وطول على المسجل )

سكتوا اشويه وردت وسألته ميثه : ليش تتخبر عنها ..؟؟

ناصر : هاه .. لا ماشي .. بس ذاك اليوم زقرت وحده اتحريتها مريوم ..ويوم صدت صوبي كانت هب متغشيه .. واستحت وجفت وردت غشوتها على ويها ..تلومت منها ..

ميثه اتقول في خاطرها الا قول سحرتك بجمالها ...

ناصر تم شاك انه الي شافها كانت موزه لانها هاي البنت الي شافها كانت نسخه من عمته حمده ..ومستحيل ما اتكون بنتها ..
ميثه تقطع تفكيره : هيه وعلايه بنت خالي خليفه وايد يتشابهن ..

يوم قالت ميثه علايه فز قلبه .. شك في انه ميثاني تبا تغيضه بس .. لانه هوه شاك في انه الي شافها كانت علياء هب موزه..

قصر على المسجل ..ناصر : انزين وكم كبرها هاي ..
ميثه : من سنك تقريبا والا اصغر عنك بسنه ..هاي كانت تدرس في التقنيه وعقب ودرتها ..
ميثه حست انه ناصر في خاطره مُصر على انه الي شافها كانت علياء هب وحده ثانيه ..وانه وده يسأل ميثه اكثر واكثر عن عنها ..
رحمت حاله جان اتقوله : البنت الي شفتها ما كانت مووزوه ..هذيج علياء بنت خالي خليفه ..بس تراني بغيت اغلس عليك..
ناصر عقب ما طالع ميثه بنظره قويه : عنلاتج ..عيل خلاص ماشي سوق بردج الحين البيت ..
ميثه : فديتك ناصر والله كنت اسوي عليك سوالف ..

ناصر : انزين ..جان بتخبريني زود عن علياء بوديج المكان الي تبينه ..

ابتسمت ميثه عيبها الشور ..قالت فرصه استغله : اممممم اباك اتوديني العين مول ..
ناصر وهوه يتظاهر انه امعصب : شوووووووووووووووه ؟؟
ميثه: لا لا خلاص ما قلت شي ..

تمت ميثه اتخبر ناصر عن علياء .. وكل ما اتقول شي قلب ناصر يتولع ابها اكثر وأكثر ..
قال في خاطره .. خلاص هيه هاي الحرمه الي اباها وادورها من زمان ..والي بكمل وياها طريجي ..وتملي عليه الدنيا .. حرمة ما شاء الله عليها وراعية بيت (طبعا هذا من الي سمعه من وصف ميثه الها ) + جمال ما شافه على انسانه من قبل +انه هوه حبها من اول ما شافها ..

25-09-2008, 10:11 مساءً

وهم رادين صوب البيت عقب ما خذت ميثه الي تباه ..
ناصر : ميثاني ابا الكلام الي كان امبينا ايتم سر .. اوكيه ..
ميثه :أفا عليك .. ونحن في الخدمه ..

ووصلوا البيت ..
ناصر : يالله فارجي..
ميثه : هيه الحين فارجي ..عقب ما خبرتك كل شي .. ما عليه الحين بسير اخبرهم كلهم الي في البيت ..
ناصر : عاد بتذلنا هاي .. ويا هالويه ..
ميثه : خخخخخخخخخ .. خلاص يا بوك بفارج .. مشكور على الخدمه ..

نزلت اغراضها وسارت داخل .. ناصر خذ له لفه ورد البيت .. وطول الوقت ايفكر في علياء ..

كان هذاك الاسبوع اخر اسبوع اجازه لناصر .. عقب ما رد البيت تم ايفكر .. هوه صدق حب علياء والا مجرد اعجاب مع الايام ممكن ينتهي .. بس الايام الي مرت اثبتت للناصر انه حبه لعلياء كان صادق .. والدليل انه حبه الها بدا يكبر وياه يوم بعد يوم ..

