والله إني أحبك رغم كل الظروف...

25-09-2008, 10:28 مساءً

غرامك الي في فؤادك تربى ..يشفع اذا تخطي ويغفر خطاياك ..
واشوف انك ناهب الارض نهبا ..على الذي تفعل ولا اقدر انساك ..
احب فيك الظلم لانك تحبه ..ظلمي ويا الظالم ترى العمر يفداك ..
انته طبيبي لو تفيد الاطباء ..وانا علاجي يا حبيبي في يمناك ..
يالبدر يلي في ثيابه تخبى ..لا تحرم المحروم طلعت محياك ..

بعد كم من يوم من خبر سلطان أبوه عن انه يبا ميثه .. قرر بو سلطان انه يفاتح اخوه في الموضوع .. سار عنده البيت ..وخبره أنه يبا ميثه لسلطان .. وانه الولد هوه يباها وشارنها ..

ابو ناصر فرح وايد على هالخبر .. لانه بجذيه بيكون هوه اتطمن على بناته .. وحده بياخذها ولد خالها .. والثانيه ولد عمها ان شاء الله .. وكلهم ريايل ونعم منهم ..

وقال لاخوه أنه بيشاور هل بيته في الموضوع وبيرد له الخبر جريب ..

بعد يوم
في بيت بو ناصر ..

وبالتحديد في حجره ميثه .. دخلت عليها مريم ..سكرت الباب وراها وسحبت الها كرسي ويلست مجابله ميثه ....... ميثه كانت منسدحه على شبريتها وتقرا مجلة ومشغلة مسجل ..
مريم عقب ما قصرت على المسجل : ميثاني عندي خبر .. يديد ..
ميثه...تتظاهر انها هب مهتمه .. لانها متعودة على حركات مريم اتقولها جيه وفي الاخير اتكون السالفه تافهة .. ولا رفعت راسها عن المجلة .. وردت عليها ..

ميثه : انتي شوه ايي من وراج غير البلاوي ..
مريم وتتظاهر انها عصبت ...:بلاوي بعد !!! .. اوكيه هب منج مني أنا الي يايه أخبرج .
ميثه عقب ما حست أنه مريم تتكلم جد وعندها صدق سالفة : فديت مريومي انا ؟؟
مريم : هيه هيه الحين تتفديني.. ياللواته ..(ونشت أونها زعلانة وبتظهر )
ميثه ونشت من مكانها .. : تعالي تعالي والله ما تظهرين ... كنت مشغولة يالسه ادور تصميم حلو لفستاني حق عرسج ..

مريم ردت ويلست على الكرسي: عيل دامج مستهمة من عرسي بخبرج ..

25-09-2008, 10:28 مساءً

ميثه وهيه تيلس مجابلة مريم .. : يالله وانا اسمعج ..
مريم : الله يسلمج .. توني وانا يالسه في الصالة .. كنت يالسة اطالع التيلفزيون .. واشرب ...(وتقاطعها ميثه)
ميثه : يالله عاد بلا هالتفاصيل ..يالسه ..واطالع ..واشرب( مريم كانت متعمده هالاسلوب )
مريم : احسن لج اسكتي وخليني ارمس على راحتيه ولا تقاطعيني والا تراني ما بكمل..
ميثه وهيه مستسلمه للامر : يالله بنسمعج ما ورانا شغله ..
مريم : امايه كانت اترمس خالتيه فاطمة.. وسمعتها تطري سلطان وانه يبا ايخطب ( كانت تبا اتغييض بميثه ) ..
ميثه طار قلبها من هالخبر بس ما حبت اتبين.. (ما تدري به هوه لصالحها والا لا )
مريم .. تتريا ميثوه تسألها ..
ميثه : الله يوفجه ( وخذت المجلة وتمت اتجلبها ..تتظاهر انها هب مهتمه .. وهيه في الاساس تحترق من داخل تبا اتعرف منوه هاي الي بيخطبها سلطان ( فارس احلامها ) هل بيتحقق حلمها وبتكون هيه الي ختارها سلطان .. والا بيتبخر كل الي كانت تحلم به ؟؟)..
مريم : انزين ما سألتيني منوه بيخطب..؟؟

ميثه .. حاولت تمسك عمرها بس ما رامت .. لانها صدق هيه في خاطرها تبا اتعرف .. بس ما تبا اتبين شي من الي كان في داخلها جدام مريم .. وجان ترفع راسها عن المجلة .. وطلعت منها ابتسامة استسلام.. هالابتسامة الي ما رامت تتحمل إلي في ميثه ذاك الساع..ابتسامة تترجى مريم انها اتقول بس بدون ما اتحطم كيان ميثه وحلمها(هيه قالت لو كنت أنا الي يباني جان قالت مريوم من البداية (احيدها دفشة ).. بس دام انها ما قالت ..يعني خلاص يا ميثه كل احلامج ضاعت )

مريم ما حبت تحرق فواد ميثه زود: سلطان يا حلوة يبا يخطبج انتي ..
ميثه من كلمة ((انتي)) تمت مبهته في مريم .. وطاحت المجلة من يديها ..(مريم شوه تقول اكيد هاي تجذب عليه .. تبا تلعب بأعصابي ) .. وحاولت اتخلي عمرها رزينه ..
ميثه : مريوم رمسي زين ..
مريم : والله العظيم .. وها حلفت لج بعد بالله العظيم .. انه سلطان يباج .. يباج أنتي..

في ذيج اللحظة بعد ما حلفت مريم ..هاجرت ميثه من الارض الي هيه عليها .. طارت فووووووووووووق .. فوق للسماء ..لأبعد مكان كانت اتطالعه يوم تتذكر فارس احلامها الي رسمته في بالها من زمان ..طارت لوين كانت مشيده الها ولأميرها احلى عالم ...( أنا في حلم والا في علم) ..
ردت للواقع ..
حضنت مريم بقوووو .. ودمعن عيونها .. دموع الفرحة..(ياااااااااااااااااااي وأخيرا بيتحقق الحلم)
مريم كانت اتعرف غلات سلطان عند ميثه حتى لو كانت ما اتقول ولا اتبين .. بس عقب ردت فعلها هاي .. بصمت بالخمس انه ميثه هيمانه في سلطان .. عسب جيه ما استغربت من ردت فعل اختها..

