طفولتي المعذبه بين منفوحه ولبنان....

مرحبا شباب وصبايا بدى احكى لكم عن ائصتى بدكم تئرو هيدا الكلام وتعلئو ......



طول عمرهم وهم يقولون لي الحلو ...المملوح راح ..الحلو جا . من هم ؟
طبعا هم ذولا اقصد بها امي ..وعمتى الى طول عمرها معنا وما اعرست للحين ...

يوم كبرت سمعت بالمثل اللي يقول :القرد في عين امه وعمته غزال .. والقهر انى ما عرفته الا متأخر ..تخبرون ذيك الايام ما كان فيه لا نت ولا بنوراما ولا mbs f.m من فين اعرف

الزبدة اني عشت طفولة معذبة في حي منفوحه بالرياض ..ايه منفوحه بس لاتستغربون
اكثركم يمكن ما يعرف ان خوالي لبنانيين وبحكم ايضا ان ديرت ابوى الحصاة كانت قطعه من لبنان اصلا بس انها زحفت لمكانها هذا بفعل عوامل التعرية وكان ذلك من ايام طوفان نوح
عليه السلام اتحدى احد منكم يعرف مكانها غير المسافرين بس هى على طريق الرياض حلبان الطائف


يالله الجنه كل شي طبيعي يؤبر البى بيروت شو ما احلاه من قب الياس حتى الرمله البيضاء مرور ب الزيتونه وبرج حمود وحارة حريك وكل ياتهن ياتبر البى عند بعض الناس (البى) اشوفهم يكتبونها دوم فى شريط الاهداء الى فوق ..
المهم يوم قامت الحرب الاهلية قرر ابوي انه يرجع السعودية .. مع انه كانت الاوضاع عادية وممكن نعيش بالضيعه عند خوالي والله ياهي ضيعه حول جسر اللوزية في بلعلبك ببقاع لبنان واريب مره من زحله ديرة نجوى كرم بس ابوي الله يهديه يحب الغبار موات .. لاتقول وش دخل ذي بذي

ابوي يوم شاف الحرب الاهلية قامت قال النحشه لايجون المرده _( لاحد يفهمها غلط )والكتائب يلعبون بنا الله من زين الثقافه لن حـــــــــــزب الــ الله ما كان يدنى احــــــد من السعوديه وجينا وسكنا بمنفوحه وضاعت حياتي مابين طلعاتها ونزلاتها ومابين تصييد الحمام بالنبيطه من فوق اسلاك الكهرب ... ولعب الكورة كل عصرية بحى البطحااااا...
و اذكر من بين المواقف الطريفة التي تدل على براءة الطفولة انه قد مرت قطوة من عندنا وحنا نلعب المهم مسكناها وبــه شارع كانوا يزفلتونه وكان فيه قار والله وتنشب بوسط الزفت طول العصريه والليل وما يفكونها غير العمال ثانى يوم ( امحق براءةالله لايعاقبنا )طريد كلاب وقطاوه ...

اذكر يوم جا ابوي يسجلني في المدرسة الابتدائية واروح معه واثق الخطوة يمشي متلق بثوب ابوه
وندخل على المدير ويستقبلنا في غرفته وسوالف هو وابوي اول يستانسون واذا جااحد يبي يسجل وانا قاعد معهم مرتز يقال لي رجال تخبرون ابوي مربيني تربية لبنانيين معطيني وجه يعني يوم طلعنا عشان يدخلوني الحوش
طبعا كان مبنى مستاجر بيت قديم مايل مع الدحديرة وفيه حوش حاطينه المدرسه يقال له ملعب وشاقين فتحه في الجدار على غرفة كاتبين عليها المقصف .. كل هذا وانا واثق على بالي رجال ويوم دخلت وشفت العالم تخابط والبزارين اللي يهاوش ويناقز واللي سنونه كنها درج
واللي قاعد يصيح واللي قاعد يزاعق واحد مرتز يشبه بن منيف معه كيس بنى فيه قطع لونها بنى غامق يدخل ايده فى الكيس ويطلع قطعه يمعطها ويمصها انا قلت ياكل حشيش انشد ابوى قالى هذا يسمونه حمــر تمر هندى قلت لك الحمد والشكر حتى الهنود عندهم شجرة الخير والنماء تمر بلادى واشوف واحد عيونه مقلبه ..ويركبني الجني .. الله لايوريكم تعنقطت بثوب ابوي وصيح (((( ابي اميييي ابي اميي ابي ابوي ابي ....))) ...الجمله التاريخيه الشهيره لحليمه بولند

مادريت الا ابوي شايتني ذيك الشوته الا انا وسط البزارين وهم يطالعون فيني شوي ويسكتون وانا اصيح الا واحد منهم كبير شكله عنده واسطه طالع فيني وقال : ياحليله ... نظيف ! انت لأجى واطالع فيه الا ثوبه لوتوقفه لحاله وقف من الوصخ واطالع في رجوله الا هو حافي الا اظفر اصبعه الكبير مهو بفيه(( مو موجود)) طاير وطالعة قطع اللحم يععع ياربييه والله وانا اللي يزود صراخي وانقز وركض لغرفة المدير واناديه : استاد المنذر استاد المنذر طبعا دريت بعدين ان اسمه مهو المنذر بس المدرسه كان اسمها مدرسة المنذر وانا قلت اكيد هذا المدير يعني هذا المنذر ... بس عاد يوم كبرت بعدين عرفت ان اصحاب المدارس يحطون بدالهم ناس يديرون المدرسة انا ذكي بس مشكلتي ما خذيت فرصتي زمان...



عرفتو ليش انا الحين احب نانسى عجــــــــــــــــــرم ونجوى كرم واليسا وهيفاء وهبى
((( وميريام فارس تؤبر البي )))...
ولما اجلس لحالى بغرفتى اسكر الباب واتذكرهم

لنهم يذكرونى بطفولتى عند اخوالى بلبنـــــــــــــــــــان

يؤبر ألبك على هيك طفوله

ويخليلك منفوحه وميريام فارس

لشوووو كم منفوحه وكم ميريام عندنا؟؟؟

مشكووور على هالمذكرات الحلوه

تقبل مروري

لحظه لحظه !!!!!

كم المسافه بالكيلوبين منفوحه ولبنان؟؟؟

مشمشيه ههههههههههههههههههههههههههههههههه

بيني وبينك انا ما اعرف كم بالضبط بس اذا متاكد انها مسيره يومين بالسياره ونصف يوم بالسيكل

فديتك وفديت مرورك وتعليقك يالغاليه.....

مذكرات حلوه شنتره مشكوووور

مشكوورة الاميره العاشقه على مرورك الغالي فديتك ..

يعطيك العافيه يالغلاااااا..

يالب قلبك انت وطفولتك الي بين لبنان ومنفوحه ههههههههههههههههههههه