عزم انه ايرمس امه في السالفه .. وفعلا رمسها والكل استانس على هالخبر ..وعقب كم من ويك اند سار ابوه وعمومته صوب خاله وخطبوله علياء.. وبجذيه ايكون راشد خاطب مريم .. وناصر علياء .. يعني متبادلين ..
واتفقوا انه الملجه والعرس ايكونن في الاجازه .. وانهم ايسوووون عرس جماعي الهم وايكون في بيت بو ناصر .....
مرت الايام الي بعدها روتينيه .. الي عليه مدرسه داوم .. والي عليه جامعه بعد داوم .. وردت الحياه لمجراها الروتيني ..

في الجامعه وبالتحديد في المدرجات الساعه كانت 12 ونص ..نوره وميثه خذن غدا من الرباعيه وسارن المدرج يترين الريم تي عندهن لانهن متعودات كل ثلاثاء يتغدن رباعه ..ويتمن ويا بعض لين تبدا محاضره نوره وميثه الساعه 2:40 ..الريم اتكون مخلصه من الساعه 12:40 اتم وياهن لين ما ايها خالها ..
يلسن البنات يتغدن ويسولفن ..

الريم : ميثاني ما حددتوا متى بيكون عرس اخوانج ..
ميثه : اضنيه الا في الصيف ..
نوره : بتسونه في بيتكم ..؟؟
ميثه : هيه حتنه جدام بيتنا مكان وسيع ..ويظم للخيام ..
الريم : عيل هالسنه ما بتسجلين صيفي ..!!
ميثه : لا دخيلج : عقب صيفي العام ما أضنيه اسجل مرة ثانيه ..
نوره : اتحيدين ميثاني شكثر اسودينا ..
ميثه : ايييه لا تذكريني الله يخليج .. غديت محور من السواد..عقب الصيفي اسبوعين وانا اعابل

25-09-2008, 10:12 مساءً

في ويهي ..
الريم : وانتي نواري ..؟؟
نوره : طال عمرج صبغتيه اصليه ما تتغير .
ميثه : احم احم ..خليني ساكته..منوه الي ما خلى خلطه ما استخدمها ...
نوره : اقول اقول الله يخليكن غيرن السالفه ..هالموضوع ايب اليه الاكتئاب ..
الريم وميثه : هههههههههههههههههههههههه
نوره : هاه ريماني على أي تخصص استقريتي ..
الريم : اضنيه الا شريعه وقانون ..
نوره : ههههههههههه .. حرام ليظهرمن عندنا مذهب خامس والا بنألف النا دستور للدوله ...عنبوه كلنا شريعه والا دراسات اسلاميه ..
ميثه : ما بيدينا حيله .. بعدين هن هالتخصصين الي بينفعنا في دينا ودنيانا ..ان شاء الله
نوره : اسلمت ميثاني ..لا اله الا الله
ميثه والريم : ههههههههههههههه

عقب ما وصلت الساعه 2:30 ترخصت منهن الريم لانه يواحي خالها يترياها عند البوابه .. قاللها انهن هن بعد بيظهرن بيسيرن كلاساتهن طلعن رباعه ودتهن الريم مبنى 66 وسارت هيه صوب البوابه ..

مرت الايام وقرب عيد الاضحى .. قرروا ام ناصر وابو ناصر ايسيرون الحي ..طبعا كل الي في البيت حزنوا لانهم بيكونون اول مره ايعيدون بلا امهم وأبوهم .. يعني الخبر كان صعب عليهم ..

ميثه من درت عن الخبر وهيه كله الا اتصيح .. هيه وايد اتعز ابوها ..وما تصبر عنه .. حتى امها ما كانت ارخيصه عندها الا هب كثر ابوها ..

دخلت مريم على ميثه في حجرتها ..

مريم : ميثوه قومي ابويه يباج اترتبين له شنطته ..
ميثه : مريوم ظهري ما فيه عليج ..
مريم : والله انه ما طاع ايخلي حد ايقفض له شنطته ..على قولته ما يبا الا ميثاني . بغيناه كلنا الا ما طاع .. جنا نحن هب عياله ..
ميثه وهيه تمسح ادموعها .. : عيل غياض فيكم انا الي برتبها له ...
مريم : سيري الله يخليج .. الا لا تخيسين له اثيابه دموع ..
ميثه : عسب يتذكرني هناك ..
مريم : والله اخافهن ايعبرن ادموعج من كثر ما اتصيحين ..لولو فديتها ما صاحت كثرج ..
ميثه : دموعي هن والا دموعج ..