ميثه : لالالالا... مستحيل ..
مريم : ميثاني فديت روحج والله انه صدق ..بعد شوه تبين حلفت لج مرتين ..!!
ميثه (بعدها عايش روعة الخبر)وحاطه ايدها على ثمها: ............
مريم : والله يا ميثوه اني فرحانتلج وااااااااااااايد .. وتراني اتعمدت اسويبج جيه ..
ميثه وتمسح ادموعها وتضحك : زين ما وقف قلبي ..غربلات عدوج ..
مريم : ههههههههههههههههههه عسب جيه انا ما بغيت اتمادى وياج وايد..سيري اغسلي ويهج .. أخاف أمايه الحين تيي عندنا ..
ميثه وهيه ناشه: اوكيه ..

يوم ردت ..
مريم : اييه يالبغام يا ويلج ان صحتي جدام امايه يوم بتقولج .
ميثه باستغراب .. : ليش ؟؟
مريم : عشان يالغبية ان شافتج اماية اتصيحين بتتوقع انج ما تبينه .. والا بتقول بنتي بعدها ياهل وما تبا العرس من الحين ..
ميثه :هههههههههه.. هزرج ؟؟ .... خلاص عيل ..
مريم : بنشوف ..

وبعد لحظات .. دخلت أمهن عندهن في الحجرة وخبرت ميثه بالسالفة .. في البداية ميثه تمت ساكته .. وبعدين قالت وهيه منزله راسها ..

ميثه : الي تشوفينه يا أمايه أنتي وأبويه فيه الخير سووه ..
ام ناصر : عين العقل غناتي ..وسلطان ريال.. وبه خير .. وما بتلقين أحسن عنه .. وهوه ولد عمج وولد خالتج .. وبيحطج في عيونه ..

ظهرت عنهن أمهن وتمن ايسولفن هيه ومريم رواحهن ..

الله يا ميثه من قدج الي كنتي تتمنينه بدا يتحقق ..

حبيبي خلني دايم بـــــــــقربك..أنا محتاج في الدنيا لحنانك ..
لاني كل ما أحبـــــك أحبـــــك .. ولا حدٍ خذ بقلبـــــي مكانك ..
أريدك تسأل عيونــك وقلبك .. من الي مرخصٍ عمره عشانك ..
بتلقى عاشق هايــــم بحبك .. حفظ عهد الهوى لجلك وصانك ..
أنا من غارس أحلامه في دربك .. ومن أشعل شموعه في زمانك ..
شرات الشمس في شرقك وغربك .. بتلقى في دفى قلبي أمانك ..
ذبحني الشوق في سلمك وحربك .. وأنا صابر لجل خاطر عيانك ..
ترفق لا تعذبــــــــــــني بربك .. تراني بس محـــــتاج لحـــــنانك ..

25-09-2008, 10:29 مساءً

قرروا انهم ايسكرون على هاي السالفة لين عقب عرس راشد وناصر .. عشان ايسون خطوبة مرتبه ويفروحون ابها كلهم ..

حميد . يا حليلك يا حميد محد مفتكر فيك .. ولا حد فاهمنك ..وهو لين الحين ما متقبل انه ميثه اتكون لواحد غير .. بس يا حليله ما بيده شي .. وخلاص كان امعزم امعزم انه ايسافر ..

خلصت المدارس والجامعة .. وبدت الاجازة.. مطر كانت عنده امتحانات ثانوية .. نجح بنسبة 65%( وايد عليه ) وعقب كم من اسبوع بيكون عرس راشد وناصر .....

تاريخ 28\7 الساعه 2 الظهر
ميثه كانت اترمس نوره في التيلفون ..
ميثه : نواري وينج لين الحين ما يتي ..؟؟ الحين بتوصل الكوافيره ..
نوره : اتريا مطووور يتسبح وبيوصلني ..
ميثه : انا من عقب الغدا وانا اترياج ...
نوره : هذا سلطان ما طاع ايوديني.. وتميت عاد اتريا مطر ..
ميثه : اها..انزين لا تنسين الاكسسوارات الي موصيتنج عليهن ..
نوره : ما عليج انتي ...انا كله مزهبتنه ..
ميثه : صبغ حناج زين ..؟؟
نوره : هيه ايجنن لونه ..
ميثه : انا حنايه ما صبغ وايد ..
نوره : يا حليلج ..دهنيه بكريم جان يصبغ ..
ميثه : يباله والله ..
نوره : شوه عرس الريايل ...؟؟
ميثه : والله ما ادريبهم من ساعه تقريبا واعيه ...
نوره : اها ..والعرايس اشحالهن ..؟؟
ميثه اتطالع مريم وتضحك ..: لو تشوفين هاي الي عندي ..من الحين ضاربتنها انفضه
نورة: حليلها ما تنلام ... وعلايه بعدها ما يت ..؟؟
ميثه :لا بعدها .. اضنيه الاالحين بتي ..
نوره :زين والله ..انا وانتي بنتلبس وخلاف بنسير نضحك عليهن ..
ميثه : منوه تتوقعين تطلع احلى ...؟؟
نوره : كلهن بسم الله عليهن .. هب عوفات .. غزلان .. ما شاء الله ..
ميثه وهيه تبا اتغايض مريم :افا نواري .. ومريوم هب حلوه ؟؟!!
مريم : ادريبح ميثوه تجذبين نواري ما بتقول جيه ..
ميثه : خخخخخخخخخ .. اقول نواري بخليج الحين .. بسير اعطي الخدامه شيلنا عشان تكويهن...وبرتب الحجره غاديه ما يحتاي ...
نوره : خلاص عيل ربع ساعه وانا عندج .. مع السلامه ..
ميثه : في داعت الله ..
يت علياء بيت عمتها بدون ما ايشوفها حد ودخلت من ورى ..وسارت عند مريم في حجرتها ..
علياء من يابت فستانها من دبي ما شلته البيت خلته عند مريم .. وصلن الكوافيرات الي حاجزاتنه من صالون مورا..

نوره وميثه اتعدلن نفس الشي بالضبط .. وطلعا ما شاء الله عليهن ايجنن وسارن عند العرايس في حجرة مريم ..

على الساعه 7 المغرب ين صوبهن بنات خالتهن وديمة .. ما شاء الله على الريم .. كانت غاسلتنهن من حلاتها .. حتى الباقيات ما عليهن كلام .. بس محد طلع احلى عنها .. يلسن عند العرايس لين ما خلصوهن .. كل الموجدات انبهرن ابهن .. حلاتهن كانت ولا في الخيال .. يا حظكم يا ناصر ويا راشد .. يوم ضويتوا هالغزلان ..

