السلام عليكم
ياهلا فيكم اخواني واخواتي....
ماشاء الله .نقول بالاول ...
هنا فضائح...واقعه بالفعل...
هنا ستجد اغلى الحكم ثمناًً ( في عصرنا هذا)
هنا سيستيقظ القلب ..
هنا الدعوه في سبيل الله للاسلام .. وفي الانفاق في سبيل .وفي الاهتمام بالايتام
تفضل..الى اروع ما سمعت في الشعر النبطي في مجال الدعوة..شيء غيييرر...
للشاعر/ مقيت بن عبدالله ال عاطف القحطاني
بسم الله ابدا القصيد - كل منضوم جديد - في مواريد النشيد - عندنا له مستقر
نبتدي باسم الاله - الله اللي لا سواه- جل شانه في علاه - مايخيب من صبر
باسمه البر الرحيم - ربنا رب كريم - سبحان الله العظيم - من اجل يحلو السمر
يالله انا في رجاك - دون ذاك ودون داك - انك ترزقنا رضاك - يامن بيديك القدر
زينة عرش الله سبحانه - وبحمده ما اعظم شانه - بالخير ايدينه مليانه - الله يكفي كل شر
يعلم الله سر عباده - التقي بالتقوى زاده - والعنيد يطيح عناده- لاتولاه الدهر
بعد ماطال الامل- يامضاريب المثل- بالامان وبالجهل - ياهل الدين الاغر
ياهل السلوم والقيم والشهامه- والشيم حين حزاة العدم يالرجال ياهل الظفر
ياالشغاميم القروم - يالرجال اهل السلوم - والكرامة والعزوم - كيف الفساد انتشر
لدو لو نظرة بالعين - من يسار ومن يمين - ترون الخله بالدين - عظم كسر ولا جبر
مايجبره الا اهل العفه - اهل ايماناً مابه خفه - رجح كل منهم كفه - كالقوي من الحجر
ياهل العفه تكفون - ياللي ماكنكم تدرون - تذكرون وتنسون - وانتم ترون الخطر
تو مازان المجال - ياكريمين السبال - في مجالات الرجال - اللي ماترضى القهر
إعلوم القصيد اخذوها - إن جازت وإلا خلوها - للي يبيها ودوها - ودوها لرجل الامر
رجالٍ يبغى النصبيحه - ويدور فرقى الفضيحة - ياخذ من هيض القريحه - نصيحة صدق الخبر
هيه ياراع الفلوس - ياللي عادتك الناموس - عظمك لا يدخله السوس - الحذر ثم الحذر
لاترغب عن دينك غيره - عزه لاترضى تدميره - خلك في راس الجبيره - جنب درب المنحدر
للسائل في المال احقوق - خلك لاجا له شفوق - واليا عطيته برفوق - ترا الدنيا ذي ممر
اكرم بالمال اهل الخير- والضعيف والفقير- لايلحق نفسك تقصير- لو طال الطايل قصر
والايتام انفق واخدمها - في سبيل الله اكرمها - سلمها لله واسلمها - كريمن مد وعذر
اخدم بالمال الاسلام - وارفع راسك للامام - خلك للامه مقدام - يوم الله زال العثر
احمد ربك على النعمه – لاياتي لك مالك نقمه - كم غيرك جا ماله سقمة - عبد شبع ولا شكر
ابشرح قصته بالضبط - من اجل استنبطها نبط - للي يربط نفسه ربط - عن هوى نفس القشر
راح يدور الارزاق - مع مثله من ارفاق - والسوبر فيه السواق - ذاك المربوع الحمر
في وسط ذيك القصور- وصاه العم الغيور -لا يلف ولا يدور- بيسافرعمه شهر
واجتمع هو والورعان- والخدامه والنسوان- ينادون اقرب يافلان - على التلفاز السهر
كل القنوات اترج - بالمفسدين الهمج - ومن السايق ما احد يضج - لابغى شيء امر