وظهرت عنها وسارت حجره ابوها .. أول ما شافته لوت عليه وتمت اتصيح ..ويلس ايهدي فيها ويالله يالله سكتت ..
يوم اليمعه كان موعد سياره الحياي ..وصلهم ناصر المطار ورد العين صوب اخوانه .. اترخص

25-09-2008, 10:12 مساءً

من دوامه عسب ايتم وياهم ذيج الايام .. وكانت بين اليوم والثاني اتمر عليهم وحده من خالاتهم وعمومتهم بعد ما قصروا كانوا ايمرون ايشوفون اعيال اخوهم ..كلهم الساع ما قصروا وياهم ..

قبل العيد بليله سارت مريم وميثه السوق ويا ناصر وخذن كل شي ناقص للبيت ..وكل متطلبات العيد .. صدق ما شاء الله عليهن حريم يقدر الواحد يعتمد عليهن اذا غاب .. ربيتي يا أم ناصر يوم ربيتي ..

يوم العيد ... نشت مريم من الفير ووعت خوانها وخواتها ..الشباب اتسبحوا وتلبسوا وتدخنوا وظهروا ساروا صوب مصلى العيد .. (عقب الصلاه ردوا صوب خواتهم وسلموا عليهن ويلسوا شويه عاد هب زين ايخلون بس البنات رواحهن ..وخلاف ساروا صوب اهلهم وعربانهم ايعايدون عليهم ..

طبعا كلهم حزت في خواطرهم انهم ايعيدون بلا ابوهم وامهم .. بس شوه ايسون ..

مريم في البيت ما شاءالله عليها سدت عن امها .. كل ما ايي ريال لبست عباتها وردت غشوتها على ويها وظهرت وسلمت على الريال.. وتحاول اتقرب به في الميلس.. بس الاغلبيه يوم العيد ما ييلسون يتقهويون يكفي سلام وخلاص .. خاصه بعد انه البيت ما فيه لا راعي البيت ولا حرمته ..

ميثه كانت تتحرقص تبا عمومتها ايون .. لانهم امعودينهم ايوون كلهم رباعه صباح العيد .. طبعا هيه ما يهمها حد كثر سلطان ..
كانت ما سكه زام على التيفلون .. اتسكر عن وحده واتدق لو للثانيه .. غير الخطوط الي اينها وهيه ترمس ..

ميثه : سلامي لحظه فديتج بشوف منوه على الخط ..
سلامي : لالا دامه عندج خط بخليج عيل بسير عند امايه ..بتصلبج اخلاف ..
ميثه : اوكيه ..مع السلامه
ردت ميثه على الخط كانت تتوقعها وحده من ربايعها : الوو مرحبا ..عيدج امبارك (تبا تسبق المتصله ..)
.......: مرحبا ملاااااااااااااااييييييييين بأحلى صوت ..وعساج من العايديين ..

ميثه من سمعت الصوت المتصل خنقتها العبره ولا رامت ترمس ..
ميثه : ......................
ابو ناصر : فديت هالصوت انا .. والله اني ولهان عليج وااااااااااااايد ..
ميثه تمت اتصيح بس ما كانت تبا ابوها يسمعها وهيه تصيح .
دخلت عليها مريم : ميثاني شوه فيج ..
عرفت مريم انه المتصل ابوها ..لانه شوه الي بيخلي ميثه اتصيح في يوم العيد .. جان تاخذ عنها السماعه ..
مريم : الووووو
ابو ناصر : مرحبا الساع بمريوم .. شحالج ابويه واشحال اخوانج .. ؟؟

25-09-2008, 10:13 مساءً

مريم : كلنا بخير جانك انته وأمايه ابخير ..
ابو ناصر: انا وامج بخير وبنعمه وما نشكي باس .. عيدج امبارك ..
مريم : عساك من العايدين ان شاء الله ..وشوه اخباركم ..
ابو ناصر : لخبار الزينه والله كله يوميين ونحن عندكم ..

مريم يوم قالها ابوها جيه صدت صوب ميثه وهيه فرحانه ..:ميثاني سمعي ابويه ايقول عقب يوميين بيردون ..
فزت ميثه من مكانها وخذت عنها السماعه .. اتأكدت من الخبر ورمست ابوها وعقب رمسن امهن ..