ميثه : امايه تراها محتشره علينا.. كل شوي واتصلت اتقول جان خلصتن بيكن خالي خليفه عشان ايوصلكن الخيمة ..
مريم : عنبوه امايه شوه حاشرنها .. بعده وقت ..
نوره : هيه صح بعدنا ما تصورنا ..
مريم : والله اني بموت من الزيغه ..
نوره : ههههههههه . والله انج ..؟؟
مريم : ما ايوز ايظهرونج يا الدبه بدالي ..
نوره اونها مكتئبه ..: لالا يالظالمه جاني من 3 شهور وانا اسوي ريجيم .. الا عشان ما اتقولن لي الدبة ..
مريم: يحيج ضعفتي شوي ..
نوره : توج .. هالكلام الي يرفع المعنويات ..
موزه : نواري انتي وميثاني اليوم بتسرقن الانظار كلها .. ما شاء الله ..
ميثه وبكل فخر : هذا هوه المطلوب ..
نوره : نحن والا انتي يا الموز .. وينك عنها يا بو عسكور ..
الكل : هههههههههههههههههه . .
علياء انتبهت انه مهره زعلانه وشي فيها : مهاري شوه فيج زعلانه ..
الريم وتضحك ضحكة خبيثه .. وتحط ايدها على ثمها .. : اقول والا ما اقول ؟؟
مهرة : احسن لج لمي ثمج ..
موزه : الريم شعندج على اختج سكتي عنها ..
الريم وجنها ما سمعت موزه شوه قالت .. : مهاري تبا اتـفل شعرها بس امايه ما خلتها ..
علياء : حرام عليج .. والله بياكلنه الحريم ...
موزه : قلنالها الا ما يابها ..
ميثه وهيه اتعابل ويا نواري المسجل : مهاري ..والله انج طالعه مرتبه وايد ..قومي ويايهه خلينا نرقص..
وحطن اغنيه من اغاني ميحد الرباشيات .. وتمن يرقصن والكل كان فرحان ..العرايس نشن يتصورن عند المصورات .. والبنات وياهن ..

الساعه 9 وربع ..
يا خليفه (ابو راشد )خال مريم وابو علياء ..في البي ام مالت حميد وشل العراييس .. والا ميثه ونورة سارن ويا مطر .. وباقي البنات سارن ويا حميد في سيارة خليفه ..

وصلوا كلهم عند البوابه الرئيسيه للخيمه .. نزلن العرايس ودخلن في المدخل الي ايكون قبل الدخول

25-09-2008, 10:30 مساءً

للخيمه ..عقن العبي والغطاء الي كانوا امغطينهن به ..واستعدن للدخول..في هالاثناء ..عطوا علم لمهندسة الاضاءة والصوت انه العرايس وصلن .. كانت امرتبه الهن احلى اضاءه ..على اساس انها اتخلي الجو الي بتكون فيه الخيمه ساعة دخول العرايس جو رومانسي أميري..

اترتبت الاضاءة والصوت ودخلن العرايس وهو متقابضات بالايدين ..كل العيون اتجهت صوبهن .. الاضاءة كانت وايد خفيفه في الخيمه .. ما عدا الاضواءالي كانت مسلطه عليهن ..وعلى موسيقى كلاسيكيه .. اتلائم هالحور الي يمشن بحركه تأسر القلب من الرقه الي فيهن ..
مشن على الاستيج..وهن يلتفتن يمين ويسارويطالعن الحضور بنظره تشرح البال ..مشن لين وصلن عند الكوشه ...الصوت الي كان ينسمع مع الموسيقى .. هوه صوت الموجودات وهن منبهرات من الي يشوفنه جدامهن .. ولا عرض مسرحي .. شي خيالي كان ..
بعد هذا كله ..يلسن العرايس على الكراسي ..وفتحوا الاضاءه كلها .. وغيروا من موسيقى كلاسيكيه .. الى اغنيه من الاغاني الي تناسب الاعراس .. يعني اتحول الجو الا جو ربشه ..
خلوهن تقريبا نص ساعة .. وعقبها رتبوا الشباب انهم يدخّلون المعاريس اول وعقبها يدخلون الاهل والشباب الباقيين .. ( طبعا من المحارم بس) دخلوا ناصر وراشد ..على اغنيه ميحد طال ليلي الي كان طالبنها ناصر ..ومتفق ويا مهندسة الصوت انها اتحطها اول ما يدخل ..

انبهروا بالجمال الي شافوه جدامهم ..الجمال الي اقسمه الهم رب العالمين واختاره إلهم ..وكان من خيرت ما قسم الهم ربهم في دنياهم ...
حالهم ما كان احسن من حالهن وهن يمشن على الستيج .. كل واحد منهم ايحس انه الثاني يسمع دقات قلبه .. من قوتها ...

وبنفس الحركة .. وقفن العرايس .. وهن مغطيات ويوهن بالطرحه .. وصلوا عندهن المعاريس .. كل واحد منهم رفع الطرحه عن ويهه عروسه .. وباسها على يبهتها ..وسلم كل واحد منهم على العروس الثانيه .. وباركوا لبعض ووقفوا كلهم عدال بعض واتصوروا صور جماعيه ..
يلسوا يمكن 5 دقايق ..و بعدها دخلوا الشبيبه كلهم .. وبدوا في اليواله على الكوشه .. على صوت اغاني ميحدالي كان يربش الي ما يبا يرتبش .. كان الجو رااااائع بمعنى الكلمه ..
مر الوقت ..وهم مرتبشين .. و بدت الخيمه تفضى من المعزيم ..الي بدوا يطلعون عقب ما شافوا العرايس ..

بدا التصوير الي على اصول ..الاغلبيه اتصوروا وياهم .. ناصر بعد ما اتصورا ويا الاهل .. حب انه ياخذ حريته اكثر ويا عروسه وهم يتصورون .. شل حرمته وترخص من خاله ومن الموجودين ..على اساس ايسيرون البيت ايكملون تصوير هناك .. وعقب ما يخلصون راشد ومريم تصوير في الخيمه ايسيرون مع بعض دبي ...(كانوا امخططين بعد دبي ايسافرون سنغافورة )

كل شي كان مرتب ومدروس من اول ساعات العرس .. لين المكان الي اختاروه انه ايكون المكان الي يجمع امبينهم اول مرة والامكان الثانيه الي بيسيرون الها عقب .. والحمدلله كل الي تمنوه ايصير في هالعرس تم وبأحسن وجه ..