رجال وحرمه وابليس- لامحرم ولا انيس - الا سواق خسيس- من قال انه ماغدر
والله لو انه بهيمه_ ان يستفحل في حريمه_ و كلن له وليمه _بين الشاطي والنهر
بيتن مليانن بنات _كاسيات عاريات _مائلات ومميلات _ وجه احدهم كالقمر
واية قناة شغاله - تحتوي كل الرذاله - شاريه ابوهم برياله - افتضح ولا استتر
فوق البيت الدش اشاف - يضهر جميع الاصناف - من اعرى وخز الاوصاف - والبنت تمد النظر
بنت دم ابوها بارد - عن عرضه تفكيره شارد - مايفهم صادر من وارد - كالبهيمه بل اشر
رجال هذا صنيعه - يجر اذيال الهزيعه - ودك مع الضان تبيعه - وإلا في حوش البقر
حياته في الدنيا نقص - حاله حسب احوال الطقس - بين الخمروبين الرقص - راحت حياته هدر
صارت حياته كسافه - كل الشين بعينه شافه - مايقدر يحمى ميقافه - تجنى كفه مابذر
يوم الله عطاه المال - خلى طريق العقال- وانتهج نهج الجهال - حتى دمر ماعمر
حتى اولاده او احفاده - مايبغون الانفاده - غابنهم فيهم فساده - هكذا منذ الصغر
هذا كله ويش اسبابه - اسبابه مبدا شبابه - اخطانا وانتم ماصابه - باع اعراضه ثم خسر
لاياخاتمة الشقاء - وش راح ووش بقا - لاشرف ولا نقا - ولا يعذر لاعتذر
اللهم لاشماته - اسمع وش تالي حياته - سوى هي ويا مماته - نفسه للحشره مقر
عقب الشباب اصبح شايب - تنتظره عوج النصايب - ويله فيها من النشايب - الا ان الله لا غفر
قصة هذا هذي هي - هذي خاتمة اهل الغي - يذهب شيء ويبقى شي - يبقى اليوم المنتظر
يبقى نهار القيامه - نسأل الله السلامه - من خواتيم الندامه - يوم كلا لاوزر
يومن تضعف فيه القوة - لا نسب ولا اخوة - ولا عند الخلق مروه - مامن جهنم مفر
حينما نصفوا السراط - بانوا اهل الانضباط - والزنا والاختلاط - - كل مكنون ضهر
كل ينتظر ماقدم- عزتي للي تندم - من حريق عروقه والدم - للابد يصلى سقر
ايها الانسان اسمعني - لاانفعك ولا تنفعني - ولكن نصيحة يعني - الى الله المستقر
اخر مطاف القصيده - ذات الاهداف العديده - الله يجعلها ا مفيده تاتي للاعمى بصر
هذا من بعض اللي عندي - للدين اعتبروني جندي -يقوى في سبيله زندي اقوب من صم الصخر
يارشيدين العقول - اخر ماخنا نقول - صلى الله على الرسول -عد مازاف البحر
عد كل ميت وحي - صلى الله على النبي - الأمي الهاشمي - سيد جميع البشر
---------------------------------------------------------------
الشاعر / مقيت بن عبدالله ال عاطف القحطاني
القصيده منقوله من كاسيت - والكاسيت تحت عنوان ( الدعوه عبر الشعر النبطي) ايضاً لنفس الشاعر .. وبصوته..
ماشاء الله عليه.. وربي مايحرمه اجرها
اتمنى ان تكون اعجبتكم...وتكون مفيده...
وفيها ابيات كثيره تنفع تصميمات.. وبنارات..دعويه...
انتظرونا بقصيده قويه له ..ايضاً تحت عنوان العنوسه.. بمشيئة الله
تقبلو احترامي..
والسلام عليكم
« آخـــر الـــمـــشـــاركــــات »
رجال وحرمه وابليس ..لامحرم ولاأنيس ..الا سواق خسيس ..من قال أنه ماغدر ؟؟!!
العرض العادي