دخلت ميرانتي على مريم : مريم ... فيه ريال زياده برى ..

عطت مريم السماعه ميثه عقب ما ترخصت من امها وطلعت للرياييل .. طلعوا الي يايين ..عمها ابو سلطان وولده مطر ..وعمها سعيد ..وخالها خليفه وعياله راشد واحمد .. وولد خالتها حميد ..

سلمت عليهم وقربت ابهم في الميلس ..
خليفه : عيل وين خوانج وخواتج ..
مريم : اخواني يو اهنيه عقب الصلاه .. وخلاف ساروا ايعايدون .. ولولو وشموس سارن صوب يرانا .. وميثاني احيدها اترمس امايه ..
ابو سلطان : هيه وشوه الحال عليهم .. حليلهم ما اتصلناهم اليوم ..
مريم : بخير وبعافيه .. ولا فيهم شر و ايردون السلام عليكم ..
الجميع : الله يسلمهم من الشر..
أحمد : بيكون ميثاني دلوعت ابوها ما صاحت اليوم .. ؟؟
مريم : لا ما قصرت التالي كله ظهرته ..

حميد عايبتنه الرمسه دامها اتخص ميثاني واستانس لانه الحين بيشوفها يوم بتي اتسلم عليها .. لو انها تتغشى عنهم بس يكفي انها اتكون موجوده في المكان هوه موجود فيه ..

سعيد : وينها هيه قومي زقريها بنسلم عليها ...
مريم : ان شاء الله .. خذولكم انزين فنيان هب زين واصلين لين اهنيه ولا تتقهويون ..

خلتهم يتقهويون وسارت تزقر ميثه ..

مريم : ميثوه تعالي عمومتج وخالج هنيه .. يبون ايسلمون عليج ..
ميثه : فز قلبها ..يوم سمعت طاري عمومتها ..واتحاول اتخلي عمرها عادي .وجان تسأل مريم : منوه بعد ياي وياهم .. ؟؟
مريم عرفت انه الي تبا تسأل ميثه عنه هوه سلطان .. قالت بتغيلس اشويه عليها : عيالهم ..
ميثه : اها ..
مريم : ارتاحي الي بالي بالج محد .

25-09-2008, 10:14 مساءً

ميثه بحزن : افا ..
مريم : ميثوه يالله الرياييل بييلسون يتريونج وايد .. عيل ما يخلصهم سلامج ..
ميثه :انزين يالله بلبس شيلتيه ..

سارت مريم وميثه صوبهم ..سلمت عليهم ويلست عدال عمها سعيد وتموا ايسولفون في الميلس لانهم كانوا يتريوون ناصر وحمد ايون .. كانوا يبون ايسيرون رباعه ايعايدون على الشيوخ ..

مطر حب ايغلس اشويه على ميثه ........
مطر : يالله محلات يمعتنا ...ما تنقصها الا بو مييد..

كانت ميثه ترمس ويا عمها ويوم سمعت طاري بو مييد سكتت..وصدت صوب مطر..

مريم : جيه وين هوه ؟؟...
ابو سلطان : يعلنيه هب بلاه قبضووه طواري ..
حميد : اشدنه العيد بلا سلطان هب شي
ميثه...اتقول في خاطرها هيه والله صدقك

شوي الا وصلوا ناصرو حمد ويلسوا اشويه خلاف طلعوا صوب الشيوخ ...قبضت ميثه المدخن وتمت اتدخنهم وهم ظاهرين ما بغوا امبونهم لا دخون ولا عطر ..مطركان اخر واحد ظهر وكان متعمد هالحركة..

مطر وبصوت واطي : هاه ميثوه ماتبيني ارد السلام على حد؟؟؟
ميثه(وكانت مستغربه من اسلوب مطر ) :....................
مطر : ماعليه ميثوه بس هذا؟ يوصل إن شاء الله ...
ميثه :بتخبرك انزين انا الحين رمست فجيت حلجي ..قلت شي ..
مطر :لا ما يحتاي بألف من عنديه خخخخخخخخخ..
وزقر عليه ابوه واشر الها بييده مع سلامة وسار عنها ....