وبجذيه صارت علياء (شوق ناصر )مثل ما يسميها ناصر .. لناصــر ..ومريم صارت لراشد ..وفتحوا صفحه يديده في حياتهم ..

هنيت نفسي بحبك .. يا بعد عمري .. قلبك حبيبي وعينك أجمل أحبابي ..
كل المشاعر تعيش الحب في صدري .. والسعد أشرق من عيوني وأهدابي ..

انته نهاري وانته شمسي وفجري..نورت عمري بحبك وانجلى ما بي..
بأسبابك الحزن فارق دنيتي بدري.. والشوق كله تعدا الحد بأسبابي..

لا تسأل القلب ليش أهواك أنا ما ادري .. كلي احبك وكلك حايز اعجابي ..
ذبت بغرامك ولي يا سيدي عذري .. جذاب طبعك وحسنك صدق جذابي ..

حبك أسرني وأنا الي راضي بأسري .. في قربك القلب طاب وخاطري طابي ..
إن شفتك افرح بشوفك يا بعد عمري .. وان غبت كل ألهنا عن دنيتي غابي ..

*بعد العرس بكم من اسبوع ..

الوقت كان الضحى .. والمكان في بيت ابو ناصر .. علياء توها واعيه من الرقاد .. ومتلبسه وكاشخة وظاهرة عند عمتها في الصالة ..
علياء : صباح الخير عمتيه ..
ام ناصر : مرحبا مرحبا الغالي ..صباح النور ..

هوت عليها وحبتها على راسها ..
علياء : شصبحتي اليوم ؟؟
ام ناصر : بخير يعلج ياربي الخير ..

يلست علياء عدال عمتها ...
ام ناصر : عيل وينه ريلج ..ليكون بعده ما نش .؟؟
علياء : من ساعة وانا اوعيه ..وهب طايع اينش .. توني ولعت عليه الليت وفتحت الدريشه ..وما اندرى به جانه نش ..
ام ناصر : الله يهديه امبونه ما يتوعى شرات العرب ..
علياء : عاد الحين القايلة وانا ابا اسير صوب اهليه اقيل عندهم..
ام ناصر(وكانت اتصب حليب لعياء ): شدنه ما يستحي...الحين انا بسير اوعيه لج ..
علياء : لاوالله ما تسيرين لين هناك .. انا عقب ما اشرب الحليب بسير اشوفه ..
ام ناصر وتعطها الكوب: عيل بسير اخبر الخدامة تيب الكم الريوق ..
علياء وهيه تاخذ الكوب عن عمتها : انا ما اشتهيه .. الا جان ناصر يبا ..
ام ناصر : جيه هب زين ما تتريقين .. ؟؟...

25-09-2008, 10:31 مساءً

علياء : عاد الحين القايله لو تريقت الحين بيردني عن الغدا ..وامبوني ما اشتهيه ..
ام ناصر : هيه على راحتج عيل ..وناصر إن وعى وبغى ريوق بنزقر على الخدامة تيب له ..
علياء : محد من العيال نش من الرقاد ؟؟
ام ناصر : يالسه رويحتيه .. يت متقهويه ولقيت شموس ولولو يطالعن التيلفزيون وعقب ما تريقن وتلبسن سارن ويا الخدامه صوب بنات غبيشه .. وحمادي كان توه هنيه وجنه سار يتسبح .. وميثوه .. هاي البنت معايتبي ما اتنش الا يوم يأذن اذان الظهر ..
علياء : ههههههههه .. حليلها اجازه تبا تتهنابها ..
ام ناصر : ما عليه ما شي باقي عن الدوام .. بيظهر هالرقاد منها ..
علياء : الله يعينهن .. حر الجامعه ما يخلص ..
ام ناصر : خليهن ايكدن فيها ..ما عليج منهن يبنها ..

علياء (وهيه اتحط الكوب على في الصحن ): وين يبنها الا جان يبنها عشان ربايعهن .. .(ونشت)
بسير اشوف ناصر جانه نش .. هيدانا انسير الحين الساعه 11..

لقته واعي .. ويتسبح .. طلعت له كندورته .. ودخنتها ..وعطرتها .. ويلست اترتب الحجرة ..وعقب ظهرت تيب له الريوق الي كان جاهز ومحطوط في المطبخ ..يابته وحطته في الصاله
ظهر ناصر عندهن في الصاله .. ويلس وتريق .. وسارت علياء تلبس عباتها .. وردت صوبهم ..كان ناصر يالس يقرا الجريدة ..

ام ناصر وهيه ترمس ولدها :يا بويه قم ود حرمتك عند اهلها ..ما شي باقي عاد عن أذان الظهر ..
ناصر وهوه يبا ايغيض بعلياء : جيه انا بعدني ما قريت الجريدة ..
علياء : اكيد بتلقى راشد هناك يالس يقراها ..اقراها عنده ..
ناصر وهوه يتظاهر انه مندمج في الجريده: لا انا ما اعرف اقرا الجريدة الا في بيتنا ..
علياء :لا حووووول .. بعد غير شكل انته..
ناصر : شفتي عاد ..
ام ناصر : وابويه عليك انته.. نش حرمتك بعباتها واقفه تترياك وانته يالس تجلب الجريدة ..
ناصر : خخخخخخخ .. غيضن الحريم ..

وجان تدخل عليهم ميثه .. وتوها واعيه ..وشكلها بعدها فيها رقاد ..
ميثه : السلام عليكم ..
ام ناصر وعلياء : وعليكم السلام ..
ناصر ومزاجه رايق ويبا ايغلس على ميثه : اميه حرام يأنها بنتج دهمانه ..طالعي شكلها كيف ..
ميثه : ناصر دخيلك اسكت ما فيه عليك ..( وتيلس على الكنبة وترمس علياء ) علايه وين بتسيرين اشوفج بعباتج ..؟؟
علياء : بسير صوب اهليه ..
ميثه واتفز من مكانها ..وطار عنها الرقاد: عيل بسير وياكم ولهانة على بنات خالوه ..وعلى مريوم..
ناصر :سوري ... نحن بعدنا معاريس ما نشل حد ويانا ..
ميثه : كملتوا كم من اسبوع وبعدك اتقول معاريس ..
ناصر : هيه جان ياز لج ..اصلا نحن بنتم طول عمرنا معاريس ..سيري رقدي انتي بعدج ما شبعتي رقاد.. العرب لو بيشوفونج بيتروعون..

ضحكت علياء على رمسة ناصر ..
ناصر حب ايغلس على ميثه اكثر ..سكر الجريدة..و نش وشل سويجه وحط سفرته على جتفه.. ومسك ايد حرمته ومشى وهوه يغني ولا عاطنها ويه (فدتك الروح يا دعج العيان .. فداك القلب والي تطلبون .....)
ميثه ..وهيه ترمس علياء الي اتحاول تفتح ايديها من ايده عشان تترخص من عمتها قبل لا يظهرون : لالالالالالالالالالالا يبا يقهرني هالانسان ببروده ..
علياء : ههههههههه .. خليها على الله هالمرة..(وتلتفت صوب عمتها )شي في خاطرج عمتيه ..
ام ناصر : موافجين خير ردي السلام على اهلج ..
ميثه : سلميلي وايد على البنات ..
علياء : يبلغ بخير ان شاء الله ..السمووحه ميثاني .. و فمان الله ..

والحبيب بعده ماسك ايدها ويغني ويترها اتخلص رمستها ..
علياء وهيه ترمسه : يالله الحين نتوكل على الله ..
طالع ناصر ميثه .. وابتسم الها ابتاسمت غياض .. واشر إلهم بيده مع السلامه ..وطلعوا

(حب ناصر لعياء كان كل يوم ايزيد .. كان يعشقها هب الا يحبها .. ولا يصبر بلاها ..لانها ما شاء الله عليها .. حبوبه وتدخل القلب بسرعه ..والدليل انه كل بيت ابو ناصر اتعلقوبها وايد )

ميثه وهيه منقهره بالقو :اوووووووووووف .. امايه شفتي ولدج ..والله انه يقهر ..
ام ناصر : فديت روحه .. بالعماله يبا يغيضج ..
ميثه وهيه ناشه : هذا الي فالح هوه فيه ..
ام ناصر : انزين وين تبين ناشه ...؟؟
ميثه : بسير اكمل رقاد لين اذان الظهر ..
ام ناصر وتهز راسها : بو طبيع ما ايوز عن طبعه ..

آخر اسبوع من اجازة الصيف ..

تقرر انه ايكون في هاليوم يوم خطبة ميثه لسلطان ..
يوم الاثنين من ذاك الاسبوع .. ميثه كانت اترمس مريم اختها في التيلفون ..
مريم : ميثوه تراه فستانج زاهب .. اتصل فيه المصمم وخبرني .. والكوافيره حجزتها لج .. بتيج يوم الخميس الساعة 3 ..
ميثه : ما قصرتي والله .. انردها في عرسج بناتج .. خخخخخ
مريم : هههههههه .. اتنكتين حضرتج ..
ميثه : لا احاول .. انزين بتخبرج كل بنات خالوه وديمة بيين ؟؟
مريم : اظنيه انهن بين .. احيدهن مساعه سايرات ويا حميد السوق .. يمكن انه ناقصنهن شي
...انزين دريتي انه حميد خلاص عزم يسافر .. وانه بيسافر باجر ..
ميثه : هيه سمعت امايه اترمس مساعه خالتيه وتتخبرها ..
مريم: والله انها كاسره خاطريه.. من درت انه خلاص حجز ورتب كل شي وهيه تصيح .. ما تباه ايسير ..

25-09-2008, 10:37 مساءً

ايهزه شي حتى لو كان على حساب قلبه ...

فتح الباب .. وركب السيارة ..
سلطان وهو يبا يسولف على حميد ..عقب ما شاف حاله معتفس :حشى كل هذا وداع !!
حميد : يالله يالله اتفججت من أميه ..
سلطان : عورني قلبي عليها ..
حميد : ..............
سلطان : تعال انزين بتخبرك ..أبوك سلمت عليه .. ؟؟
حميد : أبويه ؟؟ ليش أبويه متى امتحن منا والا سأل عنا ..
سلطان : مهما كان هذا أبوك .. عيل الحين بخطّفك صوبه ..
حميد : يا ريال ما فينا بنتأخر .. وبعدين انا مرمسنه من اسبوع .. ويدريبي بسافر اليوم ..بدق له ونحن في الدرب تيلفون وبوادعه ..
سلطان ومطنش كل الي يقوله حميد : ابوك شرات هالوقت وين ايكون ؟؟
حميد : يعني ملزم انسير صوبه ..
سلطان : هيه ..
حميد : صبر بتصلبه تيلفون بتخبره وين .. ؟؟
اتصل في ابوه وتخبره وين هو..وقاله انه هوه في العزبة عند الزمول ..
ساروا صوبه وكان وقت صلاة المغرب سلموا عليه .. وصلوا عنده المغرب ..وشربوا لبن توه محلوب .. وترخصوا منه وساروا صوب مطار ابوظبي ..

في هاليوم الحزن كان المسيطر على قلوب الكل .. ما يبون ولدهم يتغرب ويبتعد عنهم ..

*في المطار ..
الشباب والي من ضمنهم محمد ربيع حميد .. كانوا مسويله مفاجأة ..ولقاهم كلهم يتريونه في المطار ..تم وياهم لين ما خلص اجراءات السفر ..

..قبل الوداع ..
سلطان كان مسوي سيدي منوعات كله اهداء لمريض المحبة .. هذا هو اللقب الي انعرف به حميد بين كل الشباب .. لانه كان ينزل منوعات بهذا الاسم ..وقبل لا يسافر كان منزل الجزء السابع منه .

..الوداع ..
ودع حميد الكل وبقى اخر شي سلطان .. لوا عليه بقووووووووو .. لدرجة انه كل الشباب تأثروا بالموقف .. ( ما ينلامون اول مرة يتفارقون ) ..وقف وكان منزل راسه لانه صدق خنقته العبرة..رفع راسه .. وكسر الحزن الي فيه .. ابتسم الهم .. ولوح الهم بييده .. وبدا مشواره اليديد ..وبجذيه ايكون حميد بدا اول خطوة من مشواره اليديد ...(الله يوفقك يا حميد )

مر يوم الثلاثاء .. والاربعاء .. ووصل يوم الخميس الكل بدا يتألقلم على الوضع .. ويرضى بالواقع انه حميد سافر ..