عقب ما ردوا الريايل من عند الشيوخ ساروا صوب بو سلطان وتريقوا هناك وخلاف اتفرقوا الا رد بيته والي سار يكمل سلامه ... شي طبيعي انه الاغلبيه ايكونون تعبانين ويرقدون عقب صلاة الظهر ...

في بيت بو سلطان وصل سلطان البيت الساعة 1:30 سلم على اهله ودخل واتسبح وبدل ملابس وهبط عليه مطر في حجرته وخبره بالي سواه في ميثه وكيف رفع الها ضغطها...

سلطان : عنلاتك يا الحمار..
مطر يبا ايغير السالفه لاينهزب اكثر : لو شفت شلكها كيف كان يوم طريناك ؟؟
سلطان بسط على الكلام والابتسامه شقت حلجه ...وعزم ايهير صوب عربانه..
سلطان : شي في خاطرك انا ظاهر ؟؟
مطر : عين خير توك ضارب خط ابوظبي العين وط راسك لين العصر وخلاف سر..وين تبا

25-09-2008, 10:15 مساءً

لحين؟؟
سلطان :بسيراسلم على عمومتيه.. فضيحة اخلي اهليه لين العصر ما اعايدهم وانا في الدار..
مطر : كيفك ... كنت ابا راحتك...
سلطان : ما بتخاوينيه ؟؟
مطر : لا حشا بوطي راسيه ابرك اليه .. ناش من الفير ..

ظهر سلطان من بيتهم وقرر انه اسير صوب بيت عمه ابو ناصر اول وكله أمل انه يلقى ميثه وصل سلطان ونزل ودق الباب ... ناصر وحمد ومريم كانوا رقود ... محد الا ميثه وخواتها الصغار كانت يالسات في الصالة ايطالعن التيلفزون ..ميثه كانت منسدحه على الكنبة ... وفاله شعرها.. وكل عاده ياينها الرقاد وجان تسمع حد ايدق الباب نشت وعدلت من يلستها ولمت شعرها ..

ميثه : منوه ياي الحين لا حووووووول ...شموس قومي طالعي منوه برى ..
شمسة وهي معقده حياتها : والله ما فيه عليج انا يالسه اطالع ..
ميثه : قومي عيل منوه تبينه يظهر ايشوف ..؟؟!!
شمسه وهيه ناشه وترمس عمرها :اوووووووووووف ..كله انا ..

سارت شمسه وفجت الباب ... ويوم لقته ريال قربت به في الميلس ..هيه عرفته انه سلطان بس ردت مستعيله داخل كانت تبا اتكمل برنامج الاطفال الي كانت اتابعه ...

قالت عشان ميثه : ميثوه هذا ريال ودخلته في الميلس ..
ميثه : ياويل حالي.. محد هنيه الا انا يعني لازم اظهر..لا حوووووووول شوه بسوي ..
ولا سألت اخوهمنوه
استسلمت ميثه للامر الواقع ..وخذت ميثه شيلتها من على الطاولة ولبستها وتغشت وسارت صوب الميلس ..

كانن خطواتها ثجال .. هب متعوده تنحط في هالمواقف.. دقت الباب..وطالعت منوه الريال ... نش الريال الي كان يالس ايعابل في موبايله .. يوم شافته ميثه اتيبست مكانها ..معقوله ...لالالالالالالالالا مااتوقع .. هيه ما كانت تتوقع الي ياي هوه سلطان لانها شموس اتعرفه وما قالت الها انه سلطان )ماعليج ياالحماره انا براويج )....

ميثه عقب ما حاولت تلقط نفسها : السلام عليكم ......

سلطان من صوبه عرف انه هالبنت هيه ميثه لأنه شافها طويله وجسمها حلو .. وايحيد شكلها يوم لقاها وكانت متعوره يوم سايرين العزيمه ...

سلطان كان حاط امل ضعيف أنه ايشوفها ... بس انها هيه تظهر له بنفسها ..لالالالا هاي الي ما كان حاسبلها حساب.. وما كاان حتى يتوقعها ..

سلطان : وعليكم السلام والرحمه .. شحالكم ..وشحال عميه وخالتيه ؟؟
ميثه : كلنا بخير وبنعمه االحمدلله ...