يوم الخميس .. (خطبة ميثه لسلطان )
بعد صلاة المغرب .. بدوا الاهل والمعارف المعزومين يوصلون بيت بو ناصر ..اتجمعوا كلهم وما كانوا وايديين ...كانت جمعه للاهل اكثر من انها اتكون خطوبة ...عقب صلاة العشا .. تعشوا الريايل ويلسوا يسولفون ..

اما بالنسبة للحريم ..اول شي اتقهوين ..وعقبها طالعن الشنط الي مسوينهن هل سلطان لميثة .. وطالعن العقد والساعة والدبلة الي يايبينهن ..وخلاف شلتهن وديمة خالة ميثه ... عشان اتلبسهن ميثة وعقبها تظهر اتسلم على الحريم ....قبل العشا ظهرت الهن ميثة الي كانت كاشخة ومتعدلة احلى عدله ... وكل الي مسويتنه بسيط ان كان من ناحية اللبس والا المكياج .. وطالعة قمرما شاء الله عليها .. وسلمن عليهاالحريم وباركن الها ..وردت الحجرة عند البنات الي كانن مسويات جو في الحجرة ولا اروع (هذي ميثه هب أي حد ).... وتعشن الحريم والحاضرين وعلى الساعة 10 ونص تقريبا روحوا اغلبهم ...

عقب ما خفوا العرب من البيت ..اتصل سلطان في نورة اخته وعطاها باقة الورد الي كان مسونها مخصوص لغناة الروح ...وفيها بطاقة كاتب عليها ( ألف مبروك وعلى طرف توقيع ((سلطان )) شكل البوكية والبطاقة كانن ايدلن على ذوق راعيهن وانه منقنهن مخصوص ومن الخاطر للغالية ) ..وبجذيه تمت الخطبة الي كانت بسييطة ومرتبة في نفس الوقت ..

سلطان كان مرتب عزيمة ثانية في اليوم هذا نفسه في البر عشاء للشباب ..على اساس يوم يتعشون المعازيم يشل الهم عشاهم ويسيرون ويتعشون هناك .. لانه اغلبهم ما طاعوا ايون بيت بو ناصر ... عقب ما روحوا المعازيم .. اتجمعوا الشباب (سلطان واخوه وشباب العايلة )..واتصل سلطان في الشباب الي كان عازمنهم ..وفي ربع حميد الي تعرف عليهم يوم كانوا في المطار... وخبرهم انهم الحين بيسيرون ..واترخصوا من الباجيين هناك بيت بو ناصر ..وساروا .......

ما ابتعدوا وايد بعيد دورولهم مكان زين ويلسوا يتعشون .. وعقب العشاء .. يلسوا ايسولفون ويلعبون ورقة .. واحمد كل ساعة وشل الهم شله .. والكل كان مبسوط وفرحان لسلطان ..

كان هذا اليوم بداية لحلم رسمه سلطان من زمان وما زال يرسم فيه .. ورسمته ميثه بكل براءة بس ما توقعته في يوم يتحقق ..كانت هاي البداية لأول خطوة لأحلى ثنائي يبدون بها في دروب الحياة .. ولحبهم الطاهر العفيف الي ما لامسه زيف أو مسه ريا من الي يستوي هالايام .. حب انبنا.. من زمان ..وما زال ينبني .. حب ... كل منهم بناه لحالة وبكيفه .. وكانوا ينتظرون الساعة الي بيتجمع فيها الي بنوه وييترجم فيها ذاك الحب كله لواقع ملموس ..

........................................

انتهت الاجازة ..
الي كانت سريعة في نظر الكل ..أحداث وايده صارت .. وامور وايده اتغيرت .. كلهم استانسوا على الايام الحلوة الي عاشوها وعلى الليالي الزينة الي مرت عليهم في ذيج الاجازة ..ان كان على عرس

25-09-2008, 10:38 مساءً

راشد وناصر ..والا على خطبة ميثة لسلطان ... بستثناء شخص واحد .. والي هوه حميد ... إلي كان في عالم ثاني ..عالم محد يعلم به غير رب العالمين ..

"محنا اول ناس ولا اخر ناس تجبرها الظروف "

حميد وصل بريطانيا .. وخلص ترتيبات الدراسة الي كانت ناقصة .. اتعرف على شباب وايدين حد من الامارات وحد من الخليج .. غير الي كان متعرف عليهم الي كانوا وياه في نفس البعثة .. اتأقلم ويا الشباب وايد .. وارتاح من هالناحية انه عنده ربع طيبين وزينين ..كان دايم التواصل ويا هله الي في الامارات يتصل ويسأل عن حالهم وحال البلاد بشكل عام .. ولو ما اتصل فيهم هم ما يقصرون يتصلون ويسألون عن حاله ..حتى ربعه تيلفوناتهم ما توقف عنه .. يعني الكل كان وياه .. وهالشي الي خلاه يرتاح اكثر وأكثر .. ويعطيه الدافع انه يشد حيله .. ويحقق إلهم الشي الي الكل ينتظره منه ..ويبيض ويوهم ..

في يوم من الأيام في أبوظبي ..
سلطان كان توه راد من الدوام نزل من سيارته ..وكان يمشي يبا ايسير صوب شقتهم .. وجان ايرن تيلفونه .. طلعه من مخباه شاف الرقم .. الرقم غريب !!!..وأول مرة يشوفه .. وأوله ........7-03.. يعني حد من العين .. بس هذا الرقم أول مرة ايي على تيلفونه .. ( ما عليه برد وبشوف منوه )ورد على التيلفون ..
سلطان : ألو ..
.........: السلام عليكم ..
سلطان وسمع انه المتصل هيه بنت : وعليكم السلام ..
.........:سلطان ؟؟
سلطان : هيه نعم سلطان .. منوه الاخت .. ؟؟
............:هب مهم الاسم انا متصلة أقولك شي واسكر ..
سلطان وهو مستغرب .. منوه هاي .. وشوه تبا اتقول :على راحتج لو ما تبين اتقولين منوه انتي .. اتفضلي ..
........:أنا داقه اقولك عن واقع صار وما زال يصير جدامك وانته هب منتبه إله وبغيت انبهك له .. يا ويلك من رب العالمين .. أنته تراك معذب شخص بقرار اتخذته من كم من شهر .. قرار اتخذه ولا راعية به شعور غيرك ...هالشخص الي عذبه قرارك عينه ما ذاقت لذيذ النوم من سمع بالخبر ..لانه الحلم الي حلم به طول عمره ضاع من ايده ...وللاسف انه اختار الغربة عشان ينسى الواقع المر الي بيعيشه بعد ما انتهى كل شي ...ليش تعذبه وليش اتخلي أهله يتعذبون من عذابه .. ؟؟حرام عليك .. هوه اختار انه يسافر عسب هالقرار ..

سلطان صدق اتشتت افكاره واحتار في كلامها الي كله الغاز ..(قرار .. ومن كم من شهر .. واتخذته ...وما أدري شوه )!!!!!وبغى يستفسر : أنتي شوه تقولين ومن تقصدين .. واي قرار انا اتخذه يسوي جذيه ؟؟؟؟
........:فكر شويه وطاالع حواليك . وأكيد بتعرف بنفسك انا شوه اقصد .. مع السلامة ..
سلطان : صبري لا تسكرين .. حلفت بالله ما تسكرين .. فهميني انتي منوه تقصدين ..؟؟

(سلطان كان يقدر ايسويلها لبسنق ويطنش كلامها ويسكر عنها .. بس الي خلاه ما يسوي جيه انها هيه قاصدتنه هوه شخصيا واتعرف رقمه واتعرف انه هوه اسمه سلطان.. أكيد هاي تبا توصل لشي ) ..

.........:ما بطول زود..بس لانك حلفت بالله بوضح لك اكثر ..ولأني بعد انا متعنيه اخبرك هالشي .........أنته معذب قلب أعز ربيع عليك ..بقرارك انك تاخذ البنت الي يحبها قلبه .. وهو اختار السفر والبعد عسب ينساها .. ويعيش حياته اليديده بدون حبه الجديم ...والسموحة منك ..ومع السلامة ..وسكرت ..

سلطان نزل التيلفون وتم يطالعه .. وعلى ويهه أكبر علامة استفهام (منوه كانت تقصد هاي .. ؟؟؟ حميد ؟؟؟ !! حميد هوه اعز ربعي وهو الي مسافر .. ....معقولة!!!ايكون كلامها صدق ؟؟؟ معقولة كانت تقصد حميد ..؟؟ معقولة حميد كان يبا ميثه .. ومتمسك ابها لهاي الدرجة ..!!
ردت به الذاكرة لورى ..تذكر ردت فعل حميد يوم كانوا سايرين البر وكانوا يسمعون أغنية محمد عبده ..(هلا بالطيب الغالي .........)
ويوم كان يخبره انه بيخطب ميثه ..كيف حميد اتضايق واتغير حاله ..واتحجج انه مصدع ويبا ايرد الشقة .........!!!!ويوم انه قرر ايسافر بعد ما كان شال هالفكرة من باله ويوم ويوم ....و........)كل هذا كان يمر جدامه ذيج الساعة ويأكد هالكلام لسلطان انه حميد كان يبا ميثة وكانت في خاطره .. ويوم قلت اباها حميد سوى كل هذا ....(يالله لو انا فكرت فيها من زمان جان عرفت ليش حميد كان ايسوي كل هذا)..

(افا يا حميد افا .. كل هذا في قلبك تجاه ميثه ؟؟..كل هذا تسويه لانها ما بتكون في يوم من الايام لك .. معقوله انا وانته انحب نفس البنت ؟؟؟ ما اتوقعت في يوم من الايام انها هالانسانة بالذات يمكن حد يشاركني في حبها ..ليش يا حميد .. ليش هالانسانة بالذات ) ...( بس هوه طول عمره ما وضح جدامي هالشي ..ولا عمره لمح !!!!) ....شوه الحل الحين .. ؟؟ استسمح منه ........والا انسى السالفة ولا جاني اعرف هالشي .. وهو اكيد مع الايام بينساها .. !!! والا اتنازل عن ميثه واخليها له .. (اووووه أي منطق هذا انا يالس افكر به .. ؟؟ ايثار ؟؟!!حشى والله مايفرقني عن ميثة الا الموت) وجان يحط ايده على قلبه ( ميثه قلبي ودنيايه كلها ..وحتى لو كان حميد اعز انسان عندي يباها مستحيل اتنازل عنها لو مهما كان ..)

كانت كل الافكار متخربطة في راسه ..تعب من الوقفه والتفكير... دخل الشقة وبدل ملابسه وتسبح ويلس يتغدا ويا ناصر .. عقبها دخل حجرته يرتاح .. طول هالوقت ورمسة هالبنت الي خربطت له أفكاره وخلته يحتار ما فارقت أذنه .. وكل شوي ويقول في خاطره ( أفا يا حميد أفا ) ..
بس خلاص الحين بعد الخطبة بالذات ..كل شي محسوم .. وماله داعي النقاش في هالموضوع..والكل الحين يعرفه انه (ميثه لسلطان وسلطان لميثه )..

بس الغريبة انه الشي الوحيد الي ما فكر فيه سلطان .. هوه منوه هاي البنت .. وليش هيه بالذات اتصلت به ؟؟ (يالله هب مهم اهم شي حميد )

رسمتك في خفايا الروح صورة ..
تبادلني غلا الحب وشعــورة ..
ولو يحكم علينا الوقت جـوره ..
احاسيسي ووجداني فدنـــك ..

25-09-2008, 10:39 مساءً

الساعة 2:30 في الجامعة ..
وبالتحديد في المسرح الجديم .. كانت ميثه والريم واقفات على زاوية في المكان ..و يترين نورة بنت خالتهن تي عندهن ..لان محاضرتهن بعد 10 دقايق بتبدا .. وهذا المساق كلهن ماخذاتنه مع بعض ..مساق ثقافة عامة ...ميثة والريم واقفات ويسولفن ويا بعض ويرمسن عن الدراسة .. والاساتذه وشوه سون طول اليوم ....

ميثة وهيه اترمس الريم ...
ميثه : وين سرتي في البريك ما شفتج عند الشله ..؟؟
الريم : سرت المكتبة اشويه ادور اليه كتاب ..
ميثه : ايوه ..ييت ادورج هناك وما لقيتج ..
الريم : .............
(سرحانه اتفكر في شي سوته ... وميثه ما انتبهت انها الريم سرحانه )

سكتت شوي وردت وتخبرتها .........
ميثه : انزين ..شحالهم الي يدرسون في بريطانيا ..؟؟
الريم : ليش تتنشدين عنهم ايهمج امرهم ؟؟؟
ميثه : أكيد ايهمنيه .. ولد خالتيه .. وحسبت اخويه ..
الريم بدون نفس ..: يسرج حالهم ..
ميثه حست انه الريم زودتها من هاي الناحية .. وايد شاله على ميثه جنها هيه االي سفرت حميد ....: ريماني ليش اترمسيني جيه !!.. انا من زمان ودي ارمسج في هالسالفة..وأظن انه هذا هوه وقتها .. انا ملاحظة عليج انج امره هب ريماني بنت خالتيه الي اعرفها قبل ....عنبوه من دريتي أنه سلطان بيخطبني اتغيرتي وصرتي تعامليني غير .. حتى يوم الخطوبة نواري لاحظت انج غير.. وسألتني ..؟؟ ..رديت عليها قلت الها يمكن اتكونين بعدج متأثرة من سفرت أخوج..

الريم : كيف تبيني أعاملج وانا هب إلا شاكه إلا متأكدة مليون بالمية من أنه حميد ما قرر ايسافر إلا يوم درى إنج ما بتكونين له ..وانج بتكونين لسلطان .. وهو سوى هالشي عسب يبتعد وما يتعذب أكثر من ما هو متعذب ..
ميثه باستغراب : بس أنا شوه ذنبي .. ؟؟؟!!!
الريم : ذنبج انه هو كان يحبج وكان يباج ..
ميثه :يحبني ويباني .. هاي ما سمعتها الا منج ...........انزين شوه كنتي تبيني اسوي عشان ارضي اخوج ..؟؟!!!
الريم : انج ترفضين سلطان ..
ميثه باستغراب : شوه هالمنطق الي تفكرين به ؟؟؟!!! ارفض سلطان ...؟؟؟ !!!وليش ارفض سلطان .؟؟؟سلطان ولد عمي ..
الريم : وحميد ولد خالتج ..
ميثه : ولد خالتيه على عيني وعلى راسي ...بس بتخبرج.. اخوج يا خطبني ونحن رديناه .. يا والا رمس وقال ابا ميثه ..؟؟ يحبني في قلبه بس .. وهذا عرفته من كلامج اليه عنه...لو هوه كان يباني صدق جان رمس وقال تراني اباها ....
الريم : ...........

الريم ما عرفت شوه اترد على ميثه لانه كل كلامها كان منطقي وصح ... حميد ما تقدم لميثه .. ولا قال اباها .. هوه كان يحبها في نفسه بس ..يعني الغلطه غلطته.... ولازم هوه يتحملها ...

في هالوقت شافن (نورة وربيعتها فطامي) مجبلات عليهن ..
ميثه وهي ترمس الريم تبا اتخلص السالفه قبل لا يوصلن البنات .. : ريماني لو وحدة في مكاني جان زعلت عليج .. وحطت في خاطرها ..على الي تسوينه وتفكرين فيه .. لاكنج عزيزة وغالية عليه وايد .. وما تهونين عليه .. فكري بالمنطق وبتشوفين انه ما شي يرزا اتعامليني جيه واتخليني انا المتهمة في عيونج ..وتردين سفرت اخوج عليه ..
الريم في خاطرها (يالله عيل لو تدري وين كنت قبل لا ايي عندها شوه بتقول !!... انا جذبت عليها وقلت الها في المكتبة .. بس والله هذا شويه من الي في قلبي من قهر وغيض على سلطان )..
الريم وهيه متلومه وايد من ميثه : السموحة منج .. بس لا تلوميني ..والله انه هذا من زود الحرقة الي في قلبي على مفارق حميد ..

ميثة تبا اتغير الاجواء .... وقالت للريم :حميد ساير لانه يبا ايحقق الطموح الي كان في خاطرة من عقب الثانوية ويتمنى ايحققه ..وما عليج منه ريال ما ينخاف عليه بيرفع روسنا فوق بالشهادة الي بيضويها ان شاء الله وبيرد الكم بعد كم من سنة سالم غانم ...............وشلي من راسج هالعود هالخرابيط ...تفهمين ..
الريم : ههههههههههه .. ان شاء الله امايه
مسكتها بييدها وسارن صوب نواري وربيعتها

ووصلن عند البنات ..
ميثه بعد ما سلمن على البنات .. : انتي وياها ..لين متى بتمن جيه تتأخرن على المحاضرة !!..لا يا بويه عز الله فلحنا جانه كل مره بنترياكن وبندخل متأخرين ....
نورة : لا اله الا الله كلتينا .. وين متأخرين ..عوذ بالله من شرك يا بليس ؟؟طالعي ساعتج توه بادي وقت المحاضرة..
فطامي: بعد غير الدحيحات الي شرات ميثاني ..
ميثة : خخخخخخخخخخ .. نواري حلو شكلج وانتي اتدافعين عن عمرج ..
نورة :حليلي شوه اسوي بج .....من ييت استلمتيني ..
الريم : خلن عنكن هالخريط ..وخلنا انهبط ..في خاطريه مرة وحده ندخل من وقت ..
فطامي :أمره ولا يهمج الحين بنحقق لج الي في خاطرج ..
الكل : هههههههههههههههه
نورة وتغمز لميثه :ميثوه حبيبتي .. أنا عطشانه .. وما اروم أحضر المحاضرة وأنا عطشانه ..
ميثه وفهمت الغمزه : ويعني ..؟؟
نورة : يعني سيري ويايه ..
ميثه : يالله .. غايته ...
فطامي : طالعوا هاي ( وتأشر على ميثه ) توها محتشره علينا وتهازب والحين بتسير ويا نواري..
نورة : فديتني تراني ما ادل ..
ميثة : كم مرة قايتلج ما تتفدين عمرج ؟؟؟
نورة واونها مستحيه : هيه صح نسيت ..
الريم : يالله انزين سيرن بسرعه بس لا تبطن .. وانا وفطامي بنحضر ..
نورة وهيه تمسك أيد نورة : أوكي

يتبع ...